“राज ठाकरे मुख्यमंत्री व्हावेत”; अमित ठाकरेंची गणरायाकडे इच्छा
मनसे अध्यक्ष राज ठाकरे यांच्या राजकीय भूमिकांबरोबरच आता त्यांचे पुत्र अमित ठाकरे यांचं एक वक्तव्य चर्चेत आलं आहे. पुणे दौऱ्यावर असताना अमित ठाकरेंनी गणरायाकडे आपण काय साकडं घातलं, याबाबत भाष्य केलं. राज ठाकरे महाराष्ट्राचे मुख्यमंत्री व्हावेत, अशी आपली इच्छा असल्याचं अमित ठाकरेंनी सांगितलं.
अमित ठाकरे यांनी राज ठाकरेंच्या कामाचा दाखला देताना त्यांच्या नेतृत्वक्षमतेवर विश्वास व्यक्त केला. “राज ठाकरे यांच्यासारखा माणूस मुख्यमंत्रिपदावर असावा. मला माहिती आहे तो माणूस काय काम करू शकतो. त्यांनी नाशिक शहरात खूप काम केलं आहे. ते नाशिक शहरात एवढं काम करू शकत असतील, तर राज्यासाठीही खूप काही करू शकतात,” असं अमित ठाकरे म्हणाले.
राज्यात सध्या अनेक प्रश्न निर्माण झाले आहेत, असं सांगत अमित ठाकरेंनी पेपरफुटी, शेतकऱ्यांच्या आत्महत्या आणि रेल्वे प्रवाशांच्या सुरक्षेचा मुद्दा उपस्थित केला. या प्रश्नांवर राज ठाकरे काम करू शकतात, असा विश्वास त्यांनी व्यक्त केला. त्यांचं हे वक्तव्य सध्या राजकीय वर्तुळात चर्चेचा विषय ठरत आहे.
दरम्यान, पुण्यातील एका सरकारी तंत्रनिकेतन महाविद्यालयातील पंतप्रधान नरेंद्र मोदी यांच्या फोटोवरून अमित ठाकरे याआधीच चर्चेत आले होते. महाविद्यालयाच्या कार्यालयात छत्रपती शिवाजी महाराजांच्या फोटोशेजारी लावलेला मोदींचा फोटो हटवण्यात आल्याच्या घटनेनंतर त्यांच्यासह काही मनसे कार्यकर्त्यांवर पोलिसांनी गुन्हा दाखल केला होता.
राज्यात पावसाचा खंड पडल्याने अनेक भागांतील शेतकरी अडचणीत आहेत. याच पार्श्वभूमीवर दुष्काळ आढावा बैठकीत खासदारांना काजू-बदाम देण्यात आल्याच्या मुद्द्यावरूनही अमित ठाकरेंनी सरकारला टोला लगावला.
“तुम्ही अन्न खायचं बंद करा, असं आमचं मत नाही. तुम्हाला काय खायचं ते खा. पण जनतेचे प्रश्न सोडवा. रुममध्ये बसून तुम्हाला शेतकऱ्यांचे प्रश्न समजणार नाहीत. शेतकऱ्यांच्या घरात जा,” असा सल्ला अमित ठाकरेंनी दिला.
त्यामुळे एका बाजूला राज ठाकरेंच्या मुख्यमंत्रिपदाची इच्छा व्यक्त करणारे अमित ठाकरे आणि दुसऱ्या बाजूला शेतकरी प्रश्नावर सरकारला थेट सवाल करणारे त्यांचे वक्तव्य, यामुळे त्यांच्या पुणे दौऱ्याची राजकीय चर्चा रंगली आहे.
.png "Videos"){kind=small}
