बारामती पोटनिवडणुकीसाठी प्रशासन सज्ज; मतदान केंद्रांवरील सुविधांकडे दिलं जातंय लक्ष

निवडणूक प्रक्रिया पारदर्शक, शांततापूर्ण व निर्भय वातावरणात पार पाडण्यासाठी सर्व अधिकारी व कर्मचाऱ्यांनी समन्वयाने काम करावे, तसेच सोपवलेली जबाबदारी चोखपणे पार पाडावी, असे निर्देश त्यांनी दिले.

पुणे : बारामती विधानसभा पोटनिवडणूक २०२६ च्या पार्श्वभूमीवर नियुक्त नोडल अधिकारी व क्षेत्रीय अधिकाऱ्यांना निवडणूक कामकाजाबाबत मार्गदर्शन करण्यात आले. निवडणूक निर्णय अधिकारी तथा उपविभागीय अधिकारी उत्तम दिघे यांनी नव्या प्रशासकीय भवनातील सभागृहात आढावा बैठक घेऊन आवश्यक सूचना दिल्या.

निवडणूक प्रक्रिया पारदर्शक, शांततापूर्ण व निर्भय वातावरणात पार पाडण्यासाठी सर्व अधिकारी व कर्मचाऱ्यांनी समन्वयाने काम करावे, तसेच सोपवलेली जबाबदारी चोखपणे पार पाडावी, असे निर्देश त्यांनी दिले. आदर्श आचारसंहितेची काटेकोर अंमलबजावणी आणि कायदा-सुव्यवस्था अबाधित ठेवण्यावर विशेष भर देण्यात आला. नियंत्रण कक्ष २४ तास कार्यरत असून, प्राप्त तक्रारींची तात्काळ नोंद घेऊन त्यांचे निवारण करावे. ‘सी-व्हिजिल’ ॲपवरील तक्रारींवर १०० मिनिटांत कारवाई करण्याचे निर्देशही देण्यात आले. राजकीय पक्षांच्या सभा, रॅली व फलकांसाठी एकखिडकी कक्षातून परवानग्या देताना आवश्यक कागदपत्रांची तपासणी करावी, असेही सांगण्यात आले.

परिवहन विभागाने वाहनांची तपासणी करताना आचारसंहितेचा भंग होणार नाही, याची दक्षता घ्यावी. तसेच एसएसटी, एफएसटी, नियंत्रण कक्ष व एक खिडकी कक्षातील नोडल अधिकाऱ्यांना त्यांच्या जबाबदाऱ्यांबाबत विशेष सूचना देण्यात आल्या.

मतदान केंद्रांवरील सुविधांकडे लक्ष

मतदान केंद्रांवर मतदारांना कोणताही अडथळा निर्माण होऊ नये, यासाठी आवश्यक सुविधा उपलब्ध करून देण्यावर भर देण्यात आला. केंद्रांवर फर्निचर, रॅम्प, वीज, पिण्याचे पाणी, शौचालय यांसह स्वच्छतेची योग्य व्यवस्था असल्याची खात्री करण्याच्या सूचना देण्यात आल्या. या बैठकीस सहाय्यक निवडणूक निर्णय अधिकारी तथा तहसीलदार स्वप्नील रावडे, गटविकास अधिकारी किशोर माने यांच्यासह विविध विभागांचे नोडल अधिकारी व क्षेत्रीय अधिकारी उपस्थित होते.

दोन्ही मतदारसंघांत निवडणूक लढवण्याचा काँग्रेसचा निर्धार

बारामती आणि राहुरी विधानसभा पोटनिवडणुकांच्या पार्श्वभूमीवर काँग्रेसने दोन्ही मतदारसंघांत निवडणूक लढवण्याचा निर्धार केला आहे. पक्षश्रेष्ठींकडून यासाठी हिरवा कंदील मिळाल्याची माहिती समोर आली असून, महाविकास आघाडीत तणाव वाढण्याची शक्यता व्यक्त केली जात आहे.

हेदेखील वाचा : बारामती पोटनिवडणुकीवरून राजकारण चांगलंच तापणार; महाविकास आघाडीत फूट पडणार? आता अंतिम निर्णय…