भाग्यश्री आत्राम यांचा शरद पवार गटात प्रवेश; धर्मरावबाबा आत्राम यांची खेळी की आणखी काही…

माजी राज्यमंत्री अंबरीशराव आत्राम यांनीही निवडणुकीची जोरदार तयारी सुरू केली आहे. शरद पवार गटात प्रवेश करण्याच्या चर्चेत त्यांचेही नाव आघाडीवर होते. पण भाजपकडून तिकीट न मिळाल्यास आपण अपक्ष निवडणूक लढू, असे त्यांनी संकेत दिले आहेत. त्यासाठी त्यांचा जनसंपर्कही सुरू असल्याची चर्चा आहे. 

Photo Credit- Social Media

Follow Us:

Follow Us:

गडचिरोली: मंत्री धर्मरावबाबा आत्राम यांच्या कन्या भाग्यश्री आत्राम यांनी नुकताच शरद पवार यांच्या राष्ट्रवादीत प्रवेश केला. पण यामागे काही खेळी तर नाही ना, अशी चर्चाही राजकीय वर्तुळात सुरू आहे.  पक्षप्रवेशाच्या वेळी शेकडो अधिकारी उपस्थित असतानाही केवळ भाग्यश्री आत्राम यांनीच पक्षप्रवेश केला. विशेषत: शाहीन हकीम या अजित पवार गटाच्या महिला अधिकारी कार्यक्रमस्थळी असूनही त्यांच्या प्रवेशाचा साधा उल्लेखही करण्यात आला नाही.

आश्चर्याची बाब म्हणजे धर्मरावबाबा आत्राम यांची लोकप्रियता असतानाही भाग्यश्री आत्राम यांच्या पक्षप्रवेशाला कार्यक्रमादरम्यान कुठेही विरोधही झाला नाही. सर्व काही ‘ऑल इज वेल’ दिसून आले. याशिवाय भाग्यश्री आत्राम यांनी , ‘हे वडिलांविरुद्धचे खरे बंड आहे, त्यामुळे यावर कुणीही शंका घेऊ नये, असे अनेकदा आपल्या भाषणातूनही स्पष्ट केले, पण वडिलांच्या विरोधात जाऊन शरद पवार यांच्या गटात प्रवेश करताना त्यांना असे स्पष्टीकरण देण्याची गरज का भासली, असाही सवाल उपस्थित होऊ लागला आहे.

हेही वाचा: Delhi New CM : आतिशी होणार दिल्लीचे नवे मुख्यमंत्री, 11 वर्षांनंतर एक महिला राजधानीची कमान सांभाळणार

दरम्यान,  आगामी विधानसभा निवडणुकीसाठी प्रमुख राजकीय पक्षांच्या उमेदवारांची छाननी अंतिम टप्प्यात आहे. अजित पवार गटाकडून अहेरी विधानसभा मतदारसंघासाठी मंत्री धर्मरावबाबा आत्राम यांचे नाव निश्चित झाले आहे. दुसरीकडे शरद पवार गटानेही या विधानसभेवर दावा केला आहे.  पण शरद पवार गटाकडून उमेदवार जाहीर झाल्यास धर्मरावबाबा आत्राम यांच्या अडचणी वाढण्याची शक्यता आहे. पण दुसरीकडे हीच परिस्थिती लक्षात आल्याने मंत्री आत्राम यांनी आपल्या मुलीला शरद पवार यांच्या गोटात प्रवेश करण्यास सांगून  काही राजकीय खेळी तर खेळली नाही ना, असाही संशय व्यक्त केला जात आहे. सध्याच्या राजकीय घडामोडी पाहता अहेरी विधानसभा मतदारसंघातील राजकीय वातावरण चांगलेच तापले आहे.

हेही वाचा: अँटोनी ब्लिंकन गाझा युद्धबंदीच्या मोहिमेवर इजिप्तला पोहोचणार; शांतता करारावर होणार चर्चा

‘तुतारी’साठी दीपक दादाही रिंगणात

दरम्यान, अहेरी विधानसभा मतदारसंघात शरद पवार गटात प्रवेशासाठी इच्छुक आणखी दोन नावे चर्चेत आहेत. यामध्ये माजी आमदार दीपकदादा आत्राम आणि भाजप युवा मोर्चाचे संदीप कोरेट यांचा समावेश आहे. शिवस्वराज्य यात्रेदरम्यान शरद पवार गटाच्या एका नेत्याने दीपक आत्राम यांची भेट घेतली होती. त्यामुळे यावेळी अहेरी विधानसभा मतदारसंघात उमेदवारीवरून राजकीय पक्षांमध्ये चढाओढ होण्याची शक्यताही वर्तवण्यात येत आहे.

दुसरीकडे, अहेरी विधानसभा मतदारसंघ महायुतीत अजित पवार यांच्या गटाकडे मिळण्याची शक्यता आहे. तर  महाविकास आघाडीच्या वतीने काँग्रेस व शरद पवार गटानेही अहेरी विस परिसराची मागणी केली आहे. त्यामुळे शरद पवार गट आणि काँग्रेस नेत्यांकडून दबावतंत्राचा वापर होताना दिसत आहे.

हेही वाचा: जगातील सर्वात महागडा चित्रपट, बनवण्यासाठी लागले 12 वर्ष, सात पिढ्या बसून खातील एवढी

अंबरीशरावांचा पक्षाला इशारा

माजी राज्यमंत्री अंबरीशराव आत्राम यांनीही निवडणुकीची जोरदार तयारी सुरू केली आहे. शरद पवार गटात प्रवेश करण्याच्या चर्चेत त्यांचेही नाव आघाडीवर होते. पण भाजपकडून तिकीट न मिळाल्यास आपण अपक्ष निवडणूक लढू, असे त्यांनी संकेत दिले आहेत. त्यासाठी त्यांचा जनसंपर्कही सुरू असल्याची चर्चा आहे.

धर्मरावबाबा आत्राम, भाग्यश्री आत्राम, अंबरीशराव आत्राम आणि दीपक दादा आत्राम, हे चार ‘आत्राम’ आगामी विधानसभा निवडणुकीत अहेरी विधानसभा मतदारसंघात मैदानात उतरणार आहेत. त्याचबरोबर काँग्रेसकडून हनुमंतू मडावी यांच्या नावाचीही चर्चा आहे. मात्र ही जागा महाविकास आघाडीने शरद पवार गटाच्या छावणीत गेल्यास हनुमंतू मडावी अपक्ष म्हणून निवडणूक लढवण्याची शक्यता आहे.

Web Title: What is the politics behind bhagyashree atrams entry into sharad pawar group nras

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com