Diwali Sugar Free Sweets Recipes: मधुमेहींसाठी यंदाची दिवाळी गोड! साखरेशिवाय बनवा स्वादिष्ट मिठाई; पाहा सोप्या रेसिपी

नारळाचे लाडू हे लाडू बनवायला सगळ्यात सोपे आहेत.आधी एका भांड्यात थोडं दूध गरम करून बाजूला ठेवा. आता कढईत दोन चमचे तूप टाका. त्यात किसलेलं खोबरं टाकून छान खरपूस भाजून घ्या. खोबरं भाजलं की त्यात किसलेला गूळ टाका आणि सतत ढवळत रहा. गूळ पूर्ण विरघळला की त्यात वेलची पूड आणि चिरलेले बदाम टाका.गॅस बंद करा. मिश्रण थोडं कोमट झालं की हाताला थोडं तूप लावा आणि छोटे छोटे लाडू वळा. झाले तयार. घरभर वास सुटेल.

शाही बर्फी नाव शाही आहे पण बनवायला एकदम सोपी.बदाम, अक्रोड, काजू, अंजीर आणि खजूर हे सगळं मिक्सरमध्ये बारीक करून घ्या. आता कढईत थोडं तूप गरम करा. त्यात अंजीर आणि खजूर टाकून थोडा वेळ शिजवा. मग त्यात बारीक केलेला सुकामेवा टाकून सगळं एकत्र करा.हे मिश्रण तूप लावलेल्या ताटात पसरवा. थंड झाल्यावर त्याच्या चौकोनी वड्या कापा. ही बर्फी खायला तर भारी लागते, शिवाय ताकद पण देते.

मूग डाळ हलवा थंडीच्या दिवसात गरम गरम हलवा खायला कोणाला आवडणार नाही?आधी मूग डाळ 2-3 तास भिजवून वाटून घ्या. कढईत तूप गरम करा आणि त्यात ही वाटलेली डाळ टाका. मंद आचेवर डाळ छान भाजून घ्या, घाई करू नका. डाळ भाजली की त्यात थोडं पाणी टाकून शिजू द्या. डाळ मऊ झाली की त्यात गूळ टाका आणि नीट मिक्स करा.शेवटी वरून बदाम, बेदाणे, काजू, मखाना आणि अक्रोड टाका. गरम गरम हलवा खायला तयार.

खजूर पेडा खजूर म्हणजे साखरेचा नैसर्गिक पर्याय.आधी खजुरातल्या बिया काढून घ्या आणि मिक्सरमध्ये बारीक पेस्ट करा. कढईत तूप गरम करून त्यात ही पेस्ट टाका. मंद आचेवर भाजत रहा. पेस्ट थोडी घट्ट झाली की त्यात चिरलेले बदाम, पिस्ता, काजू, अक्रोड टाका.मिश्रण थंड झालं की त्याचे छोटे गोळे करा आणि पेढ्याचा आकार द्या. वरून एखादा पिस्ता लावा म्हणजे दिसायला पण छान दिसेल.

दुधीचा हलवा म्हटलं की नाक मुरडणारे पण खूप असतात, पण हा हलवा खाल्ला की परत मागतील.कढईत तूप गरम करा, त्यात किसलेला दुधी भोपळा टाका. त्यात दूध टाकून भोपळा छान शिजवून घ्या. भोपळा शिजला की त्यात खवा आणि गूळ टाका आणि सतत ढवळत रहा. सगळं पाणी आटलं की वरून आवडीचा सुकामेवा टाका.

या दिवाळीत असं करू नका की डायबिटीस आहे म्हणून गोडच खायचं नाही. थोडं प्रमाणात, योग्य पदार्थ खाल्ले तर सणाचा आनंद सगळ्यांना घेता येतो. पण एक गोष्ट लक्षात ठेवा, गूळ आणि खजूर जरी नैसर्गिक असले तरी ते पण जास्त खाऊ नका. डॉक्टरांना विचारूनच खा.या दिवाळीत तुम्ही कोणती मिठाई बनवणार आहात?