Naresh Mhaske on Raj and Uddhav Thackeray
Naresh Mhaske : निवडणूक आयोगाच्या विरोधात येत्या ४ ऑक्टोबरला मुंबईत मोर्चा निघणार आहे. महाराष्ट्र नवनिर्माण सेनेचे प्रमुख राज ठाकरे आणि शिवसेना उद्धव ठाकरे गटाचे प्रमुख उद्धव ठाकरे यांनी संयुक्त पत्रकार परिषद घेत याबाबत माहिती दिली. आता यावरून राजकीय वर्तुळातून प्रतिक्रिया यायला सुरुवात झाली असून शिवसेना शिंदे गटाचे प्रवक्ते आणि खासदार नरेश म्हस्के यांनी यावरून चांगलाच घणाघात केला आहे.
नरेश म्हस्के यांनी माध्यमांशी संवाद साधत ठाकरे गट आणि मनसेच्या आगामी निवडणूक आयोगाविरोधातील मोर्चाबाबत भाष्य केले. यावेळी त्यांनी उद्धव ठाकरे यांच्यावर टीका करत, “अभिजित दिपके यांच्या नेतृत्वात उद्धव ठाकरे महाराष्ट्रात काम करत आहेत,” असे विधान केले आहे.
नरेश म्हस्के यावेळी म्हणाले, “निवडणूक आयोग आणि आयोगाचे आयुक्त ज्ञानेश कुमार यांच्या विरोधात जे आंदोलन उभारले जात आहे. महाराष्ट्रात त्यांचा पराभव झाला. त्याच्या मागचे कारण ज्ञानेश कुमार सांगितलं जातं आहे. मुळात तेव्हा ज्ञानेश कुमार हे निवडणूक आयोगाचे मुख्य आयुक्त नव्हते. त्यांचा पराभव का झाला यासाठी संजय राऊत यांनी आयोग नेमला पाहिजे. उद्धव ठाकरे यांनी ‘मी का हरलो?’ याचे आत्मपरीक्षण करावे. राज ठाकरे यांना जर मी तूच्छ वागणूक दिली नसती म्हणून पराभव झाला, हे उद्धव ठाकरे यांना कळेल,” अश्या शब्दांत त्यांनी उद्धव ठाकरेंवर टीकास्त्र सोडले.
कॉकरोच जनता पार्टीचे प्रमुख अभिजित दिपके यांच्यावरदेखील त्यांनी यावेळी सडकून टीका केली. ते म्हणाले, “दिपके यांचे दिल्लीतील आंदोलन आपण पाहिले. सगळ्या डाव्या पिलावळी तिथे होत्या. ज्यांनी कायम हिंदुत्वाचा कायम विरोध केला. त्यांच्यासोबत ठाकरे बंधू हातमिळवणी करणार का?” असा सवाल त्यांनी यावेळी उपस्थित केला.
“स्वतःचे अस्तित्व टिकवण्याकरिता अभिजित दिपके या काल आलेल्या पोरासोबत त्यांना हातमिळवणी करावी लागते याचे वाईट वाटते,’ असे म्हणत ‘शिवाजी पार्क येथील स्वातंत्र्यवीर सावरकरांच्या स्मारकाला अभिवादन करून आंदोलन सुरू करण्यास ठाकरे यांनी दिपके यांना सांगावे,’ असे आवाहनदेखील नरेश म्हस्के यांनी यावेळी केले. सध्या अभिजित दिपके यांच्या नेतृत्वात उद्धव ठाकरे महाराष्ट्रात काम करत आहेत, असा टोलादेखील त्यांनी यावेळी मारला.
इंडिया आघाडीच्या बैठकीवरूनही नरेश म्हस्केंनी उद्धव ठाकरेंना टोला लगावला. उद्धव ठाकरेंना आमदार-खासदार सांभाळण्यासह इतर कामं असल्याने बैठकीला सर्वजण उपस्थित राहतीलच असं नाही, असा दावा त्यांनी केला. त्यामुळे ४ ऑक्टोबरच्या मोर्चाच्या पार्श्वभूमीवर महाराष्ट्रातील राजकीय वातावरण आणखी तापण्याची चिन्हं आहेत.
.png "Videos"){kind=small}
