मंगळवार, 6 ऑक्टोबर 2026
MPSC आंदोलनावर फडणवीसांचा राहुल गांधींवर निशाणा
Devendra Fadnavis : राज्यात MPSC विद्यार्थ्यांच्या आंदोलनावरून राजकारण चांगलंच तापलं आहे. तसेच दिल्लीतदेखील INDIA आघाडीच्या आंदोलनामुळेदेखील देशभर चर्चा रंगू लागल्या आहेत. या पार्श्वभूमीवर मुख्यमंत्री देवेंद्र फडणवीस यांनी विरोधकांवर जोरदार निशाणा साधला आहे.
संविधानाने तयार केलेल्या संस्थांवरच लोकांचा विश्वास उडवण्याचं काम सुरू असल्याचा आरोप फडणवीसांनी केला. त्यानंतर संविधान तुम्हाला न्याय देऊ शकत नाही, असा संदेश देण्याचा प्रयत्न केला जात असल्याचंही ते म्हणाले. राजधानी दिल्लीत राहुल गांधी यांच्या नेतृत्वाखाली सुरू असलेल्या आंदोलनाचा संदर्भ देत फडणवीसांनी ही टीका केली.
देवेंद्र फडणवीस म्हणाले की, “भारताच्या संविधानाने तयार केलेल्या सर्व संस्था कुचकामी आहेत, अशी भावना समाजात रुजवण्याचं काम सुरू आहे. त्यानंतर संविधान तुम्हाला न्याय देऊ शकत नाही, असा संदेश दिला जाईल,” असा दावा त्यांनी केला. “म्हणून संविधान हातात घेऊन काम सुरू आहे,” असं म्हणत फडणवीसांनी दिल्लीत सुरू असलेल्या राहुल गांधींच्या आंदोलनावर भाष्य केलं.
पुण्यातील MPSC आंदोलनाबाबत बोलताना देवेंद्र फडणवीस म्हणाले की, “राज्य सरकार विद्यार्थ्यांच्या मागण्यांबाबत पूर्णपणे सकारात्मक आहे. विद्यार्थ्यांचे प्रश्न सोडवण्यासाठी राज्य सरकारने निर्णय घेतले आहेत. मात्र, विद्यार्थ्यांच्या खांद्यावर बंदूक ठेवून आपलं राजकारण केलं जात आहे,” असा आरोप त्यांनी केला.
“भारतातील सगळ्या लोकशाही संस्था संपवा”, अशा टोकाच्या पातळीवर हे राजकारण सुरू असल्याचं फडणवीसांनी म्हटलं. राजकारणाला उत्तर राजकारणानेच दिलं जाईल, असंही त्यांनी स्पष्ट केलं.
MPSC अध्यक्षांचा राजीनामा घेणे किंवा त्यांना पदावरून हटवणे हे राज्य सरकारच्या हातात नसल्याचं फडणवीसांनी स्पष्ट केलं. संविधानातील Article 317 चा उल्लेख करत त्यांनी MPSC अध्यक्षांना हटवण्याची प्रक्रिया स्पष्ट केली. विद्यमान MPSC अध्यक्ष हे पेपरफुटीची घटना घडली त्यावेळी अध्यक्ष नव्हते, याकडेही त्यांनी लक्ष वेधलं. त्यामुळे त्यांच्यावर थेट कारवाई करण्याची मागणी कितपत योग्य आहे, याचाही विचार करायला हवा, असं ते म्हणाले.
मात्र, विद्यार्थ्यांच्या मनात विश्वास निर्माण करण्यासाठी आयोगातील आजी-माजी अध्यक्षांची चौकशी करण्यास सांगितल्याचं फडणवीसांनी सांगितलं. चौकशीत कोणी दोषी आढळल्यास Article 317 नुसार राष्ट्रपतींकडे कारवाईची शिफारस केली जाईल, असंही त्यांनी स्पष्ट केलं. राज्य सरकारने याबाबत राज्यपालांकडे विनंती केल्याची माहितीही मुख्यमंत्र्यांनी दिली.
मुंबई पोलिस प्रोफेशनली काम करतात आणि कोणावरही चुकीची कारवाई करत नाहीत, असं फडणवीसांनी सांगितलं. आदिवासी समाजातील विद्यार्थ्यांच्या मागण्या सरकारने मान्य केल्या असून, त्या मागण्या मान्य केल्यानंतर विद्यार्थ्यांनी आपलं अभिनंदन केल्याचंही त्यांनी सांगितलं. मात्र, सध्याच्या आंदोलनाचा वापर नेतृत्वासाठी केला जात असल्याचा आरोप त्यांनी केला.
