Chiplun च्या भाजप तालुकाध्यक्षांचा तडकाफडकी राजीनामा; जिल्ह्यातील नेतृत्त्वावर व्यक्त केली नाराजी
चिपळूण (Chiplun) भाजपचे ग्रामीण तालुकाध्यक्ष उदय घाग यांनी जिल्ह्यातील पक्ष नेतृत्वावर तीव्र नाराजी व्यक्त करत आपल्या पदाचा राजीनामा दिल्याने मोठी खळबळ उडाली आहे. भाजप जिल्हाध्यक्ष सतीश मोरे यांच्याकडे त्यांनी हा राजीनामा सुपूर्द केला. आता या राजीनाम्यावर जिल्हाध्यक्ष कोणता निर्णय घेतात हे पाहणे महत्त्वाचे ठरणार आहे.
घाग यांनी दिलेल्या दिलेल्या राजीनामापत्रात गेल्या काही काळापासून पक्ष संघटनेमध्ये काम करत असताना माझ्या पदाची व जबाबदारीची अपेक्षित दखल घेतली जात नसल्याची भावना निर्माण झाल्याचा स्पष्ट उल्लेख केला आहे.
घाग आपल्या राजीनामा पत्रात म्हणतात की, पक्षाच्या संघटनात्मक कामामध्ये प्रामाणिकपणे वेळ देऊन, कार्यकर्त्यांना सोबत घेऊन काम करण्याचा मी सातत्याने प्रयत्न केला. मात्र काही निर्णयप्रक्रिया व संघटनात्मक बाबींमध्ये स्थानिक पदाधिकारी व कार्यकर्त्यांच्या मतांना अपेक्षित महत्त्व मिळत नसल्यामुळे माझ्या मनात तीव्र नाराजी निर्माण झाल्याचे त्यांनी स्पष्टपणे त्यात नमूद केले आहे.
पक्षाच्या हितासाठी अनेक वेळा परिस्थितीशी जुळवून घेत काम केले; मात्र सध्याच्या परिस्थितीत तालुकाअध्यक्ष म्हणून माझ्या जबाबदाऱ्या प्रभावीपणे पार पाडणे मला योग्य वाटत नाही. त्यामुळे मी भारतीय जनता पक्षाच्या तालुका अध्यक्ष, चिपळूण पश्चिम या पदाचा राजीनामा स्वेच्छेने सादर करीत आहे.
माझा हा निर्णय कोणत्याही वैयक्तिक स्वार्थातून नसून, पक्ष संघटनेतील सध्याच्या परिस्थितीबद्दलची माझी नाराजी आणि मनातील खंत व्यक्त करण्यासाठी घेतलेला आहे. पक्षाने या बाबींचा गांभीर्याने विचार करावा, अशी अपेक्षा उदय घाग यांनी आपल्या राजीनामा पत्रात व्यक्त केली आहे.
पक्षाने आजपर्यंत माझ्यावर दाखविलेला विश्वास, तसेच सर्व वरिष्ठ नेते, पदाधिकारी आणि कार्यकर्त्यांनी दिलेले सहकार्य याबद्दल मी मनःपूर्वक आभारी असल्याचेही त्यांनी म्हटल आहे. माझा राजीनामा स्वीकारून मला सदर पदाच्या जबाबदारीतून मुक्त करावे अशी ही विनंती या राजीनामा पत्रात करण्यात आली आहे.
.png "Videos"){kind=small}
