'फिरवलं फिरवलं लिंबू...', अमेय वाघसोबत थिरकणार गौतमी पाटील; पाहा Video
Amey Wagh And Gautami Patil Upcoming Song : महाराष्ट्राची प्रसिद्ध नृत्यांगणा गौतमी पाटील हिची प्रसिद्धी कायम आहे. तिने आपल्या खास अंदाजातील अदाकारीने आणि कातील अंदाजाच्या माध्यमातून महाराष्ट्रातल्या लाखो तरुणांच्या जीवावर राज्य केले आहे. कायमच कोणत्या ना कोणत्या कारणामुळे चर्चेत राहणारी गौतमी आता तिच्या डान्समुळे चर्चेत आली आहे. ‘घुंगरू’ चित्रपटानंतर आता गौतमी पाटील ‘लाईक आणि सबस्क्राईब’ या चित्रपटाच्या माध्यमातून प्रेक्षकांच्या भेटीला येणार आहे. नुकताच तिचं चित्रपटातलं एक नवं कोरं गाणं रिलीज झालं असून तिच्यासोबत अभिनेता अमेय वाघ सुद्धा दिसणार आहे.
गेल्या काही दिवसांपूर्वी अमेय वाघसोबत पाठमोऱ्या उभ्या असणाऱ्या एका तरुणीचा फोटो सोशल मीडियावर व्हायरल झाला होता. तेव्हापासूनच ही तरुणी कोण, याची सर्वत्र चर्चा रंगली होती. अखेर या गोष्टीवरून पडदा उठला असून ती तरुणी दुसरी तिसरी कोणी नसून महाराष्ट्राची लाडकी नृत्यांगना गौतमी पाटील आहे. अमेय वाघ आणि गौतमीचं ‘लिंबू फिरवलंय’ हे गाणं नुकतंच रिलीज झालं आहे. ‘लिंबू फिरवलंय’ ह्या गाण्याला क्षितिज पटवर्धन यांचे बोल लाभले असून अमितराज यांचे जबरदस्त संगीत लाभले आहे. तर वैशाली सामंत आणि रवींद्र खोमणे यांनी आपल्या ठसकेबाज आवाजात हे गाणे गायले आहे. तर, ‘लिंबू फिरवलंय’ ह्या गाण्याचे नृत्यदिग्दर्शन राहुल ठोंबरे यांनी केले आहे.
प्रत्येकाला ठेका धरायला लावणारे हे गाणे ऐकायला जितके जल्लोषमय आहे, तितकेच ते पाहायलाही कमाल आहे. ‘लिंबू फिरवलंय’ या गाण्याच्या निमित्ताने गौतमी पाटील पहिल्यांदाच रुपेरी पडद्यावर तिचा जलवा दाखवणार आहे. त्यामुळे आपल्या नखरेल अदाकारांनी घायाळ करणारी गौतमी पाटील या गाण्यातून संपूर्ण महाराष्ट्रावर लिंबू फिरवणार आहे, असे म्हणायला हरकत नाही.
गाण्याविषयी दिग्दर्शक अभिषेक मेरुकर म्हणतात, “चित्रपटात एक तरी धमाल गाणं असावंच असा अट्टाहास असल्यामुळे ‘लिंबू फिरवलंय’ हे दमदार गाणे आम्ही प्रेक्षकांसाठी घेऊन आलो आहोत. तुफान वाजणारं हे गाणं अतिशय कमाल चित्रित करण्यात आले आहे. संगीत टीम आणि नृत्य दिग्दर्शनाची या गाण्याच्या माध्यमातून चांगलीच भट्टी जमून आली आहे. त्यातल्या त्यात गौतमी पाटीलचा ठसकेबाज परफॉर्मन्स म्हणजे, गाण्याला अधिकच रंगत आणतो. त्यामुळे पुढे हे गाणे प्रत्येक समारंभात नक्की वाजेल, याची खात्री आहे.”
हे देखील वाचा – ‘क्योंकि सास भी कभी बहू थी’ फेम अभिनेत्याचे निधन, विकास सेठीचा ४८ व्या वर्षी मृत्यू
नितीन वैद्य प्रॉडक्शन्स प्रस्तुत, एस. एन. प्रॉडक्शन्स एलएलपी आणि अभिषेक मेरुकर प्रॉडक्शन्स यांच्या सहकार्याने प्रदर्शित होणाऱ्या या चित्रपटाचे नितीन प्रकाश वैद्य, अभिषेक मेरूकर निर्माते असून लेखन आणि दिग्दर्शनही अभिषेक मेरूकर यांनी केले आहे. ‘लाईक आणि सबस्क्राईब’मध्ये अमेय वाघ, अमृता खानविलकर, जुई भागवत, शुभंकर तावडे, विठ्ठल काळे यांच्या प्रमुख भूमिका असून येत्या १८ ऑक्टोबर रोजी हा चित्रपट प्रदर्शित होणार आहे.
