‘महासभा लाईव्ह का नाही?’ मिरा-भाईंदर महापालिकेबाहेर समाजसेवकांचे ठिय्या आंदोलन
विजय काते, मिरा-भाईंदर: मिरा-भाईंदर महानगरपालिकेच्या महासभेच्या कामकाजात पारदर्शकता आणण्यासाठी महासभेचे लाईव्ह स्ट्रीमिंग सुरू करावे, या मागणीसाठी शहरातील समाजसेवकांनी महापालिका मुख्यालयाबाहेर ठिय्या आंदोलन केले. महासभेच्या पार्श्वभूमीवर करण्यात आलेल्या या आंदोलनातून प्रशासन आणि सत्ताधाऱ्यांचे लक्ष नागरिकांच्या या मागणीकडे वेधण्यात आले.
आंदोलकांनी यावेळी “देशाचे सर्वोच्च न्यायालय, लोकसभा आणि विधानसभा यांचे कामकाज जनतेला लाईव्ह पाहता येते, मग मिरा-भाईंदर महानगरपालिकेची महासभा लाईव्ह का नाही?” असा सवाल उपस्थित केला. महापालिकेच्या महासभेत शहराशी संबंधित अनेक महत्त्वाचे निर्णय घेतले जातात. या निर्णयांवर चर्चा कशी होते, कोणते नगरसेवक कोणती भूमिका मांडतात आणि कोणत्या मुद्द्यांवर निर्णय घेतला जातो, याची माहिती नागरिकांना थेट मिळावी, अशी आंदोलकांची भूमिका आहे.
Mira Bhayandar News: मिरा-भाईंदर महापालिकेत पुन्हा राजकीय रणकंदन; शिवसेना नगरसेविकांचा सभात्याग
महासभेतील बैठकींसाठी जनतेच्या पैशातून जेवणाची व्यवस्था केली जाते, मग त्याच जनतेला महासभेचे कामकाज थेट दाखवण्यास प्रशासनाला अडचण काय, असा प्रश्नही आंदोलकांनी उपस्थित केला. महापालिकेचा पैसा हा नागरिकांच्या करातून येतो. त्यामुळे महापालिकेच्या निर्णय प्रक्रियेबाबत नागरिकांना माहिती मिळणे हा पारदर्शक प्रशासनाचा महत्त्वाचा भाग असल्याचे आंदोलकांचे म्हणणे आहे.
महासभेचे नियमित लाईव्ह स्ट्रीमिंग सुरू झाल्यास नागरिकांना घरबसल्या महापालिकेतील कामकाज पाहता येईल. यामुळे महासभेतील चर्चा नागरिकांना थेट समजेल, नगरसेवकांची भूमिका जनतेसमोर स्पष्ट होईल, महत्त्वाच्या निर्णय प्रक्रियेची माहिती मिळेल, महापालिका प्रशासनाच्या कामकाजात पारदर्शकता वाढेल, नागरिकांचा स्थानिक स्वराज्य संस्थेतील सहभाग वाढण्यास मदत होईल. ‘कामकाज जनतेपासून दूर ठेवण्याचा प्रयत्न? यासारख्या गोष्टींचा फायदा होऊ शकतो.
दरम्यान, आंदोलकांनी सत्ताधाऱ्यांवर गंभीर आरोप करत महासभेचे कामकाज जनतेपासून दूर ठेवण्याचा जाणीवपूर्वक प्रयत्न केला जात आहे का? असा सवाल उपस्थित केला. महापालिकेतील कारभार पारदर्शक असावा आणि नागरिकांना त्यांच्या पैशातून चालणाऱ्या प्रशासनाच्या कामकाजाची माहिती मिळावी, यासाठी महासभेचे लाईव्ह स्ट्रीमिंग तातडीने सुरू करावे, अशी मागणी आंदोलकांनी केली.
या मागणीवर महापालिका प्रशासन आणि सत्ताधारी पक्षाची भूमिका काय असेल, तसेच महासभेचे लाईव्ह प्रक्षेपण सुरू करण्याबाबत पुढील निर्णय घेतला जातो का, याकडे आता नागरिकांचे लक्ष लागले आहे.
.png "Videos"){kind=small}
