Ravindra Chavan
नागपूर : नागपूर पदवीधर मतदारसंघाच्या निवडणुकीच्या पार्श्वभूमीवर भाजपने संघटनात्मक तयारीला वेग दिला आहे. भाजपचे महाराष्ट्र प्रदेशाध्यक्ष रविंद्र चव्हाण यांनी विदर्भाचा दोन दिवसीय दौरा करत विविध संघटनात्मक जिल्ह्यांमध्ये बैठकांचा धडाका लावला. या दौऱ्यानंतर पक्षाची यंत्रणा निवडणुकीसाठी अधिक सक्रिय झाल्याचे चित्र आहे.
रविंद्र चव्हाण यांच्या प्रमुख उपस्थितीत नागपूर ग्रामीण (रामटेक), चंद्रपूर महानगर व ग्रामीण, गडचिरोली, गोंदिया, भंडारा, नागपूर महानगर, काटोल आणि वर्धा या संघटनात्मक जिल्ह्यांच्या बैठका पार पडल्या. या बैठकींमध्ये संघटनात्मक बांधणी, निवडणूक नियोजन आणि कार्यपद्धतीचा आढावा घेण्यात आला. पदाधिकारी आणि कार्यकर्त्यांनी एकजुटीने आणि नियोजनबद्ध पद्धतीने निवडणुकीला सामोरे जाण्याचे आवाहन चव्हाण यांनी केले.
चंद्रपूरमधील बैठकीदरम्यान ब्रह्मपुरी येथील १९८० पासून पक्षकार्यात सक्रिय असलेल्या प्रा. शेख सर यांचा रविंद्र चव्हाण यांच्या हस्ते सत्कार करण्यात आला. निष्ठावंत आणि ज्येष्ठ कार्यकर्ते हे पक्षाचे आधारस्तंभ असल्याचे चव्हाण यांनी यावेळी सांगितले.
दौऱ्यादरम्यान रामटेकचे जिल्हाध्यक्ष आनंदराव राऊत, आमदार कीर्तिकुमार (बंटी) भांगडीया, माजी आमदार अतुल देशकर, ज्येष्ठ नेते किसन नागदेवे, माजी आमदार कृष्णा गजभिये आणि आमदार विनोद अग्रवाल यांच्या निवासस्थानी तसेच कार्यालयात चव्हाण यांनी सदिच्छा भेटी दिल्या. यावेळी स्थानिक पदाधिकारी आणि कार्यकर्त्यांशी त्यांनी थेट संवाद साधला.
या बैठकांना मंत्री डॉ. अशोक उईके, राज्यमंत्री तथा पालकमंत्री पंकज भोयर, प्रदेश सरचिटणीस संजय कुटे यांच्यासह अनेक आमदार, माजी खासदार, माजी आमदार आणि पक्षाचे वरिष्ठ पदाधिकारी उपस्थित होते.
दोन दिवसांच्या दौऱ्यात झालेल्या सलग बैठका आणि कार्यकर्त्यांशी संवादामुळे भाजपच्या निवडणूक तयारीला नवी ऊर्जा मिळाल्याचा दावा पक्षाकडून करण्यात आला आहे. यावेळी रवींद्र चव्हाण म्हणाले, ““ आदरणीय पंतप्रधान नरेंद्र मोदीजी आणि आदरणीय मुख्यमंत्री देवेंद्रजी फडणवीस यांच्या नेतृत्वात विदर्भात विकासाची गंगा प्रवाहित झाली आहे. नागपूर ही राष्ट्रीय स्वयंसेवक संघाची पुण्यभूमी असून विदर्भ हा भाजपचा भक्कम बालेकिल्ला आहे. या दौऱ्यात कार्यकर्त्यांमध्ये प्रचंड उत्साह आणि विजयाचा आत्मविश्वास दिसला. नागपूर पदवीधर मतदारसंघातील निवडणुकीसाठी आम्ही सर्व ताकदीनिशी सज्ज आहोत. आमचाच विजय होईल, याचा पूर्ण विश्वास आहे.”
चव्हाण यांच्या दौऱ्यामुळे विदर्भातील भाजप पदाधिकारी आणि कार्यकर्त्यांना निवडणुकीसाठी स्पष्ट दिशा मिळाल्याचे पक्षाकडून सांगण्यात येत आहे. त्यामुळे आगामी काळात नागपूर पदवीधर मतदारसंघाची निवडणूक अधिक रंगतदार होण्याची शक्यता आहे.
.png "Videos"){kind=small}
