मंगळवार, 29 सप्टेंबर 2026
बुलेट ट्रेनसाठी भिवंडीत महाराष्ट्रातील पहिला स्टील पूल तयार; ५४ हजारांहून अधिक बोल्टचा वापर
या स्टील पुलाची निर्मिती तमिळनाडूतील त्रिची येथील कार्यशाळेत करण्यात आली. उभारणीच्या ठिकाणापासून सुमारे १,३०० किलोमीटर अंतरावर तयार झालेली ही संरचना विशेष ट्रेलरच्या माध्यमातून महाराष्ट्रात आणण्यात आली. त्यानंतर प्रत्यक्ष ठिकाणी तिची जोडणी करून निर्धारित ठिकाणी बसविण्यात आली.
पुलाच्या निर्मितीदरम्यान निर्धारित तांत्रिक मानकांनुसार स्टीलची अचूक कापणी, छिद्र पाडणे, जोडणी आणि रंगकाम करण्यात आले. स्टीलच्या प्रत्येक उत्पादन तुकडीची अल्ट्रासोनिक चाचणी करण्यात आली. तसेच वेल्डर आणि पर्यवेक्षकांना आंतरराष्ट्रीय वेल्डिंग तज्ज्ञांकडून प्रमाणित करण्यात आले.
अधिक ५४ हजारांहून बोल्टचा केला वापर
प्रकल्प स्थळी १०० मीटर लांबीची संरचना जमिनीपासून सुमारे १७.५ मीटर उंचीवर तात्पुरत्या आधार रचनेवर जोडण्यात आली. यासाठी २२ स्किड अरेंजमेंट आणि ५४ हजार ७६ टीटीएचएसबी प्रकारच्या उच्च क्षमतेच्या बोल्टचा वापर करण्यात आला. पुलाची टिकाऊ क्षमता वाढविण्यासह कंपन नियंत्रणासाठी सी-५ संरक्षक रंगकाम प्रणाली आणि इलॅस्टोमेरिक बेअरिंग्ज बसविण्यात आली आहेत. जोडणीचे काम पूर्ण झाल्यानंतर प्रत्येकी १५० मेट्रिक टन क्षमतेच्या दोन हॉलो जॅक्स आणि पूर्वताण दिलेल्या मॅकॅलॉय बारच्या साह्याने स्वयंचलित यंत्रणेद्वारे पूल निर्धारित ठिकाणी ओढून बसविण्यात आला.
२८ स्टील पूल प्रस्तावित
महामार्ग, द्रुतगती मार्ग, मोठ्या नद्या आणि रेल्वे मार्ग ओलांडण्यासाठी अधिक लांबीच्या स्पॅनची आवश्यकता असलेल्या ठिकाणी स्टील पूल उपयुक्त ठरतात. मुंबई-अहमदाबाद बुलेट ट्रेन मार्गावर एकूण २८ स्टील पूल प्रस्तावित असून, त्यापैकी १६ पुलांचे बांधकाम पूर्ण झाले आहे.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
