
Solapur Dcc bank election prachar
करमाळा (प्रतिनिधी) : सोलापूर जिल्हा मध्यवर्ती सहकारी बँकेच्या निवडणुकीचं वातावरण आता तापू लागलं आहे. निवडणुकीच्या पार्श्वभूमीवर स्वाभिमानी शेतकरी सहकार पॅनलने प्रचाराचा श्रीगणेशा केला आहे. करमाळा येथील श्री कमलाभवानी देवीच्या मंदिरात दर्शन घेऊन या प्रचाराचा शुभारंभ करण्यात आला. यावेळी माजी आमदार रणजीतसिंह मोहिते पाटील आणि खासदार धैर्यशील मोहिते पाटील यांची प्रमुख उपस्थिती होती.
निवडणुकीच्या प्रचाराला सुरुवात करण्यापूर्वी मोहिते पाटील यांच्यासह पॅनलच्या उमेदवारांनी श्री कमलाभवानी मातेचं दर्शन घेतलं. यावेळी उमेदवार डॉ. अनिकेत देशमुख, संग्रामसिंह जहागीरदार, शिवाजी पाटील, सिंधू सुरेश पाटील, अस्मिता गायकवाड आणि ॲड. दत्तात्रय खडतरे यांनी देवीच्या चरणी नतमस्तक होत आशीर्वाद घेतले.
सहकार क्षेत्राच्या माध्यमातून शेतकरी, बँकेचे सभासद आणि सर्वसामान्य नागरिकांच्या हितासाठी काम करण्याचा संकल्प यावेळी व्यक्त करण्यात आला. (Solapur District Bank Election)
प्रचाराच्या शुभारंभानंतर रणजीतसिंह मोहिते पाटील आणि खासदार धैर्यशील मोहिते पाटील यांनी मतदारांना पॅनलच्या उमेदवारांना विजयी करण्याचं आवाहन केलं.
स्वाभिमानी शेतकरी सहकार पॅनलच्या सर्व उमेदवारांना ‘शिट्टी’ या निवडणूक चिन्हावर मतदान करून विजयी करावं, असं आवाहन त्यांनी केलं. त्यामुळे सोलापूर जिल्हा बँकेच्या निवडणुकीत मोहिते पाटील गटाने प्रचाराला सुरुवात करत आपली ताकद दाखवण्याचा प्रयत्न केला आहे.
या कार्यक्रमाला राष्ट्रवादी काँग्रेस पक्षाचे जिल्हाध्यक्ष वसंतराव देशमुख, माजी जिल्हा परिषद सदस्य सवितादेवी राजेभोसले, माजी जिल्हा परिषद अध्यक्ष अनिरुद्ध कांबळे, शहाजीराव देशमुख, डॉ. वसंतराव पुंडे, उदयसिंह मोरे पाटील, महेंद्र पाटील यांच्यासह अनेक मान्यवर उपस्थित होते.
तसंच विविध पदाधिकारी, कार्यकर्ते आणि करमाळा तालुक्यातील मतदारांनीही मोठ्या संख्येने हजेरी लावली.
दरम्यान, सोलापूर जिल्हा मध्यवर्ती सहकारी बँकेच्या निवडणुकीत स्वाभिमानी शेतकरी सहकार पॅनलला मतदारांचा किती प्रतिसाद मिळतो, याकडे आता राजकीय वर्तुळाचं लक्ष लागलं आहे. प्रचाराच्या पहिल्याच टप्प्यात मोहिते पाटलांनी घेतलेल्या पुढाकारामुळे निवडणुकीतील चुरस वाढण्याची शक्यता आहे.
Ans: करमाळा येथील श्री कमलाभवानी देवीच्या मंदिरात दर्शन घेऊन प्रचाराचा शुभारंभ करण्यात आला.
Ans: माजी आमदार रणजीतसिंह मोहिते पाटील, खासदार धैर्यशील मोहिते पाटील आणि पॅनलचे उमेदवार यांच्यासह अनेक राजकीय पदाधिकारी व कार्यकर्ते उपस्थित होते.
Ans: स्वाभिमानी शेतकरी सहकार पॅनलचं निवडणूक चिन्ह ‘शिट्टी’ आहे. याच चिन्हावर मतदान करून उमेदवारांना विजयी करण्याचं आवाहन करण्यात आलं आहे.