शुक्रवार, 18 सप्टेंबर 2026
माणगाव- इंदापूर वाहतूक कोंडी (फोटो- सोशल मिडिया)
गणेशोत्सवासाठी लाखो चाकरमानी कोकणाकडे रवाना झाल्याने महामार्गावर वाहनांचा प्रचंड ताण आला आहे. महामार्गावरील अपूर्ण कामे आणि वाहतूक व्यवस्थेतील त्रुटींचा फटका थेट गणेशभक्तांना बसत आहे. अवजड वाहनांना बंदी असतानाही काही ठिकाणी त्यांची होणारी वाहतूक कोंडीत आणखी भर घालत असल्याचे चित्र आहे. वाहतूक पोलिस तसेच प्रशासनाकडून वाहतूक सुरळीत करण्याचे प्रयत्न सुरू असले तरी वाहनांचा वाढलेला लोंढा आणि महामार्गाची दुरवस्था यामुळे यंत्रणांचीही धावपळ उडाली आहे.
प्रवाशांमधून होतोय मोठा संताप व्यक्त
काही ठिकाणी एकेरी वाहतूक व पर्यायी मार्गाचा अवलंब करण्याच्या सूचना देण्यात आल्या आहेत. मात्र, मुख्य महामार्गावरील कोंडी अद्याप पूर्णपणे फुटलेली नाही. गणरायाच्या दर्शनासाठी उत्साहाने निघालेल्या चाकरमान्यांना मात्र महामार्गावरील रखडपट्टीमुळे मनस्ताप सहन करावा लागत आहे. गणेशोत्सवाच्या पार्श्वभूमीवर वाहतूक नियोजनाचा पुरता बोजवारा उडाल्याची संतप्त भावना प्रवाशांमधून व्यक्त होत आहे.
माणगाव परिसरात वाहतूक कोंडीची तीव्रता अधिक असल्याचे दिसून येत आहे. काही ठिकाणी वाहनांच्या रांगा अनेक किलोमीटरपर्यंत पसरल्या आहेत. महाडच्या दिशेने मोठ्या प्रमाणात वाहने पुढे सरकत असून वाहतुकीचा वेग मंदावल्यामुळे प्रवाशांना मोठा खोळंबा सहन करावा लागत आहे. गणेशोत्सवासाठी कुटुंबासह कोकणात निघालेल्या चाकरमान्यांना या कोंडीचा सर्वाधिक फटका बसत आहे. नेहमीपेक्षा प्रवासासाठी अधिक वेळ लागत असल्याने अनेकांचे गाव गाठण्याचे नियोजनही कोलमडले आहे.
