महायुतीच्या फोडाफोडीत मनसेची मुसंडी, भाजपला धक्का देत पदाधिकाऱ्यांची 'घरवापसी'!
डोंबिवलीतील पलावा येथील मनसे कार्यालयात मनसे नेते तथा माजी आमदार राजू पाटील (Raju Patil) आणि शहराध्यक्ष हर्षद पाटील यांच्या उपस्थितीत मोठा पक्षप्रवेश सोहळा पार पडला. या कार्यक्रमात भाजपमधील काही कार्यकर्त्यांसह अनेक माजी मनसैनिकांनी पुन्हा मनसेचा झेंडा हाती घेतला.
पक्षप्रवेशानंतर माध्यमांशी संवाद साधताना राजू पाटील यांनी भाजपवर जोरदार टीका केली. “भाजप तरुणांच्या गळ्यात खोटं हिंदुत्व मारून त्यांचा केवळ राजकीय यंत्रणेसारखा वापर करत आहे,” असा आरोप त्यांनी केला. तसेच, “मनसेला मिळणारा निधी हा कार्यकर्त्यांच्या मेहनतीचा आहे. बीफ विकणाऱ्या कंपन्यांकडून आम्हाला निधी मिळत नाही,” असा टोला त्यांनी विरोधकांना लगावला.
या कार्यक्रमात मनसेच्या नव्या वैद्यकीय कक्षाचे उद्घाटन करण्यात आले. डॉक्टर आणि रुग्ण यांच्यात समन्वय साधणे, नागरिकांना वैद्यकीय मदत उपलब्ध करून देणे आणि आरोग्यविषयक समस्यांवर मार्गदर्शन करणे हा या कक्षाचा उद्देश असल्याचे राजू पाटील यांनी सांगितले. अनेक डॉक्टर आणि परिचारिका या उपक्रमाशी जोडले जात असल्याची माहितीही त्यांनी दिली.
केडीएमसीच्या रुक्मिणीबाई रुग्णालयात एका लहान बाळाच्या कमरेत इंजेक्शनची सुई अडकल्याच्या घटनेचाही राजू पाटील यांनी उल्लेख केला. त्यांनी म्हटले की, “NEET पेपर लीकसारख्या प्रकारांमुळे वैद्यकीय शिक्षणाच्या गुणवत्तेवर परिणाम होत असेल. मात्र नागरिकांना दर्जेदार आरोग्य सेवा मिळालीच पाहिजे. सेवा न मिळाल्यास केवळ राजकारणीच नव्हे तर सामान्य नागरिकही प्रश्न विचारतील.” त्यामुळे आरोग्य व्यवस्था अधिक सक्षम करण्यासाठी मनसेने वैद्यकीय सेवा टीमची स्थापना केल्याचे त्यांनी स्पष्ट केले.
या पक्षप्रवेश सोहळ्यास मनसे नेते राजू पाटील, डोंबिवली शहराध्यक्ष हर्षद पाटील, जिल्हाध्यक्ष राहुल कामत, मनसे पदाधिकारी योगेश पाटील यांच्यासह मोठ्या संख्येने पदाधिकारी आणि कार्यकर्ते उपस्थित होते. आगामी स्थानिक स्वराज्य संस्था निवडणुकांच्या पार्श्वभूमीवर कल्याण-डोंबिवलीतील या राजकीय घडामोडींना विशेष महत्त्व प्राप्त झाले आहे.
Satara Politics : शपथपत्रातील माहितीवरून दोन नगरसेवक अडचणीत; अपात्रता प्रकरणाची सुनावणी 14 जुलैला
.png "Videos"){kind=small}
