(फोटो सौजन्य - x अकाउंट)
कलर्स मराठीवरील ‘सुंदरा मनामध्ये भरली’ ही मालिका २०२० मध्ये सुरू झाली. या मालिकेला प्रेक्षकांचे भरभरून प्रेम मिळाले आणि ही मालिका प्रत्येकाच्या घराघरात पोहचली. आणि तब्बल ९८१ भागांनंतर २०२३ मध्ये ही मालिका संपली. त्या मालिकेतील लतिका ही भूमिका अक्षयासाठी केवळ एक पात्र नव्हतं, तर तिचं आयुष्यच होतं. त्या मालिकेनं तिला प्रसिद्धीच्या झोतात आणलं आणि मालिकेनंतर अक्षयानं थोडी विश्रांती घेतली. त्या काळात तिने अभिनयापासून दूर राहून स्वतःला वेळ दिला, स्वतःच्या आतल्या कलाकाराला समजून घेतलं. स्वतःवर काम केलं आणि आता अभिनेत्री पुन्हा एकदा छोट्या पडद्यावर पदार्पण करण्यासाठी सज्ज झाली आहे.
‘सन मराठी’वरील ‘कॉन्स्टेबल मंजू’ ही मालिका सध्या प्रेक्षकांची लाडकी ठरत आहे. सत्याच्या आणि मंजूच्या लग्नानंतर त्यांच्या आयुष्यात संकटांची मालिकाच सुरु झाली आहे. निवडणुकीत सत्याचा विजय झाल्यानंतर मुकादमला मारहाण केल्याप्रकरणी त्याच्यावर गुन्हा दाखल होतो. या पार्श्वभूमीवर आता मालिकेत एका नव्या पात्राची एन्ट्री झाली आहे. सरकारी वकील म्हणून अभिनेत्री अक्षया नाईक झळकणार आहे. मंजू सत्याचा जामीन मिळवण्यासाठी धडपडत असतानाच सरकारी वकील समोर आल्यानंतर न्यायालयात काय निकाल लागेल, हे पाहणं अत्यंत रंजक ठरणार आहे. यापूर्वी अभिनेत्री अक्षया नाईकने सोज्वळ भूमिका साकारत प्रेक्षकांच्या मनात घर केलं आहे पण आता या मालिकेतून अक्षया पहिल्यांदाच खलनायिकेची भूमिका साकारताना पाहायला मिळत आहे.
अभिनेत्रीला या भूमिकेत पाहण्यासाठी चाहते उत्सुक आहेत. तसेच ‘कॉन्स्टेबल मंजू’ या मालिकेला प्रेक्षक भरभरून प्रेम देत असताना अक्षयाची एन्ट्रीने चाहत्यांचा मन जिंकलं आहे. अभिनेत्रीला नव्या भूमिकेत पाहून या मालिकेची कथा आणखी मनोरंजक होणार आहे.
‘कौन बनेगा करोडपती’शो ला २५ वर्षे पूर्ण, अमिताभ बच्चन यांनी शेअर केली खास पोस्ट…
नव्या भूमिकेबद्दल अक्षया नाईक म्हणाली, ‘कॉन्स्टेबल मंजू’ या लोकप्रिय मालिकेत मी नवीन भूमिका साकारणार आहे. जवळपास २ वर्षांनी पुन्हा छोट्या पडद्यावर कमबॅक करत आहे या गोष्टीचा प्रचंड आनंद होत आहे. आतापर्यंत मी कधीच खलनायिकेची भूमिका साकारली नव्हती पण आता अक्षया नव्याने प्रेक्षकांच्या समोर येणार आहे. मालिकेत सरकारी वकिलाची भूमिका साकारणार आहे. माझ्या आईला वकील व्हायचं होतं आणि या मालिकेनिमित्त मी आईच स्वप्न पूर्ण केलं असं वाटतंय. पहिल्यांदाच सातारा मध्ये शूट करत आहे त्यामुळे उत्सुकता खूप वाढली आहे. अक्षया खलनायिकेची भूमिका साकारू शकते हा विश्वास प्रोडक्शन आणि चॅनेलने दाखवला त्या बद्दल त्यांचे मनापासून आभार मानते.”
