Weather Update : उन्हाचा कडाका वाढत असतानाच पुढील तीन दिवस ढगाळ वातावरणासह पावसाचा अंदाज (फोटो - istock)
पुणे : गेल्या काही दिवसांपासून राज्यासह पुण्यात उन्हाचा कडाका चांगलाच वाढला होता. मात्र, शनिवारी (ता. २८) कमाल तापमान स्थिर राहिले असून, वातावरणात अचानक बदल पाहायला मिळाला. तर पुढील तीन दिवस राज्याच्या विविध भागांसह पुणे जिल्ह्यांत तुरळक ठिकाणी पाऊस पडण्याची शक्यता भारतीय हवामानशास्त्र विभागाने वर्तविली आहे. त्यामुळे पुढील दोन ते तीन दिवस पुणे जिल्ह्याला ‘यलो’ अलर्ट देण्यात आला आहे.
पुणे आणि परिसरामध्ये शनिवारी सकाळी आकाश निरभ्र असल्याने उन्हाचा चटका चांगलाच जाणवत होता. मात्र, दुपारनंतर वातावरणात हळूहळू बदल झाला. दुपारी ढगाळ वातावरण आणि सोसाट्याचा वारा वाहू लागल्याने पुणेकरांना वाढत्या उकाड्यापासून काहीसा दिलासा मिळाला. सायंकाळच्या सुमारास शहरात आकाश पूर्णतः ढगाळ झाले होते. शहरातील मध्यवर्ती भागामध्ये कमाल तापमान स्थिर राहून ३८ अंश सेल्सिअस इतके तर किमान तापमान २०.२ अंश सेल्सिअस इतके नोंदविण्यात आले. तर पुढील दोन दिवसांत हवामानात फारसा बदल होणार नसल्याने कमाल आणि किमान तापमान स्थिर राहणार आहे. त्यानंतर मात्र कमाल तापमानात हळूहळू किंचित घट होण्याची शक्यता असल्याचे हवामानशास्त्र विभागाने सांगितले आहे.
पुणे आणि परिसरात रविवारी (ता. २८) किमान आणि कमाल तापमान स्थिर राहणार असून, कमाल तापमान ३८ अंश सेल्सिअस तर किमान तापमान २० अंश सेल्सिअस नोंदविण्यात येणार आहे. आकाश मुख्यतः निरभ्र राहण्याची शक्यता आहे. तर सोमवारपासून (ता. ३१) कमाल तापमानात आणखी घट होण्याची शक्यता आहे.
कमाल तापमान ३६ अंश सेल्सिअसचा अंदाज
कमाल तापमान ३६ अंश सेल्सिअस तर किमान तापमान १८ अंश सेल्सिअस पर्यंत नोंदविण्यात येण्याची शक्यता आहे. आकाश मुख्यतः निरभ्र राहून दुपारी आणि सायंकाळी अंशतः ढगाळ राहण्याची शक्यता भारतीय हवामानशास्त्र विभागाने वर्तविली आहे.
हेदेखील वाचा : ईशान्य भारतात मार्चअखेरीस मुसळधार पाऊस; हिमाचल ते ओडिशापर्यंत सोसाट्याचा वारा, तापमानातील चढउतार सुरूच
