विद्यापीठ चौकातील उड्डाणपूल ‘स्ट्रक्चरली’ सुरक्षित; अफवांना पूर्णविराम

गेल्या काही दिवसांपासून या उड्डाणपुलाच्या सांध्यांमध्ये (जॉइंट्स) दोष असल्याचा दावा करणारा एक फोटो समाजमाध्यमांवर मोठ्या प्रमाणावर व्हायरल होत होता.

पिंपरी : सावित्रीबाई फुले पुणे विद्यापीठ चौकातील दुमजली उड्डाणपुलाच्या बाणेर रॅम्पबाबत समाजमाध्यमांवर पसरलेल्या शंकांना अखेर पूर्णविराम मिळाला आहे. या उड्डाणपुलाच्या संरचनेत कोणतीही तांत्रिक त्रुटी नसून तो वाहतुकीसाठी पूर्णपणे सुरक्षित असल्याचा निर्वाळा पुणे महानगर प्रदेश विकास प्राधिकरण (पीएमआरडीए) प्रशासनाने दिला आहे. उड्डाणपूल वाहतुकीसाठी खुला करण्यापूर्वी सर्व आवश्यक तांत्रिक चाचण्या पूर्ण करण्यात आल्या असून हा पूल तांत्रिकदृष्ट्या सुरक्षित व सक्षम असल्याचेही प्रशासनाने स्पष्ट केले.

गेल्या काही दिवसांपासून या उड्डाणपुलाच्या सांध्यांमध्ये (जॉइंट्स) दोष असल्याचा दावा करणारा एक फोटो समाजमाध्यमांवर मोठ्या प्रमाणावर व्हायरल होत होता. या पार्श्वभूमीवर माजी नगरसेवक सनी निम्हण यांनीही पुलाच्या दर्जाबाबत शंका उपस्थित करत या प्रकरणाची सखोल चौकशी करण्याची मागणी केली होती. तसेच, या कामाचे त्रयस्थ संस्थेमार्फत तांत्रिक ऑडिट करण्याबाबत महानगर आयुक्तांना पत्र दिले होते.

या चर्चेनंतर पीएमआरडीएच्या अभियंत्यांनी संबंधित ठिकाणी प्रत्यक्ष पाहणी केली. तपासणीनंतर प्रशासनाने स्पष्ट केले की, व्हायरल फोटोमध्ये दिसणारा भाग हा पुलाचा मुख्य संरचनात्मक घटक नसून तो केवळ बाहेरील क्रॅश बॅरियरच्या फिनिशिंग आणि रंगकामाशी संबंधित आहे. त्यामुळे या बाबीचा पुलाच्या मजबुती किंवा सुरक्षिततेशी कोणताही संबंध नाही.

पीएमआरडीएच्या अधिकाऱ्यांनी दिलेल्या माहितीनुसार, हा उड्डाणपूल ‘प्री-स्ट्रेस्ड सेगमेंटल’ तंत्रज्ञानाचा वापर करून बांधण्यात आला आहे. या पद्धतीमध्ये विशेष केबल्सच्या साहाय्याने पुलाचा मुख्य भार सांभाळला जातो. त्यामुळे सांध्यांमधील किरकोळ फिनिशिंगचा पुलाच्या आयुष्यावर किंवा सुरक्षिततेवर कोणताही परिणाम होत नाही.

“बाणेर रॅम्पच्या संरचनेत कोणताही दोष नाही. जे त्रुटी असल्याचे दिसत आहे, ते केवळ सौंदर्यीकरणाशी संबंधित आहेत. संबंधित ठेकेदार कंपनीला उर्वरित किरकोळ काम तातडीने पूर्ण करण्याचे आदेश देण्यात आले आहेत,” असेही पीएमआरडीएने स्पष्ट केले. तसेच नागरिकांनी कोणत्याही अफवांवर विश्वास न ठेवता उड्डाणपुलाचा निर्धास्तपणे वापर करावा, असे आवाहनही प्रशासनाने केले आहे.

हेदेखील वाचा : Pune News: राष्ट्रीय विज्ञान दिनानिमित्त ‘विज्ञान स्पर्धां’चे आयोजन; विद्यार्थ्यांना मिळणार अनोखा अनुभव