'राज्यात मोठमोठे सोहळे आणि महोत्सवांना कात्री लावण्यात येणार'; सांस्कृतिक कार्यमंत्र्यांची मोठी घोषणा
मुंबई : महाराष्ट्रात दुष्काळाची बिकट परिस्थिती आहे. शेतकरी, विद्यार्थी, जनावरे यांच्यासोबत लोककलावंतही या परिस्थितीत भरडला जाऊ नये. आपली संस्कृती जतन करणाऱ्या लोककलावंतांना मदत मिळावी, यासाठी मोठमोठे सोहळे आणि महोत्सवांना कात्री लावण्यात येणार आहे. लोककलावंतांना जास्तीत जास्त संधी मिळावी आणि त्यांना मेहनताना मिळावा, यासाठी तालुकास्तरावर कार्यक्रमांचे आयोजन करण्याचे निर्देश दिले आहेत, असे सांस्कृतिक कार्यमंत्री आशिष शेलार यांनी सांगितले.
आशिष शेलार यांनी मुंबईत माध्यमांशी संवाद साधला. ते म्हणाले, सांस्कृतिक कार्य संचालनालयाच्या माध्यमातून दरवर्षी हजारो कार्यक्रम आयोजित केले जातात. यंदा आवश्यक ते कार्यक्रम घेण्यात येतील. काही कार्यक्रम स्थगित करून पुढील वर्षी घेण्यात येतील. यासाठीचा २५ कोटी रुपयांचा निधी सांस्कृतिक कार्य संचालनालयामार्फत पुरातत्त्व विभागाच्या माध्यमातून बारव संवर्धनासाठी वापरण्यात येईल. बारव संवर्धनाच्या माध्यमातून पाण्याचे नियोजन करण्याच्या सूचना देण्यात आल्या आहेत, असेही त्यांनी म्हटले आहे.
दरम्यान, मुंबईतील सफाईसाठी टँकरच्या वापराबाबतही शेलार यांनी भाष्य केले. ते म्हणाले, ‘मला याबाबत माहिती नाही. मुंबई महापालिका याबाबत स्पष्टीकरण देईल. मात्र, वायफळ खर्च होऊ नये. असा खर्च होणार नाही. रस्ते सफाई करणे आवश्यक आहे’.
विरोधक राजकीय हेतूने मोर्चे काढत आहेत
इंडिया आघाडीच्या मोर्चाबाबतही आशिष शेलार यांनी विधान केले. ‘विरोधक राजकीय हेतूने मोर्चे काढत आहेत. खऱ्या मतदारांना वंचित ठेवण्याची त्यांची भूमिका दिसत आहे. त्यांची भूमिका स्पष्ट नाही. त्यांनी किती बीएलए (BLA) नेमले आहेत, हे सांगावे. ते निवडणूक आयोगाच्या बैठकीला उपस्थित राहत नाहीत. हे म्हणजे ‘वरातीमागून घोडे’ असे म्हणता येईल’.
आम्ही आदिवासी विद्यार्थ्यांसोबत
आदिवासी विद्यार्थ्यांकडून मोर्चा काढण्यात आला. त्यावर शेलार यांनी आम्ही आदिवासी विद्यार्थ्यांसोबत आहोत. त्यांच्या समस्या सोडवण्याचा प्रयत्न सुरू आहे. मात्र, त्यांना काँग्रेस कार्यालयात का डांबून ठेवले, याचे उत्तर काँग्रेसच्या प्रवक्त्यांनी द्यावे, असा सवाल उपस्थित केला.
.png "Videos"){kind=small}
