शुक्रवार, 11 सप्टेंबर 2026
MPSC सचिवांच्या तोंडाला काळं फासलं, अध्यक्षांनादेखील दिला इशारा
Sambhaji Brigade : महाराष्ट्र लोकसेवा आयोगाच्या (MPSC) परीक्षांमधील कथित पेपरफुटीवरून वातावरण चांगलंच तापलं आहे. आता या मुद्द्यावरून संभाजी ब्रिगेडने थेट आक्रमक पवित्रा घेतला आहे. नवी मुंबईत MPSCचे सचिव महेंद्र हरपाळकर यांच्या तोंडाला काळं फासल्याची घटना समोर आली आहे. या प्रकारानंतर MPSCच्या कारभारावर पुन्हा एकदा प्रश्नचिन्ह निर्माण झालं आहे. याप्रकरणी संभाजी ब्रिगेडच्या तीन कार्यकर्त्यांना अटक करण्यात आली असून नवी मुंबई पोलीस उपायुक्त अमित काळे यांनी हि माहिती दिली आहे.
संभाजी ब्रिगेडचे महाराष्ट्र प्रवक्ते संतोष शिंदे यांनी या कारवाईचं समर्थन करत सरकारवर जोरदार हल्लाबोल केला. “MPSCचा अभ्यास करणाऱ्या 25 लाख विद्यार्थ्यांच्या आणि महाराष्ट्रातील 12 कोटी जनतेच्या वतीने ही कारवाई करण्यात आली,” असं त्यांनी यावेळी म्हंटलं. महेंद्र हरपाळकर यांच्या गालावर मारलेली थप्पड ही सरकारला जनतेने दिलेली थप्पड असल्याचंही शिंदे यांनी म्हटलं.
दरम्यान, अन्न व औषध निरीक्षक पदाच्या परीक्षेतील कथित पेपरफुटीच्या मुद्द्यावरून संभाजी ब्रिगेडने याआधीही आंदोलन केलं होतं. 3 ऑगस्ट रोजी राज्यातील जिल्हाधिकारी कार्यालयांसमोर आंदोलन करत सरकारला इशारा दिला होता. मात्र, सरकारने या प्रकरणाकडे गांभीर्याने पाहिलं नसल्याचा आरोप संघटनेने केला आहे.
“सरकारला ज्या भाषेत समजतं, त्या भाषेत सांगावं लागतं,” असं म्हणत संतोष शिंदे यांनी MPSC अध्यक्ष आणि सचिवांनी तातडीने राजीनामा द्यावा, अशी मागणी केली. राजीनामा न दिल्यास पुढचा नंबर MPSC अध्यक्षांचा असेल, असा थेट इशाराही त्यांनी दिला.
MPSCच्या कारभारावर संताप व्यक्त करताना संतोष शिंदे यांनी आणखी आक्रमक वक्तव्य केलं. “आज केलेली कारवाई झाकी है, अध्यक्ष अभी बाकी है,” असं ते म्हणाले. प्रश्नपत्रिका फुटत असतील, परीक्षा रद्द होत असतील आणि विद्यार्थ्यांचं नुकसान होत असेल तर आणखी किती वर्षं वाट पाहायची, असा सवालही त्यांनी उपस्थित केला.
या घटनेवर खासदार सुप्रिया सुळे यांनी मात्र नाराजी व्यक्त केली. आंदोलन आणि चर्चा लोकशाही मार्गाने व्हायला हवी. काळं फासणं किंवा शाईफेक करणं योग्य नाही, असं त्यांनी स्पष्ट केलं. विद्यार्थ्यांना न्याय मिळावा, हीच भूमिका असल्याचंही त्यांनी सांगितलं.
महेंद्र हरपाळकर हे डिसेंबर 2025 पासून महाराष्ट्र लोकसेवा आयोगाच्या सचिवपदावर कार्यरत आहेत. यापूर्वी त्यांनी छत्रपती संभाजीनगरमधील जात प्रमाणपत्र पडताळणी समितीवर काम केलं आहे. अन्न व औषध निरीक्षक पदाच्या पेपरफुटीच्या तक्रारीनंतर त्यांनी तक्रारदाराने तक्रार मागे घेतल्याची माहिती दिली होती. हरपाळकर हे 1995 पासून प्रशासनात अधिकारी म्हणून कार्यरत असल्याचं सांगितलं जातं.
