रविवार, 4 ऑक्टोबर 2026
कामाच्या धावपळीमध्ये शरीराची काळजी घेण्यासाठी जास्त वेळ मिळत नाही. आहारात होणारे बदल, झोपेच्या चुकीच्या वेळा, पोषक घटकांची कमतरता आणि मानसिक तणाव वाढल्यानंतर शारीरिक आरोग्यावर लगेच परिणाम होतो. शरीरात थकवा, अशक्तपणा वाढल्यानंतर काहीच करण्याची अजिबात इच्छा होत नाही. मॅग्नेशियमची पातळी कमी झाल्यानंतर वारंवार स्नायूंचे पेटके, रात्रीच्या वेळी झोप न लागणे इत्यादी लक्षणे दिसू लागतात. या सर्व समस्यांपासून आराम मिळवण्यासाठी आहारात या पौष्टिक पदार्थांचे सेवन करावे. या पदार्थांच्या सेवनामुळे थकवा, अशक्तपणा कमी होईल आणि शरीराला आवश्यक पोषण मिळेल. (फोटो सौजन्य – istock)
नेहमी थकल्यासारखे आणि अशक्तपणा आल्यासारखे वाटते? मग आहारात करा 'या' पदार्थांचा समावेश
पालक, मेथी, मोहरी आणि राजगिरा यांसारख्या हिरव्या पालेभाज्यांमध्ये मॅग्नेशियम असते. त्यामुळे आठवड्यातून एकदा किंवा दोनदा आहारात पालेभाज्यांचा समावेश करावा. भाज्यांचे सूप, सॅलड किंवा भाजी बनवून सुद्धा खाऊ शकता.
वर्षाच्या बाराही महिने बाजारात केळी उपलब्ध असतात. केळ्यामध्ये केवळ मॅग्नेशियमच नाही तर पोटॅशियमदेखील आढळून येते. त्यामुळे सकाळच्या नाश्त्यात नियमित दोन केळी खावीत.
बदाम, काजू, अक्रोड, तसेच भोपळ्याच्या आणि सूर्यफुलाच्या बिया इत्यादी बियांमध्ये फॅट्स, प्रथिने आणि फायबर, मॅग्नेशियम असते. ज्यामुळे हृदयाचे आरोग्य चांगले राहण्यास मदत होते.
रोजच्या आहारात चणे, राजमा, चवळी, मसूर आणि मूग इत्यादी पदार्थांचा समावेश करावा. यामध्ये असलेल्या प्रथिने आणि फायबरमुळे पचनक्रिया सुरळित चालू राहते.
गोड पदार्थ खाण्याची ईच्छा झाल्यास डार्क चॉकलेट खावे. यामध्ये मॅग्नेशियम आणि अनेक अँटीऑक्सिडंट्स असतात. हृदयाच्या आणि मेंदूच्या आरोग्यासाठी डार्क चाॅकलेट खाणे फायदेशीर ठरते.
