फोटो सौजन्य सोशल मीडिया
सातारा जिल्ह्यातील ऊस उत्पादक शेतकरी यंदा अनेक आर्थिक संकटांचा सामना करत आहेत. दुष्काळी परिस्थिती, खतांचे वाढलेले दर, मजुरी आणि शेतीसाठी लागणाऱ्या इतर खर्चामुळे उत्पादन खर्चात मोठी वाढ झाली आहे. शेतकऱ्यांनी ऊस पिकवण्यासाठी मोठे भांडवल आणि मेहनत खर्च केली आहे. त्यामुळे त्यांच्या घामाला योग्य मोबदला मिळावा, यासाठी उसाला प्रतिटन पाच हजार रुपये दर जाहीर करण्याची मागणी रयत क्रांती संघटनेने केली आहे.
सातारा जिल्ह्यातील अनेक साखर कारखान्यांनी अद्याप ऊसदर जाहीर केलेला नसतानाही काही ठिकाणी ऊसतोड सुरू करण्यात आली आहे. त्यामुळे आपल्या उसाला नेमका किती दर मिळणार, याबाबत शेतकऱ्यांमध्ये संभ्रम निर्माण झाला आहे. सर्व शेतकरी संघटनांकडून प्रतिटन पाच हजार रुपये दराची मागणी केली जात असली, तरी कारखानदारांकडून अद्याप सकारात्मक भूमिका घेण्यात आलेली नाही. दर निश्चित होण्यापूर्वीच तोडणी सुरू होणे हा शेतकऱ्यांसाठी चिंतेचा विषय बनला आहे.
या प्रश्नावर प्रशासनाने तातडीने हस्तक्षेप करावा, अशी मागणी रयत क्रांती संघटनेने निवासी जिल्हाधिकारी नागेश पाटील यांना दिलेल्या निवेदनातून केली आहे. जिल्ह्यातील सर्व साखर कारखानदारांची बैठक बोलावून शेतकरी संघटनांच्या प्रतिनिधींसोबत चर्चा करावी आणि ऊसदराचा प्रश्न मार्गी लावावा, अशी मागणी करण्यात आली आहे.
उसाला प्रतिटन पाच हजार रुपये दर जाहीर न केल्यास उपोषणाचा मार्ग अवलंबणार असल्याचा इशारा प्रकाश उर्फ सोनू साबळे यांनी दिला आहे. यावेळी मधुकर जाधव, जिल्हा उपाध्यक्ष देविदास जाधव आणि राहुल पवार उपस्थित होते.
.png "Videos"){kind=small}
