फोटो सौजन्य- इन्स्टाग्राम
१५ ऑगस्ट रोजी डोंबिवलीत साकारलेल्या ३५ हजार चौरस फुटांच्या विशाल तिरंग्यासह विश्वविक्रमी तिरंगा रॅलीच्या यशात मोलाचे योगदान देणाऱ्या १०० सामाजिक संस्था आणि ७१ शाळांप्रती कृतज्ञता व्यक्त करण्यासाठी रविवारी डोंबिवली येथे कृतज्ञता सोहळा पार पडला. खासदार डॉ. श्रीकांत एकनाथ शिंदे यांच्या उपस्थितीत झालेल्या या सोहळ्यात सहभागी झालेल्या मान्यवरांना प्रमाणपत्र प्रदान करून सन्मानित करण्यात आले.
या ऐतिहासिक तिरंगा रॅलीत मुसळधार पावसाचीही तमा न बाळगता हजारो विद्यार्थी आणि नागरिक सहभागी झाले होते. ३५ हजार चौरस फुटांचा विशाल तिरंगा हातात घेरून मिळालेला उत्स्फूर्त प्रतिसाद यामुळे डोंबिवलीत राष्ट्रभक्तीचा अभूतपूर्व सोहळा साकारला. या उपक्रमाची वर्ल्ड रेकॉर्ड इंडिया, एशिया बूक ऑफ रेकॉर्ड आणि इंडिया बुक ऑफ रेकॉर्ड या तीन विक्रम नोंद संस्थांकडून अधिकृत नोंद करण्यात आली.
या विश्वविक्रमी उपक्रमाच्या यशामागे डोंबिवलीतील १०० सामाजिक संस्था आणि ७१ शाळांचा सक्रिय सहभाग होता. विद्यार्थ्यांपासून शिक्षक, पालक, सामाजिक संस्थांचे पदाधिकारी आणि स्वयंसेवकांपर्यंत विविध घटकांनी एकत्र येत या रॅलीला मोठे बळ दिले. या सर्वांच्या योगदानाची दखल घेत आजच्या कृतज्ञता सोहळ्यात त्यांचा सन्मान करण्यात आला.
या उपक्रमाच्या माध्यमातून विद्यार्थ्यांच्या मनात राष्ट्रध्वजाबद्दलवा अभिमान आणि देशाप्रती असलेली जबाबदारी अधिक दृढ करण्याचा प्रयत्न करण्यात आला. हजारो विद्यार्थ्यांनी तिरंगा हातात घेऊन रॅलीत सहभाग घेतला, ही विशेष समाधानाची बाब आहे. नव्या पिढीने देशाच्या प्रगतीसाठी पुढे यावे आणि राष्ट्रनिर्माणाच्या कार्यात आपले योगदान द्यावे, अशी अपेक्षाही त्यांनी व्यक्त केली. १०० सामाजिक संस्था आणि ७৭शाळांनी एकत्र येत दिलेले योगदान हे हे डोंबिवलीच्या सामाजिक एकतेचे उत्तम उदाहरण आहे. विविध क्षेत्रांतील संस्था, विद्यार्थी आणि नागरिक एका तिरंग्याखाली एकत्र येऊ शकतात, याची ताकद या रॅलीच्या माध्यमातून दिसून आली, या सर्वांच्या योगदानाप्रती कृतज्ञता व्यक्त करण्यासाठी आजचा सोहळा आयोजित करण्यात आला होता.
१५ ऑगस्टच्या या विश्वविक्रमी तिरंगा रॅलीने डोंबिवलीच्या सामाजिक आणि राष्ट्रभक्तीच्या एकजुटीचे दर्शन घडवले, तीन विक्रम नोंद संस्थांकडून या उपक्रमाची अधिकृत नोंद होणे ही डोंबिवलीसह संपूर्ण कल्याण लोकसभा मतदारसंघासाठी अभिमानाची बाब असल्याचेही यावेळी नमूद करण्यात आले. या कृतज्ञता सोहळ्यास सहभागी सामाजिक संस्थांचे मान्यवर अध्यक्ष, शाळाचे मुख्याध्यापक, शिक्षक, पालक आणि नागरिक मोठ्या संख्येने उपस्थित होते.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
.png "Videos"){kind=small}
