Maharashtra Drought 2026: दुष्काळाची भीषण कुऱ्हाड! ‘आम्हाला सांभाळता येत नाही, तुम्हीच वाचवा’; अश्रू ढाळत शेतकरी सोडतायत गोवंश

Maharashtra Drought 2026: महाराष्ट्रातील भीषण दुष्काळामुळे शेतकऱ्यांसमोर जनावरांच्या संगोपनाचा गंभीर प्रश्न निर्माण झाला आहे. चारा आणि पाण्याच्या टंचाईमुळे हतबल झालेले शेतकरी 'आम्हाला सांभाळता येत नाही, तुम्हीच वाचवा', अशी विनवणी करत निसर्गसृष्टी गोपालन संस्थेत आपला गोवंश सोडत आहेत.

• दुष्काळाची भीषण कुऱ्हाड!
• ‘आम्हाला सांभाळता येत नाही, तुम्हीच वाचवा’
• निसर्गसृष्टी गोपालन संस्थेत अश्रू ढाळत शेतकरी सोडून जात आहेत गोवंश

पोपट पिटेकर,अहिल्यानगर : दुष्काळाच्या भयानक छायेमुळे ग्रामीण भागातील शेतकरी पूर्णपणे कोलमडला आहे. छावणीत किंवा स्वतःच्या दावणीला जनावरांना पाजायला पाणी आणि खायला चारा उरलेला नसल्याने हतबल झालेले शेतकरी आता गोपालन संस्थांचा आसरा घेत आहेत. ईसळक येथील निसर्गसृष्टी गोपालन संस्थेत सध्या 600 हून अधिक जनावरे असतानाच, दुष्काळ अधिकृतपणे जाहीर होण्याआधीच 60 ते 70 गोवंश नव्याने संस्थेत आणून सोडण्यात आले आहेत. एवढेच नाही तर तब्बल 300 ते 400 शेतकरी संस्थेच्या संपर्कात असून, आम्हाला सांभाळणे शक्य नाही, तुम्हीच आमच्या जनावरांना वाचवा, अशी आर्जव करत अश्रू ढाळत आपली जनावरे संस्थेच्या हवाली करत आहेत. (Maharashtra Drought 2026)

Yavatmal News: कापसाने गाठला ९,६०० रुपयांचा भाव! कापसाचे दर वधारले, मात्र शेतकऱ्यांचे उत्पादन घटले

जनावरांची संख्या 1 हजारच्या पार जाण्याची भीती

शेतकऱ्यांची ही भीषण परिस्थिती पाहता येत्या काही दिवसांत संस्थेतील गोवंशाची संख्या 1,000च्या पार जाण्याची शक्यता निर्माण झाली आहे. एकीकडे जनावरांची संख्या वेगाने वाढत आहे, तर दुसरीकडे पाणी आणि चाऱ्याचा तुटवडा निर्माण झाल्याने एवढा मोठा गोवंश कसा सांभाळायचा, असा गंभीर आणि आव्हानात्मक प्रश्न संस्थेसमोर उभा ठाकला आहे.

गावातील पाणी दोन महिन्यांत संपणार; बाहेर राज्यातून भुसा मागवण्याची तयारी

सध्या गावात विकत मिळणारे पाणीही अवघ्या दोन-तीन महिन्यांत संपण्याच्या मार्गावर आहे. भविष्यात नगर शहरातून पाण्याचे टँकर आणावे लागतील अशी चिंतेची बाब आहे. आज 1,000 रुपयांना मिळणारा टँकर उद्या 2,000 रुपयांपर्यंत विकत घ्यावा लागेल. चाऱ्याची टंचाई भागवण्यासाठी पंजाब आणि मध्य प्रदेशातून गव्हाचा भुसा मागवण्याची तयारी संस्थेने केली आहे. सध्या दिवसाला 10 ते 12 लाख रुपये खर्च येत असून, वाढत्या संख्येमुळे हा खर्च दुप्पट होण्याचा अंदाज आहे.

आता जनतेनेच पाठीशी उभे राहावे!

हिंदुत्ववादी नेत्यांचे मार्गदर्शन व सहकार्य असले तरी त्यांच्या मदतीलाही मर्यादा आहेत. त्यामुळे केवळ राजकीय नेत्यांवर अवलंबून न राहता सामान्य जनतेने या संघर्षाच्या काळात पुढे यावे, असे आवाहन संस्थेने केले आहे. माणसाच्या खाण्या-पिण्याची व्यवस्था कशीही होऊ शकते, पण या मूक जनावरांकडे दुर्लक्ष झाले तर ते जगू शकणार नाहीत. आपण गोमातेचे रक्षण केले तर गोमाता आपले रक्षण करेल. या कठीण प्रसंगात जनतेने सढळ हाताने मदत करावी,”असे भावूक आवाहन निसर्गसृष्टी गोपालन संस्थेचे संस्थापक गौतम कराळे यांनी केले आहे.

Mira Bhayandar: महासभेत हाणामारी, तरीही शेकडो कोटींच्या प्रस्तावांना मंजुरी; भाजपच्या कारभारावर विरोधकांचा आक्षेप; नेमकं काय घडलं?