भाजपमध्येच पवारविरोधी गट सक्रिय राजकीय संघर्ष वाढण्याची शक्यता (संग्रहित फोटो)
मुंबई : राज्याचे तत्कालीन उपमुख्यमंत्री आणि बारामती विधानसभा मतदारसंघाचे आमदार अजित पवार यांचे विमान अपघातात निधन झाले. त्यामुळे या रिक्त झालेल्या जागेवर पोटनिवडणूक झाली आहे. बारामती विधानसभेची पोटनिवडणूक जाहीर होताच राज्यातील राजकारण तापले आहे. मुख्यमंत्री देवेंद्र फडणवीस यांनी बारामती आणि राहुरी येथील पोटनिवडणुका बिनविरोध करण्याचे आवाहन केले. मात्र, एका सरकारी वैद्यकीय महाविद्यालयाच्या नामकरणावरून निर्माण झालेल्या वादाने या आवाहनावर प्रश्नचिन्ह उभे केले आहे.
‘पुण्यश्लोक अहिल्यादेवी होळकर शासकीय वैद्यकीय महाविद्यालया’चे नाव बदलून त्याला अजित पवार यांचे नाव देण्याच्या निर्णयामुळे धनगर समाजात संताप वाढला आहे. विविध संघटनांनी याला अहिल्यादेवींच्या वारशाचा अपमान असल्याचे सांगत विरोध दर्शवला. यामुळे बिनविरोध निवडणुकीची शक्यता मावळताना दिसत आहे. याच काळात भाजपमधील पवार-विरोधी गटही सक्रिय झाला आहे. भाजप आमदार गोपीचंद पडळकर या घडामोडीत महत्त्वाची भूमिका बजावू शकतात. पडळकर स्वतः निवडणूक लढवणार नसले तरी, धनगर समाजाच्या एखाद्या स्वतंत्र उमेदवाराला पाठिंबा देऊन सुनेत्रा पवार यांच्यासमोर आव्हान उभे करू शकतात. बारामतीत धनगर मतदारांची संख्या १५ ते २० टक्के असल्याने राजकीय समीकरणे बदलू शकतात.
हेदेखील वाचा : Baramati by-election : “वास्तव हे कल्पनेपेक्षाही अधिक भयंकर…; बारामती पोटनिवडणूकीवर रोहित पवारांची भावनिक पोस्ट
धनगर समाजाच्या नाराजीमुळे बारामतीची पोटनिवडणूक त्रिकोणी किंवा बहुकोणी होण्याची शक्यता आहे. सुनेत्रा पवार प्रबळ उमेदवार मानल्या जात असल्या, तरी विरोध वाढल्यास विजयाचा फरक कमी होऊ शकतो. उमेदवारी अर्ज भरण्याची अंतिम तारीख जवळ येत असताना बारामतीतील राजकीय हालचाली अधिक वेगवान होण्याची चिन्हे आहेत.
सुनेत्रा पवारांविरुद्ध उमेदवार नाही
राष्ट्रवादी काँग्रेस (शरद पवार गट) च्या कार्याध्यक्षा सुप्रिया सुळे यांनी स्पष्ट केले आहे की, त्यांचा पक्ष बारामती विधानसभेच्या पोटनिवडणुकीत सुनेत्रा पवार यांच्याविरोधात उमेदवार उभा करणार नाही. निवडणूक आयोगाने जाहीर केल्यानुसार, बारामती आणि राहुरी येथे २३ एप्रिल रोजी मतदान होणार आहे. अजित पवार यांच्या निधनामुळे बारामतीची जागा रिक्त झाली असून, तिथून सुनेत्रा पवार निवडणूक लढवण्याची शक्यता आहे.
राहुरीच्या जागेबाबत लवकरच निर्णय घेणार
सुप्रिया सुळे दिल्लीत पत्रकारांशी बोलताना म्हणाल्या, मी आधीच स्पष्ट केले आहे की, राष्ट्रवादी (शरद पवार) पक्ष बारामतीची पोटनिवडणूक लढणार नाही. आम्ही सुनेत्रा वहिनींच्या विरोधात उमेदवार देणार नाही. राहुरीच्या जागेबाबत महाविकास आघाडीतील मित्रपक्षांशी चर्चा करून येत्या काही दिवसांत निर्णय घेतला जाईल, असेही त्यांनी सांगितले.
