जळगाव महापालिका महासभा (Photo - Social Media)
जळगाव : महापालिकांच्या सभागृहात होणारे राजकीय घमासान काही नवे नाही. आजपर्यंत अनेक शहरांच्या महापालिकेत, नगरपालिकेत सत्ताधारी आणि विरोधक एकमेकांना भिडल्याच्या वार्ता ऐकिवात आहेत. अश्यातच आता जळगाव महापालिकेतून मोठी बातमी समोर येत आहे. शिवसेना ठाकरे गटाचे नगरसेवक आणि भाजपचे नगरसेवक यांच्यात झालेल्या वादामुळे मोठा गोंधळ उडाला आणि शेवटी महापौरांनाच कठोर भूमिका घ्यावी लागली. (Jalgaon News)
शहरातील विकासकामांवर चर्चा करण्यासाठी बोलावलेल्या जळगाव महापालिकेच्या महासभेत विकासाच्या मुद्द्यांपेक्षा एका नगरसेवकाच्या वक्तव्याचीच चर्चा रंगली. शिवसेना ठाकरे गटाचे नगरसेवक इबा पटेल यांनी केलेल्या कथित वादग्रस्त विधानामुळे सभागृहात चांगलाच गोंधळ उडाला.
भाजप नगरसेवक विजय बांदल यांनी आक्रमक भूमिका घेतल्यानंतर महापौर दीपमाला काळे यांना हस्तक्षेप करावा लागला. अखेर दोन्ही नगरसेवकांना दहा मिनिटांसाठी सभागृहाबाहेर जाण्याचे आदेश देण्यात आले.
जळगाव महापालिकेच्या महासभेत शहरातील विविध विकासकामांवर चर्चा सुरू होती. यावेळी नगरसेवक इबा पटेल यांनी आपल्या प्रभागातील कामांचा मुद्दा उपस्थित केला. आपण सत्ताधारी पक्षाचे नगरसेवक नसल्याने आपल्या प्रभागातील कामांना अपेक्षित प्राधान्य मिळत नसल्याची तक्रार त्यांनी केली.
आपली बाजू मांडताना पटेल यांनी, ‘गरीब की बीवी सबकी भाभी होती है…’ असे वक्तव्य केले. त्यांच्या या विधानामुळे सभागृहात उपस्थित नगरसेवकांनी तीव्र आक्षेप घेतला. विशेषतः महिलांबाबत अशा प्रकारचे वक्तव्य केल्याने भाजप आणि शिवसेना शिंदे गटाच्या नगरसेवकांनी नाराजी व्यक्त केली.
या वक्तव्यावरून भाजप नगरसेवक विजय बांदल चांगलेच संतप्त झाल्याचे पाहायला मिळाले. ते इबा पटेल यांच्या अंगावर धावून गेल्याने सभागृहातील वातावरण आणखी तापले. काही काळ महासभेत गोंधळाचे वातावरण निर्माण झाले.
घडलेल्या प्रकाराची महापौर दीपमाला काळे यांनी गंभीर दखल घेतली. त्यांनी नगरसेवक इबा पटेल आणि विजय बांदल या दोघांनाही दहा मिनिटांसाठी सभागृहाबाहेर जाण्याचे आदेश दिले. दोघेही बाहेर गेल्यानंतर महासभेचे कामकाज पुन्हा सुरू झाले.
दरम्यान, जळगाव महापालिकेत भाजपची सत्ता असून विरोधी पक्षातील नगरसेवकांच्या प्रभागातील विकासकामांना डावलले जात असल्याचा आरोप केला जात आहे. याच मुद्द्यावरून पटेल यांनी आपली नाराजी व्यक्त केली होती.
एकीकडे शहराच्या विकासासाठी महत्त्वाच्या विषयांवर चर्चा होणे अपेक्षित असताना सभागृहात झालेल्या या प्रकारामुळे जळगावच्या राजकीय वर्तुळात चर्चा सुरू झाली आहे.
Ans: शिवसेना ठाकरे गटाचे नगरसेवक इबा पटेल यांनी 'गरीब की बीवी सबकी भाभी होती है...' असे वक्तव्य केले. या विधानावरून भाजप आणि शिवसेना शिंदे गटाच्या नगरसेवकांनी आक्षेप घेतल्याने सभागृहात गोंधळ झाला.
Ans: महापौर दीपमाला काळे यांनी इबा पटेल आणि भाजप नगरसेवक विजय बांदल या दोघांनाही दहा मिनिटांसाठी सभागृहाबाहेर जाण्याचे आदेश दिले.
Ans: आपण विरोधी पक्षाचे नगरसेवक असल्याने आपल्या प्रभागातील विकासकामांना अपेक्षित प्राधान्य मिळत नसल्याचा आरोप इबा पटेल यांनी केला.






