Narhari Zirwal Viral Video: नरहरी झिरवाळ आणि मुख्यमंत्र्यांची गुप्त भेट; वादग्रस्त ‘चित्रफीत’ प्रकरणाने राष्ट्रवादीत खळबळ

दोन महिन्यांपूर्वी झिरवाळ यांच्या कार्यालयातील एका लिपिकाला ३५ हजार रुपयांची लाच स्वीकारताना लाचलुचपत प्रतिबंधक विभागाने (ACB) रंगेहात पकडले होते.

• नरहरी झिरवाळ यांची एक कथित व्हिडीओ (Video) सोशल मीडियावर व्हायरल
• तृतीयपंथी पवन यादव हा झिरवाळ यांच्यासोबत बिछान्यावर
• झिरवाळ यांच्यावर शिस्तभंगाची कारवाई होण्याची दाट शक्यता

Narhari Zirwal Viral Video: विधानसभा उपाध्यक्ष आणि दिंडोरीचे आमदार नरहरी झिरवाळ यांची एक कथित व्हिडीओ (Video) सोशल मीडियावर व्हायरल झाल्याने मोठी खळबळ उडाली आहे. या व्हिडीओमध्ये झिरवाळ यांच्यासोबत पवन यादव नावाचा तृतीयपंथी दिसत असून, यादववर मुंबईतील कुरार पोलीस ठाण्यात खंडणीचा गुन्हा दाखल असल्याची माहिती समोर आली आहे.

काय आहे व्हिडीओमध्ये?

प्रसारित झालेली ही चित्रफीत सुमारे सात महिन्यांपूर्वीची असल्याचे बोलले जात आहे. शासकीय निवासस्थानातील या दृश्यांमध्ये तृतीयपंथी पवन यादव हा झिरवाळ यांच्यासोबत बिछान्यावर बसलेला दिसत आहे. तसेच त्यांच्या शेजारी खाद्यपदार्थ आणि मद्याच्या बाटल्याही दिसून येत आहेत. एका लोकप्रतिनिधीच्या शासकीय निवासात गुन्हेगारी पार्श्वभूमी असलेली व्यक्ती अशा परिस्थितीत दिसल्याने नैतिकतेचा प्रश्न उपस्थित केला जात आहे.

Narhari Zirval Viral Video: मंत्री नरहरी झिरवाळ यांचा आक्षेपार्ह व्हिडीओ व्हायरल

राज्यातील राजकीय वर्तुळात सध्या एका कथित व्हिडिओ प्रकरणामुळे खळबळ माजली आहे. या प्रकरणाची नरहरी झिरवाळ यांना पूर्ण कल्पना असल्याचे समजते. सूत्रांनी दिलेल्या माहितीनुसार, झिरवाळ यांनी मंगळवारी मुख्यमंत्री देवेंद्र फडणवीस आणि पक्षश्रेष्ठींची भेट घेऊन चर्चा केली आहे. पक्षात सध्या मंत्रीपदासाठी अनेक जण इच्छुक असून, त्या स्पर्धेतूनच झिरवाळ यांना लक्ष्य केले जात असल्याची चर्चा आता राजकीय गोटात रंगू लागली आहे.

पक्षांतर्गत वर्चस्वाची लढाई

पक्षाच्या नेतृत्वाबाबत सुरू असलेल्या गोंधळाच्या पार्श्वभूमीवर झिरवाळ यांनी घेतलेल्या भूमिकांकडे सर्वांचे लक्ष लागले आहे. विशेषतः पक्षाच्या अध्यक्षपदासाठी सुनेत्रा पवार यांच्या नावाची आग्रही मागणी करणारे झिरवाळ हे पहिले नेते ठरले होते. तसेच दोन्ही राष्ट्रवादी काँग्रेसचे विलीनीकरण करण्याबाबत वरिष्ठ पातळीवर हालचाली सुरू असल्याचेही त्यांनी जाहीरपणे म्हटले होते. मात्र, आता ही चित्रफीत समोर आल्यानंतर झिरवाळ यांच्यापुढील अडचणी वाढल्या आहेत.

महाबळेश्वरच्या घाटात आमच्या एन्काउंटरचा पोलिसांचा होता डाव; जिल्हा परिषद सदस्यांचा आरोप

तिसरा बळी ठरणार का?

या प्रकरणामुळे झिरवाळ यांच्यावर शिस्तभंगाची कारवाई होण्याची दाट शक्यता वर्तवली जात आहे. जर ही कारवाई झाली आणि त्यांना राजीनामा द्यावा लागला, तर धनंजय मुंडे आणि माणिकराव कोकाटे यांच्यानंतर मंत्रीपद सोडावे लागणारे झिरवाळ हे पक्षाचे तिसरे मंत्री ठरतील. या सर्व घडामोडींमुळे एकलहरे आणि परिसरात तसेच राजकीय वर्तुळात तर्कवितर्कांना उधाण आले आहे.

विरोधकांकडून राजीनाम्याची मागणी जोर धरण्याची शक्यता

नरहरी झिरवाळ यांच्यासाठी गेल्या काही महिन्यांपासून अडचणी सातत्याने वाढताना दिसत आहेत. दोन महिन्यांपूर्वी झिरवाळ यांच्या कार्यालयातील एका लिपिकाला ३५ हजार रुपयांची लाच स्वीकारताना लाचलुचपत प्रतिबंधक विभागाने (ACB) रंगेहात पकडले होते. त्यावेळीच विरोधकांनी झिरवाळ यांच्या राजीनाम्याची मागणी लावून धरली होती. आता ही नवीन चित्रफीत समोर आल्याने विरोधकांच्या हाती आयते कोलीत मिळाले असून, झिरवाळ यांच्या अडचणीत मोठी वाढ होण्याची शक्यता आहे. या प्रकरणावर अद्याप नरहरी झिरवाळ किंवा त्यांच्या कार्यालयाकडून कोणतीही अधिकृत प्रतिक्रिया आलेली नाही.