शनिवार, 3 ऑक्टोबर 2026
प्रदीप पूर्णेकर हत्या प्रकरणात किशोरी पेडणेकरांचा मीनाक्षी शिंदेंना थेट सवाल
Pradeep Purnekar Murder Case : ठाण्यातील ठाकरे गटाचे विभागप्रमुख प्रदीप पूर्णेकर हत्या प्रकरणावरून राजकीय वातावरण चांगलंच तापलं आहे. या प्रकरणावर ठाकरे गटाच्या नेत्या आणि मुंबईच्या माजी महापौर किशोरी पेडणेकर यांनी जोरदार प्रतिक्रिया दिली आहे. ठाण्यात टोळ्या तयार होत असल्याचा दावा करत त्यांनी यंत्रणांच्या भूमिकेवरही सवाल उपस्थित केला.
‘खरं तर महिला अनाथ होत आहेत. मुंबई, ठाणे, नाशिकमध्ये गँग तयार होत आहेत. ठाण्यात नेमकं काय घडलं? त्यात आमचे विभागप्रमुख पूर्णेकर यांचा बळी गेला,’ असं पेडणेकर म्हणाल्या. या प्रकरणात पोलीस तपास करत असला तरी यंत्रणा कशा पद्धतीने वापरल्या जात आहेत, हे पाहता विश्वास ठेवायचा तरी कसा, असा सवाल त्यांनी उपस्थित केला.
मीनाक्षी शिंदे यांच्या पत्रकार परिषदेसंदर्भात बोलताना पेडणेकरांनी ‘खासमखास’ या शब्दावर आक्षेप घेतला. पूर्णेकर कुटुंबीयांनी थेट भूमिका मांडली असून, आरोप-प्रत्यारोपांपेक्षा तपासातून सत्य समोर येणं महत्त्वाचं असल्याचं त्यांनी म्हटलं.
‘कारण नसताना एखाद्या राजकीय घराण्यातील महिलेचं नाव घेऊ नका. तुमच्यात आणि त्यांच्यात फरक आहे. तुम्हालाही उद्धवजींनी हात दिला होता. त्यांच्या घरावर बोलताना भान ठेवा,’ अशा शब्दांत पेडणेकरांनी प्रतिक्रिया दिली.
ठाण्यातील बदलत्या राजकीय आणि गुन्हेगारी वातावरणावरही पेडणेकरांनी भाष्य केलं. ‘एकेकाळचं शांत ठाणे आता ठाणानानं होताना पाहायला मिळत आहे,’ अशी टीका त्यांनी केली. दरम्यान, प्रदीप पूर्णेकर हत्या प्रकरणात पोलीस तपास सुरू असून, या तपासातून नेमकी वस्तुस्थिती समोर येण्याची प्रतीक्षा आहे.
आदित्य ठाकरे आणि रश्मी ठाकरे यांच्यावर होत असलेल्या आरोपांचाही पेडणेकरांनी उल्लेख केला. ‘उद्धवजींची पत्नी असणं हा काय गुन्हा आहे का?’ असा सवाल त्यांनी केला.
रश्मी ठाकरेंचं नाव वारंवार घेतलं जात असेल तर ठाकरे परिवारासाठी आपण ठामपणे उभे राहू, असंही त्या म्हणाल्या. आरोपांचं खंडन करण्याऐवजी रश्मी ठाकरेंचं नाव घेणं हे ‘डिफमेशन’ असल्याचं सांगत, याबाबत पक्षश्रेष्ठी विचार करतील आणि पुढे काय कारवाई करायची ते ठरवतील, असा इशाराही किशोरी पेडणेकरांनी दिला.
