Shivsena Dasara Melava : शिंदेंचा दसरा मेळावा यंदा शेतकऱ्यांसाठी; दिवाळीचा शिधा घेऊन ट्रक निघणार

Shivsena Dasara Melava : दुष्काळग्रस्त भागातील शिवसैनिक आणि पदाधिकाऱ्यांनी मुंबईत येण्याऐवजी शेतकऱ्यांच्या घरी भेट देऊन मदतीचे तोरण लावावे, असे आवाहन पक्षाकडून करण्यात आले आहे.

 

• शिंदेंचा दसरा मेळावा दुष्काळग्रस्त शेतकऱ्यांना समर्पित
• मदतीचे ट्रक रवाना होणार
• शेतकऱ्यांच्या दारी मदतीचे तोरण बांधा, शिवसैनिकांना आवाहन

 

Shivsena Dasara Melava : राज्यातल्या दुष्काळाच्या पार्श्वभूमीवर शिवसेनेने यंदाचा दसरा मेळावा संकटग्रस्त शेतकऱ्यांना समर्पित केला आहे. गोरेगाव येथील नेस्को सेंटर येथे मंगळवारी संध्याकाळी ५ वाजता दसरा मेळाव्याला मुंबई आणि आसपासच्या जिल्ह्यातील शिवसैनिक आणि पदाधिकाऱ्यांनी उपस्थित राहावे. दुष्काळग्रस्त भागातील शिवसैनिक आणि पदाधिकाऱ्यांनी मुंबईत येण्याऐवजी शेतकऱ्यांच्या घरी भेट देऊन मदतीचे तोरण लावावे, असे आवाहन पक्षाकडून करण्यात आले आहे.

गोरेगाव येथील नेस्कोमध्ये दसऱ्या मेळाव्याची तयारी अंतिम टप्प्यात आली आहे. दुष्काळाच्या संकटामुळे यंदा सांस्कृतिक कार्यक्रमाऐवजी शिवसेना नेत्यांच्या भाषणाने थेट मेळाव्याला सुरुवात होईल. या मेळाव्यात शिवसेनेचे मुख्य नेते व राज्याचे उपमुख्यमंत्री एकनाथ शिंदे काय बोलणार, याकडे राज्याचे लक्ष लागले आहे.

शेतकऱ्यांसाठी दिवाळीचा शिधा; मदतीचे ट्रक रवाना

दुष्काळामुळे संकटात सापडलेल्या शेतकरी बांधवांच्या पाठीशी शिवसेना ठामपणे उभी असून, शेतकरी कुटुंबांना या कठीण परिस्थितीतून सावरण्यासाठी सर्वतोपरी मदत करण्याचा निर्धार शिवसेनेने केला आहे. या मेळाव्यात उपमुख्यमंत्री शिंदे यांच्या उपस्थितीत दुष्काळग्रस्त शेतकऱ्यांच्या कुटुंबियांसाठी दिवाळीचा शिधा घेऊन जाणारे ट्रक राज्यातील विविध भागांमध्ये रवाना केले जातील. शेतकऱ्यांच्या मदतीसाठी उपमुख्यमंत्री शिंदे शिवसैनिकांना राज्यव्यापी कार्यक्रम देतील.

Shivsena Dasara Melava : एकनाथ शिंदेंचा मोठा निर्णय! दुष्काळग्रस्त शेतकऱ्यांच्या मदतीसाठी दसरा मेळाव्यातील ‘ते’ कार्यक्रम रद्द

‘शेतकऱ्यांच्या दारी मदतीचे तोरण बांधा’

दसरा मेळाव्याला राज्याच्या कानाकोपऱ्यातून शिवसैनिक आणि पदाधिकारी मोठ्या संख्येने मुंबईत येत असतात, मात्र यंदाची दुष्काळी परिस्थिती पाहता मुंबईत येण्याऐवजी दुष्काळग्रस्त भागातील शिवसैनिकांनी संकटग्रस्त शेतकऱ्यांना मदत करावी. शेतकऱ्याच्या घरी जाऊन त्याच्या दारी मदतीचे तोरण लावावे तर दसरा मेळाव्यासाठी मुंबई आणि परिसरातील शिवसैनिक आणि पदाधिकाऱ्यांनी उपस्थित राहावे, असे आवाहन पक्षाकडून करण्यात आले आहे.

दुष्काळग्रस्त शेतकरी कुटुंबांतील महिलांना उदरनिर्वाहाचे साधन उपलब्ध व्हावे, यासाठी शिलाई मशीनचे वाटप करण्यात येत असून, दुष्काळग्रस्त भागांतील शेतकऱ्यांच्या मुलींच्या विवाहासाठीही शिवसेनेच्या वतीने मदत करण्यात येणार आहे. दुष्काळग्रस्त शेतकरी कुटुंबांना मदतीचा हात देण्याचे आवाहन केल्यानंतर शिवसेनेच्या स्थानिक नगरसेवकांनी, पदाधिकाऱ्यांनी तसेच विविध क्षेत्रांतील अनेक मान्यवरांनी पुढाकार घेत शेतकऱ्यांसाठी मदतनिधीचे धनादेश उपमुख्यमंत्री शिंदे यांच्याकडे सुपूर्द केले.

‘राज्यात राष्ट्रपती राजवट लागू करा,’ संजय राऊतांची मोठी मागणी; पूर्णेकर हत्या अन् टायगर श्रॉफ गोळीबारावरून फडणवीसांना घेरलं