Manoj Jarange Audio Clip Controversy : ऑडिओ क्लिपची SIT चौकशी होणार? शिंदे गटाची मुख्यमंत्र्यांकडे धाव, फडणवीसांनी दिला शब्द

Manoj Jarange Audio Clip Controversy : एकनाथ शिंदे यांच्या शिवसेनेच्या नेत्यांनी मुख्यमंत्री देवेंद्र फडणवीस यांची भेट घेऊन प्रकरणाच्या सखोल चौकशीची मागणी केली.

• शिवसेना शिंदे गटाची मुख्यमंत्र्यांशी भेट
• ऑडिओ क्लिपची फॉरेन्सिक चौकशी करा
• मुख्यमंत्री फडणवीस SIT स्थापन करणार?

 

मनोज जरांगे पाटील यांनी पत्रकार परिषदेत ऐकवलेल्या कथित ऑडिओ क्लिपमुळे महाराष्ट्राच्या राजकारणात नवा वाद निर्माण झाला आहे. या प्रकरणी उपमुख्यमंत्री एकनाथ शिंदे यांच्या शिवसेनेच्या नेत्यांनी मुख्यमंत्री देवेंद्र फडणवीस यांची भेट घेतली. क्लिपमधील संभाषणाची सत्यता तपासून दोषींवर कारवाई करावी, अशी मागणी या नेत्यांनी निवेदनाद्वारे केली आहे. (Manoj Jarange Audio Clip Controversy)

शिवसेना नेत्यांच्या म्हणण्यानुसार, मुख्यमंत्री फडणवीस यांनी या प्रकरणाची सखोल चौकशी केली जाईल आणि कोणाचीही गय केली जाणार नाही, असं आश्वासन दिलं आहे. तसेच SIT स्थापन करण्याचा शब्द दिल्याचा दावाही नेत्यांनी केला.

फॉरेन्सिक आणि सायबर सेलमार्फत चौकशीची मागणी

या भेटीत विधानपरिषदेचे उपसभापती सचिन अहिर, खासदार मिलिंद देवरा, माजी खासदार राहुल शेवाळे, आमदार राहुल पाटील, खासदार रवींद्र वायकर आणि दीपक सावंत उपस्थित होते.

Manoj Jarange Audio Clip Controversy : एकनाथ शिंदेंना बदनाम करण्याचा डाव? गुलाबराव पाटलांनी उपस्थित केले गंभीर प्रश्न

सचिन अहिर यांनी सांगितलं की, पक्ष म्हणून या प्रकरणाची चौकशी होणं गरजेचं आहे. सायबर क्राईम आणि गुप्तचर यंत्रणांच्या माध्यमातून तपास करून वस्तुस्थिती लवकर समोर आणावी, अशी मागणी त्यांनी केली.

राहुल शेवाळेंनी उपस्थित केले सवाल

माजी खासदार राहुल शेवाळे यांनी कथित ऑडिओ क्लिपमधील संभाषणाला आक्षेप घेत फॉरेन्सिक आणि सायबर सेलमार्फत तपास करण्याची मागणी केली. क्लिपमध्ये एकनाथ शिंदे आणि खासदार श्रीकांत शिंदे यांच्याबाबत केलेल्या कथित वक्तव्यांची सत्यता तपासली पाहिजे, असं ते म्हणाले.

या संभाषणात उल्लेख केलेल्या व्यक्ती कोण आहेत, त्यांची राजकीय संलग्नता काय आहे आणि त्यांनी कोणत्या आधारावर वक्तव्यं केली, याचाही तपास व्हावा, अशी मागणी शेवाळे यांनी केली.

या प्रकरणामागे काही कटकारस्थान आहे का आणि राज्यातील सामाजिक सलोखा बिघडवण्याचा प्रयत्न होत आहे का, याची चौकशी करण्याची गरज असल्याचं शेवाळे यांनी नमूद केलं. मात्र, या आरोपांना अद्याप स्वतंत्र पुष्टी मिळालेली नाही.

आता चौकशीतून काय समोर येणार?

कथित ऑडिओ क्लिपमधील आवाजांची ओळख, संभाषणाची सत्यता आणि त्यात उल्लेख केलेल्या व्यक्तींची भूमिका तपासल्यानंतरच या प्रकरणाचं चित्र स्पष्ट होईल. दरम्यान, SIT स्थापन करण्याबाबतची अधिकृत घोषणा आणि पुढील तपासाची दिशा याकडे राजकीय वर्तुळाचं लक्ष लागलं आहे.

Manoj Jarange Audio Clip Controversy : जरांगेंच्या ऑडिओ क्लिपमध्ये नेमकं कोण? नरेश म्हस्केंनी घेतली भाजपच्या ‘त्या’ तिघांची नावं