‘माय मरो पण मावशी जगो!’; फडणवीसांच्या ‘मराठी आई, हिंदी मावशी’ विधानावर अंबादास दानवेंचा खोचक टोला

मराठी माझी आई तर हिंदी माझी मावशी’ या मुख्यमंत्री देवेंद्र फडणवीस यांच्या वक्तव्यावरून राजकीय वातावरण तापलं आहे. अंबादास दानवेंनी ‘माय मरो पण मावशी जगो’ म्हणत फडणवीसांना टोला लगावला.

• ‘मराठी माझी आई, हिंदी माझी मावशी’; फडणवीसांचं भाषाविषयक वक्तव्य
• ‘माय मरो पण मावशी जगो’; अंबादास दानवेंचा खोचक टोला
• अमित शाहांच्या उपस्थितीत हिंदी दिवसाच्या कार्यक्रमात फडणवीसांचं भाषण

 

मुख्यमंत्री देवेंद्र फडणवीस यांनी मराठी आणि हिंदी भाषेबाबत केलेल्या वक्तव्यावरून महाराष्ट्राच्या राजकारणात पुन्हा एकदा भाषेचा मुद्दा चर्चेत आला आहे. नवी मुंबईतील वाशी येथील सिडको प्रदर्शन केंद्रात हिंदी दिवस आणि हिंदी संमेलनाचं आयोजन करण्यात आलं होतं. या कार्यक्रमाला केंद्रीय गृहमंत्री अमित शाह यांच्यासह मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार उपस्थित होते.

यावेळी फडणवीस यांनी मातृभाषेच्या महत्त्वावर भाष्य करताना मराठी भाषेला आईची तर इतर भारतीय भाषांना मावशीची उपमा दिली. आईचा गौरव करताना मावशीचाही सन्मान केला पाहिजे, अशी भूमिका त्यांनी मांडली.

अंबादास दानवेंचा खोचक टोला

फडणवीसांच्या या विधानावर शिवसेना ठाकरे गटाचे नेते अंबादास दानवे यांनी जोरदार प्रतिक्रिया दिली. ‘मराठीत एक म्हण आहे. माय मरो पण मावशी जगो..! बरोबर ना फडणवीस साहेब’, असं म्हणत दानवेंनी मुख्यमंत्र्यांवर निशाणा साधला.

Devendra Fadnavis : ‘हिंदी माझी मावशी, मराठी माझी आई,’ अमित शाहांसमोर फडणवीसांचं मोठं वक्तव्य

दानवेंच्या या विधानामुळे मराठी आणि हिंदी भाषेच्या मुद्द्यावरून सत्ताधारी आणि विरोधकांमध्ये पुन्हा शाब्दिक संघर्ष रंगण्याची शक्यता आहे. आता भाजपकडून या टीकेला काय उत्तर दिलं जातं, याकडे राजकीय वर्तुळाचं लक्ष लागलं आहे.

अमित शाहांनीही भाषांवर मांडली भूमिका

दरम्यान, हिंदी संमेलनात केंद्रीय गृहमंत्री अमित शाह यांनी भारतातील प्रत्येक भाषा समृद्ध करण्याची भूमिका मांडली. देशातील सर्व भाषांचा विकास आणि परस्पर सन्मान महत्त्वाचा असल्याचं त्यांनी सांगितलं.

शाह यांनी स्वातंत्र्यवीर विनायक दामोदर सावरकर यांच्या भाषाविषयक योगदानाचाही उल्लेख केला. सावरकर हे स्वातंत्र्यसैनिक आणि समाजसुधारक तर होतेच, पण त्यांच्या काळातील विद्वान भाषाशास्त्रज्ञही होते, असं शाह यांनी नमूद केलं.

एकीकडे फडणवीसांनी मराठी आणि हिंदी भाषेच्या नात्याची उपमा देत सर्व भाषांचा सन्मान करण्याचं आवाहन केलं, तर दुसरीकडे अंबादास दानवेंनी त्याच विधानावरून मुख्यमंत्र्यांना खोचक टोला लगावला. त्यामुळे हा भाषेचा मुद्दा आता महाराष्ट्राच्या राजकारणात किती रंगतो, हे पाहणं महत्त्वाचं ठरणार आहे.

Amit Shah UCC Statement : अमित शाहांचा मोठा दावा! लवकरच लागू करणार समान नागरी कायदा