नौसेना दिन सिंधुदुर्गमध्ये होत आहे हे महाराष्ट्रासाठी भूषण -एकनाथ शिंदे

किल्ले राजकोट येथे नेवी तसेच राज्य शासन सार्वजनिक बांधकाम विभाग यांच्या माध्यमातून छत्रपती शिवाजी महाराज यांचा भव्यदिव्य पुतळा उभारणी करण्यात आला आहे.

सिंधुदुर्ग : पंतप्रधान नरेंद्र मोदी यांच्या शुभहस्ते सिंधुदुर्ग जिल्ह्यातील किल्ले राजकोट येथील छत्रपती शिवाजी महाराज यांच्या पूर्णाकृती पुतळ्याचे अनावरण ४ डिसेंबर रोजी होत आहे. महाराष्ट्र व देशासाठी ही अभिमानाची बाब आहे. त्या सोबतच नौसेना दिन सिंधुदुर्ग येथे होत आहे, हेही महाराष्ट्रासाठी भुषण आहे. हे दोन्ही कार्यक्रम न भूतो न भविष्यती असे होतील. असे प्रतिपादन राज्याचे मुख्यमंत्री एकनाथ शिंदे यांनी किल्ले राजकोट येथे बोलताना व्यक्त केले.

किल्ले सिंधुदुर्ग समुद्र परिसरात होणारा नौसेना दिन सोहळा म्हणजे आरमारचे जनक असलेल्या छत्रपती शिवाजी महाराज यांना विनम्र अभिवादन अशा स्वरूपात हा सोहळा असणार आहे. या संपूर्ण सोहळ्याला पंतप्रधान नरेंद्र मोदी उपस्थित राहणार असून शासनाच्या माध्यमातून सर्वत्र जय्यत तयारी सुरु असल्याचेही मुख्यमंत्री यांनी सांगितले.

किल्ले राजकोट येथे नेवी तसेच राज्य शासन सार्वजनिक बांधकाम विभाग यांच्या माध्यमातून छत्रपती शिवाजी महाराज यांचा भव्यदिव्य पुतळा उभारणी करण्यात आला आहे. राज्याचे मुख्यमंत्री एकनाथ शिंदे यांनी गुरुवारी सायंकाळी याठिकाणी भेट देऊन पाहणी केली.

यावेळी उद्योगमंत्री उदय सामंत, शिक्षण मंत्री दीपक केसरकर, आमदार रवींद्र फाटक, माजी खासदार निलेश राणे, जिल्हाधिकारी किशोर तावडे, सार्वजनिक बांधकाम विभाग कार्यकारी अभियंता अजयकुमार सर्वगोड, मुख्य कार्यकारी अधिकारी प्रजित नायर, तहसीलदार वर्षा झालटे, शिवसेना जिल्हाप्रमुख संजय आंग्रे, भाजप जिल्हाध्यक्ष प्रभाकर सावंत, माजी आमदार राजन तेली, जिल्हा उपाध्यक्ष अशोक सावंत, तालुकाध्यक्ष धोंडी चिंदरकर, जिल्हा बँक संचालक बाबा परब, आनंद शिरवलकर, माजी उपासभापती राजू परुळेकर, शिवसेना जिल्हा पदाधिकारी बबन शिंदे, तालुकाध्यक्ष राजा गावकर, नीलम शिंदे, हर्षद पारकर, सार्वजनिक बांधकाम विभागाचे कुमुदिनी प्रभू, नौदल, पोलीस तसेच अन्य विभागाचे अधिकारी, शिवसेना, भाजप पदाधिकारी उपस्थित होते.

श्री. एकनाथ शिंदे म्हणाले, गेले दोन महिने राजकोट येथे नौदल व शासनाच्या वतीने शिव पुतळा उभारण्याचे काम हाती घेत ते मार्गी लावण्यात आले आहे. येत्या ४ तारखेला पंतप्रधान नरेंद्र मोदी यांच्या हस्ते या पुतळ्याचे अनावरण होईल. नौसेना दिन हा पूर्वी दिल्लीत व्हायचा मात्र यावर्षी तो येथे होत आहे. हे छत्रपती शिवाजी महाराजांना मोठे अभिवादन आहे. कारण शिवाजी महाराज हे आरमाराचे जनक होते. त्यांनी पहिले आरमार सुरू केले. त्याची दखल पंतप्रधानांनी आणि नौदल विभागाने घेऊन नौसेना दिन येथे साजरा करण्याचा निर्णय घेतला. त्यामुळे पंतप्रधानांचे मी आभार मानत आहे. नौदल विभागाच्या ध्वजावर देखील शिवमुद्रा लावण्याचा निर्णय घेतला. छत्रपती शिवाजी महाराजांची एक दैवी कृपा आहे. त्यामुळे हा कार्यक्रम न भूतो न भविष्यती असा होईल असा विश्वास त्यांनी यावेळी व्यक्त केला.