Baramati by election : “अजितदादाच ही निवडणूक लढवतायेत असं…; सुनेत्रा काकींसाठी रोहित पवारांची भावनिक साद

बारामती विधानसभा मतदारसंघाची पोटनिवडणूक होणार असून यासाठी सुनेत्रा पवार अर्ज दाखल करणार आहे. यासाठी रोहित पवारांनी भावनिक पोस्ट केली आहे.

• बारामतीमध्ये पोटनिवडणूकीची तयारी
• सुनेत्रा पवार यांनी पोटनिवडणुकीसाठी दाखल करणार अर्ज
• रोहित पवार यांची सुनेत्रा पवारांसाठी भावनिक पोस्ट

Baramati By election : बारामती : दिवंगत नेते अजित पवारांच्या निधनानंतर बारामती विधानसभा मतदारसंघाची पोटनिवडणूक जाहीर झाली आहे. बारामतीमध्ये बिनविरोध निवडणूक करण्याचा राष्ट्रवादी अजित पवार गटाचा प्रयत्न आहे. अजित पवारांच्या अपघाती निधनानंतर ही निवडणूक बिनविरोधी होईल अशी अपेक्षा व्यक्त केली जात होती. मात्र काँग्रेस पक्षाने उमेदवार जाहीर करत बारामतीमध्ये निवडणूक लढवण्याचा निर्णय घेतला आहे. यानंतर आता आमदार रोहित पवार (Rohit Pawar) यांनी त्यांच्या काकी उपमुख्यमंत्री सुनेत्रा पवारांसाठी (Sunetra Pawar) भावनिक पोस्ट लिहिली आहे.

 

पोटनिवडणुकीसाठी उपमुख्यमंत्री सुनेत्रा पवार उमेदवारी अर्ज दाखल करणार आहेत. अर्ज दाखल करण्यापूर्वी त्यांनी पार्थ पवार आणि जय पवार यांच्यासह देवदर्शन घेतले. गणरायाच्या दर्शनाने सुनेत्रा पवार यांनी नवीन राजकीय प्रवासाला सुरुवात केली आहे. अजित पवारांनंतर होणाऱ्या या पोटनिवडणुकीला दुःखाची एक किनार आहे. यामुळे बारामतीसह संपूर्ण महाराष्ट्रामध्ये एक भावनिक वातावरण निर्माण झाले आहे. यानंतर आता आमदार रोहित पवार यांनी एक्स या सोशल मीडियावर पोस्ट करुन बारामतीकरांना भावनिक आवाहन केले आहे.

हे देखील वाचा : सुनेत्रा पवार सोमवारी भरणार उमेदवारी अर्ज; मुख्यमंत्र्यांसह राष्ट्रवादीच्या वरिष्ठ नेत्यांची उपस्थित

काय आहे रोहित पवारांची पोस्ट?

आमदार रोहित पवार यांनी बारामती पोटनिवडणुकीवर खास पोस्ट लिहिली आहे. त्यांनी लिहिले आहे की, बारामती विधानसभा मतदारसंघात होणाऱ्या पोटनिवडणुकीसाठी मा. सुनेत्राकाकी आज उमेदवारी अर्ज दाखल करतायेत. ही निवडणूक बिनविरोध व्हावी अशी आमच्या सर्वांची इच्छा आहे, त्यामुळं उमेदवारी अर्ज भरणाऱ्या इतरांना आणि त्यांच्या पक्षालाही ही निवडणूक बिनविरोध करण्याची आमची विनंती आहे आणि ते मान्य करतील असा विश्वास आहे, परंतु तसं झालं नाही तर आजही अजितदादाच ही निवडणूक लढवत आहेत, असं समजून बारामतीकरांनी सुनेत्राकाकींना विक्रमी मताधिक्याने निवडून द्यावं, असं आवाहन करतो! तुमचं एक मत हीच अजितदादांना खऱ्या अर्थाने श्रद्धांजली ठरेल..! असे भावनिक आवाहन रोहित पवार यांनी बारामतीकरांना केले आहे.

See more

बारामती विधानसभा मतदारसंघात होणाऱ्या पोटनिवडणुकीसाठी मा. सुनेत्राकाकी आज उमेदवारी अर्ज दाखल करतायेत. ही निवडणूक बिनविरोध व्हावी अशी आमच्या सर्वांची इच्छा आहे, त्यामुळं उमेदवारी अर्ज भरणाऱ्या इतरांना आणि त्यांच्या पक्षालाही ही निवडणूक बिनविरोध करण्याची आमची विनंती आहे आणि ते मान्य… pic.twitter.com/wUXsMsQusF — Rohit Pawar (@RRPSpeaks) April 6, 2026

हे देखील वाचा : शेवटच्या निर्णायक क्षणी सुनेत्रा पवारांचा राजकीय डाव; बारामतीसाठी सुनेत्रा पवारांचा थेट काँग्रेस प्रदेशाध्यांना फोन

बारामती पोटनिवडणूक ही बिनविरोध व्हावी यासाठी सुनेत्रा पवार यांनी उद्धव ठाकरे आणि काँग्रेसचे प्रदेशाध्यक्ष हर्षवर्धन सपकाळ यांना फोन करुन पाठिंबा देण्याची विनंती केली होती. मात्र, तरीही काँग्रेसने रविवारी दिल्लीतून बारामती पोटनिवडणुकीतील उमेदवाराचे नाव जाहीर केले. काँग्रेसकडून आकाश मोरे यांना सुनेत्रा पवार यांच्याविरोधात रिंगणात उतरवण्यात आले आहे. त्यामुळे बारामतीची निवडणूक ही बिनविरोध होणार नसल्याचे स्पष्ट झाले आहे.