मुंबईतील मराठा आंदोलनाला परवानगी नाकारली; जरांगे पाटील कोर्टात जाणार? भुजबळांची पहिली प्रतिक्रिया
Maratha Reservation : मुंबईतील मराठा आंदोलनावरून पुन्हा एकदा वातावरण चांगलंच तापलं आहे. मनोज जरांगे पाटील यांच्या आंदोलनाला आझाद मैदान पोलिसांनी परवानगी नाकारल्यानंतर मराठा समाजातून तीव्र नाराजी व्यक्त केली जात आहे. गेल्या वर्षी आंदोलनाला परवानगी दिली होती, मग यंदाच परवानगी का नाकारली जात आहे, असा सवाल आंदोलकांकडून उपस्थित केला जातोय.
परवानगी नाकारली असली तरी मनोज जरांगे पाटील आपल्या भूमिकेवर ठाम आहेत. त्यांच्या सहकाऱ्यांकडून आंदोलनासाठी पुन्हा परवानगी मागण्यात आली आहे. एवढंच नाही तर गरज पडल्यास कोर्टाचा दरवाजा ठोठावण्याची तयारीही सुरू असल्याची माहिती आहे. त्यामुळे आता या प्रकरणात पुढे काय होतं, याकडे सगळ्यांचं लक्ष लागलंय.
मुंबईत सध्या गणेशोत्सवाची धामधूम सुरू असल्याने मोठ्या गर्दीचा आणि पोलिस बंदोबस्ताचा मुद्दा समोर आला आहे. याच पार्श्वभूमीवर आंदोलनाला परवानगी नाकारली असावी, अशी प्रतिक्रिया मंत्री छगन भुजबळ यांनी दिली. मुंबईत आधीच मोठी गर्दी आहे, त्यात पोलिसांवर बंदोबस्ताचा ताण आहे, त्यामुळे प्रशासनाने हा निर्णय घेतला असावा, असं भुजबळ म्हणाले.
याचवेळी भुजबळांनी जरांगे पाटील यांच्या वक्तव्यांवरही टीका केली. महिला अधिकाऱ्यांबाबत किंवा मुख्यमंत्री यांच्याबाबत आक्षेपार्ह भाषा वापरणं योग्य नसल्याचं त्यांनी म्हटलं. त्यामुळे मराठा आंदोलनाच्या मुद्द्यावरून राजकीय वातावरण आणखी तापण्याची शक्यता आहे.
दरम्यान, धाराशिव जिल्ह्यातून मराठा बांधव मुंबईकडे जाण्याची जोरदार तयारी करत असल्याचं समोर आलं आहे. जिल्ह्यातील प्रत्येक गावातून सुमारे 100 मराठा बांधव आंतरवाली सराटीकडे रवाना होणार असल्याचं सांगितलं जात आहे. त्यानंतर मनोज जरांगे पाटील यांच्यासोबत मुंबईकडे जाण्याची तयारी असल्याचंही बोललं जातंय.
एकंदरीत, परवानगीचा मुद्दा, कोर्टात जाण्याची जरांगे पाटील यांची तयारी आणि मुंबईकडे निघण्याच्या तयारीत असलेले मराठा बांधव यामुळे आंदोलनाचा पुढचा टप्पा चांगलाच महत्त्वाचा ठरणार आहे. आता प्रशासन काय निर्णय घेतं आणि जरांगे पाटील पुढची चाल काय खेळतात, हे पाहणं महत्त्वाचं ठरेल.
Maratha Reservation: मुंबईत जाऊन मरेन, शरण येणार नाही! Manoj Janrange यांचा निर्धार
.png "Videos"){kind=small}
