ठाण्यात क्लस्टर कंपनीविरोधात नागरिक आक्रमक; आमदार जितेंद्र आव्हाड यांच्या उपस्थितीत धडक मोर्चा
ठाणे : ठाणे शहरातील क्लस्टर योजनेविरोधात राष्ट्रवादी काँग्रेस शरदचंद्र पवार पक्ष आक्रमक झाला आहे. तीन हात नाका सिग्नल ते क्लस्टर कार्यालय असा धडक मोर्चा आमदार जितेंद्र आव्हाड यांच्या उपस्थितीत काढण्यात आला. या मोर्चात शेकडो कार्यकर्ते सहभागी झाले आहेत. पोलिसांनी मोर्चाला परवानगी नाकारली असतानाही राष्ट्रवादी शरद पवार पक्षाकडून हा मोर्चा काढण्यात आला. त्यामुळे मोर्चास्थळी पोलिसांचा मोठा बंदोबस्त तैनात करण्यात आला होता, परिस्थितीवर पोलिसांकडून लक्ष ठेवण्यात येत आहे. यावेळी आव्हाड यांनी पत्रकार परिषदेत विजय वडेट्टीवार यांच्या वक्तव्यावरुन निशाणा साधला.
आव्हाड म्हणाले की, क्लस्टर कंपनीच्या विरोधात “जनआक्रोश मोर्चाचे आयोजन” करण्यात आले होते. आमचा क्लस्टरला विरोध नसून त्यामागून या शहराच्या हितसंबंधावर, सौंदर्यावर आणि प्रगतीवर जो घाला घालण्याच काम काही नतद्रष्ट लोक करीत आहे त्याला आहे. या क्लस्टर च्या माध्यमातून तब्बल 12% FSI देण्यासारखा तुघलकी निर्णय होत आहे. क्लस्टर आणा पण त्यात ठाणे शहराचा विकास असावा, पारदर्शकता असावी अशी आमची मागणी आहे. मूठभर लोकांच्या फायद्यासाठी हा प्रोजेक्ट राबवला जाणार असेल तर राष्ट्रवादी काँग्रेस शरदचंद्र पवार पक्ष या विरोधात आपला आवाज बुलंद करेल..!
यावेळी आव्हाड यांनी विजय वडेट्टीवार यांच्या वक्तव्यावरुनही प्रतिक्रीया दिली. वडेट्टीवार यांनी सुप्रिया सुळे यांच्याकडेही ओबीसी सर्टिफिकेट आहे, असं वक्तव्य केलं होतं. यावरुन वडेट्टीवार म्हणाले, अजिबात नाही. विजय वडेट्टीवार सुप्रिया सुळे यांच्या घरी जाऊन तपासून आले होते का? काहीही तोंडाला येईल ते बोलायचे, हा प्रकार योग्य नाही. सुप्रिया सुळे यांचे ओबीसी प्रमाणपत्र असल्याचा दावा चुकीचा आहे. खोटारडेपणा करू नये. समविचारी पक्षांच्या नेत्यांनी एकमेकांच्या पक्षाच्या नेतृत्वाबद्दल अशा पद्धतीने बोलणे चुकीचे आहे. आपली लढाई कोणाशी आहे, याचा विचार तरी करायला हवा. उगाच कारण नसताना कोणावरही बोलायचे, कोणाचेही नाव घ्यायचे आणि आपण हेडलाईनमध्ये कसे येऊ, हे पाहायचे, हे योग्य नाही. मी सुप्रिया सुळे यांच्याबद्दल बोलत आहे. बाकी कोणाच्या घरात काय आहे, याची मला माहिती नाही. सुप्रिया सुळे यांच्याकडे कोणतेही ओबीसी प्रमाणपत्र नाही, हे मी खात्रीपूर्वक सांगत आहे, असं जिलेंद्र आव्हाड म्हणाले.
.png "Videos"){kind=small}
