शनिवार, 26 सप्टेंबर 2026
फोटो- पोपट पिटेकर
पोपट पिटेकर, अहिल्यानगर : बळीराजाच्या डोळ्यांतील अश्रू आणि वाळणाऱ्या पिकांचा टाहो जेव्हा ‘नवराष्ट्र‘ने संपूर्ण महाराष्ट्रासमोर मांडला, तेव्हा शासनाला शेवटी जाग यावीच लागली. अहिल्यानगर जिल्ह्यातील भीषण आणि विदारक परिस्थितीवर ‘नवराष्ट्र’ने सातत्याने प्रकाश टाकला. आमदार, खासदार आणि पालकमंत्र्यांना जनतेच्या वतीने थेट जाब विचारला. या धडाकेबाज बातमीचाच हा दणकेबाज इम्पॅक्ट आहे की, राज्य शासनाला अखेर अहिल्यानगर जिल्ह्यातील सर्वच्या सर्व तालुक्यांत दुष्काळ जाहीर करावा लागला आहे.
परंतु, दुष्काळ जाहीर करून प्रश्न मिटत नाही, तर तो तिथून सुरू होतो. त्यामुळेच आता बळीराजाला वाचवण्यासाठी ‘स्वाभिमानी शेतकरी संघटना’ मैदानात उतरली असून, “सरसकट कर्जमाफी द्या, नाहीतर लोकप्रतिनिधींना रस्त्यावर फिरू देणार नाही!” असा थेट इशारा देत आक्रमक पवित्रा घेतला आहे.
आज अहिल्यानगर जिल्ह्यातील शेवगाव, नगर, श्रीगोंदा, नेवासा, पारनेर, पाथर्डी, कर्जत, जामखेड, संगमनेर, राहुरी, अकोले, कोपरगाव, श्रीरामपूर आणि राहाता या सर्व १४ तालुक्यांची अवस्था दयनीय झाली आहे. जुने-जाणते नागरिक सांगतात की, यंदाची परिस्थिती १९७२ च्या ऐतिहासिक दुष्काळापेक्षाही भयंकर आहे. ७२ च्या दुष्काळात किमान पिण्यासाठी तरी पाणी उपलब्ध होते; परंतु आज नदी, नाले, विहिरी आणि तलाव पार कोरडेठाक पडले आहेत. मातीची तहान तर दूरच, पण माणसाच्या घशाची कोरड आणि मुक्या जनावरांच्या पाण्याचा प्रश्न अत्यंत गंभीर बनला आहे. हंबरणाऱ्या जनावरांना चारा आणि पाणी कुठून आणायचे, या चिंतेत शेतकरी कोलमडून पडला आहे.
Maharashtra Drought : ’99 टक्के भागात दुष्काळाची स्थिती’; नाना पटोलेंचा सरकारवर जोरदार हल्लाबोल
यंदाच्या हंगामात शेतकऱ्यांनी हजारो रुपये पदरमोड करून, उसनवारी करून आणि कर्ज काढून बी-बियाणे व खते खरेदी केली. पीक येईल आणि संसाराचा गाडा हाकलेल, या आशेवर पेरणी केली. पण पावसाने दगा दिला आणि हातातोंडाशी आलेला घास हिरावून घेतला. या भीषण परिस्थितीचे विदारक दृश्य यंदाच्या ‘बैलपोळा’ सणाला पाहायला मिळाले. जो बळीराजा नेहमी मोठ्या उत्साहात आणि वाजत-गाजत पोळा साजरा करायचा, त्याने यंदा अतिशय साध्या आणि सुतकी वातावरणात हा सण पार पाडला. ज्या बैलाच्या जीवावर शेती पिकवायची, तोच बैल चाऱ्या- पाण्याविना तडफडताना पाहून बळीराजाचे काळीज हेलावून गेले आहे.
शेतात पिकाचा एक अंकुरही उरलेला नाही. अशा स्थितीत बँकांचे आणि सावकारांचे घेतलेले कर्ज कसे फेडायचे? मुलांची शाळा-कॉलेजची फी कशी भरायची? आणि रोजचे पोट कसे भरायचे? हे यक्षप्रश्न आज प्रत्येक शेतकऱ्याच्या समोर ठाकले आहेत. शासनाने जर तातडीने सरसकट कर्जमाफी दिली नाही, तर आमच्यासमोर आत्महत्येशिवाय दुसरा कोणताही पर्याय उरणार नाही,” असा अत्यंत विषण्ण आणि थरकाप उडवणारा इशारा हवालदिल झालेल्या शेतकऱ्यांनी दिला आहे.
दुष्काळ जाहीर झाल्याने कागदी घोडे नाचवणे थांबवून प्रत्यक्ष मदत सुरू करण्याची मागणी आता जोर धरू लागली आहे. शेतकरी हक्कासाठी सदैव रस्त्यावर उतरणारी ‘स्वाभिमानी शेतकरी संघटना’ आता अधिकच आक्रमक झाली आहे.
स्वाभिमानीने शासनासमोर स्पष्ट मागण्या ठेवल्या आहेत:
शेतकऱ्यांना तातडीने ‘सरसकट कर्जमाफी’ देण्यात यावी.
जनावरांसाठी छावण्या आणि मोफत चारा-पाण्याची व्यवस्था करावी.
पिण्याच्या पाण्यासाठी सर्व बाधित गावांत विलंब न करता टँकर सुरू करावेत.
“जर सरकारने त्वरित ठोस पावले उचलली नाहीत, तर जिल्ह्यातील आमदार आणि खासदारांना रस्त्यावर फिरू दिले जाणार नाही. राज्यभर तीव्र आंदोलन उभे केले जाईल,” असा सज्जड दम स्वाभिमानी शेतकरी संघटनेने दिला आहे.
Maharashtra Drought : शब्द गोल गोल फिरवू नका… दुष्काळावरून रोहिणी खडसेंचा सीएमवर हल्लाबोल
