"आयुष्यभर पुजारी साहेब लक्षात राहील..." शेवगाव दंगलीत वंचित बहुजन आघाडीच्या प्रदेश उपाध्यक्षांना कसं गोवलं? खाकीचा भयानक चेहरा उघड!
पोपट पिटेकर, अहिल्यानगर: शेवगाव येथे १४ मे २०२३ रोजी छत्रपती संभाजी महाराज जयंतीच्या मिरवणुकीदरम्यान झालेल्या दंगल प्रकरणात वंचित बहुजन आघाडीचे राष्ट्रीय कार्यकारणी सदस्य तथा प्रदेश उपाध्यक्ष किसन चव्हाण यांना मुख्य आरोपी करण्यात आले. मात्र, पोलीस निरीक्षक विलास पुजारी यांनी एका पत्रकाराशी बोलताना प्रा. चव्हाण यांना या गुन्ह्यात कसे अडकवले, याची थेट जाहीर कबुली दिली आहे. पत्रकाराने केलेल्या या स्टिंग ऑपरेशनचे ऑडिओ रेकॉर्डिंग आता तपास अधिकाऱ्यांकडे सादर करण्यात आले आहे.
दंगलीच्या दिवशी प्रा. किसन चव्हाण हे पूर्वानियोजित कार्यक्रमासाठी छत्रपती संभाजीनगर येथे होते आणि दंगल शांत झाल्यानंतर रात्री उशिरा शेवगावला पोहोचले होते. तरीही तत्कालीन पोलीस निरीक्षक विलास पुजारी, डीवायएसपी संदीप मिटके, डीवायएसपी अजित पाटील आणि पोलीस निरीक्षक संतोष मुटुकुळे यांनी संगनमत करून प्रा. चव्हाण यांच्यावर खोटा गुन्हा दाखल केला होता असा आरोप चव्हाण यांनी केला.
या विरोधात प्रा. चव्हाण यांनी अहमदनगर न्यायालयात आणि त्यानंतर उच्च न्यायालय खंडपीठ औरंगाबाद येथे याचिका दाखल केली. उच्च न्यायालयाच्या आदेशानुसार अहमदनगर पोलीस अधीक्षक यांनी श्रीरामपूर विभागाचे डीवायएसपी जयदत्त भवर यांची चौकशी अधिकारी म्हणून नियुक्ती केली असून, ते पुढील आठवड्यात न्यायालयात अहवाल सादर करणार आहेत अशी माहिती चव्हाण यांनी दिली.
पाथर्डी येथे पोलीस ठाण्यात एका आदिवासी महिलेचा संशयास्पद मृत्यू झाल्यानंतर प्रा. किसन चव्हाण यांच्या नेतृत्वाखाली तीव्र आंदोलन करण्यात आले होते. या आंदोलनानंतर २९ मे २०२४ रोजी पोलीस निरीक्षक विलास पुजारी यांनी पत्रकाराशी बोलताना प्रा. चव्हाण यांना शेवगाव दंगलीत कसे अडकवले, याचे गुपित फोडले.
मी शेवगावला असताना, हे काल-परवा तीन दिवस माझ्याविरोधात आंदोलन करणाऱ्याला (प्रा. किसन चव्हाण यांना) दंगलीच्या गुन्ह्यात कसे अडकवले? टप्प्यात आल्यावर मी सोडत नसतो… शेवगावच्या दंगलीच्या गुन्ह्यात फिरवलं… सोडलं… आणि ते इतकं भिडलं की आयुष्यभर पुजारी साहेब लक्षात राहील. टप्प्यात आल्यावर मी सोडत नसतो, शेवगावच्या दंगलीच्या गुन्ह्यात याला मुख्य आरोपी केलं, ओला साहेब, कटके साहेब… वरिष्ठ पातळीवरून झालं सगळं…”
हे संपूर्ण संभाषण पत्रकाराने रेकॉर्ड केले असून, हे स्टिंग ऑपरेशन डीवायएसपी जयदत्त भवर यांच्याकडे अधिकृत पुरावा म्हणून सोपवण्यात आले आहे अशी माहिती पत्रकार परिषदेत किसान चव्हाण यांनी दिली.
प्रा. किसन चव्हाण यांना खोट्या गुन्ह्यात गोवल्यानंतर वंचित बहुजन आघाडीचे राष्ट्रीय अध्यक्ष ॲड. प्रकाश तथा बाळासाहेब आंबेडकर यांनी तत्कालीन मुख्यमंत्र्यांची आणि तत्कालीन पोलीस अधीक्षक राकेश ओला यांची भेट घेऊन सविस्तर माहिती दिली होती. आता स्वतः पोलीस अधिकाऱ्याची कबुली समोर आल्यामुळे पोलीस यंत्रणेतील कटकारस्थान उघड झाले असून संबंधितांवर कडक कारवाईची मागणी केली जात आहे.
.png "Videos"){kind=small}
