मंगळवार, 10 नोव्हेंबर 2026
काँग्रेसच्या ‘गुंगी गुडिया’ टीकेवर सुप्रिया सुळेंची पहिली प्रतिक्रिया, काँग्रेसच्या केंद्रीय नेतृत्वाच्या विधानावरून मोठे वक्तव्य
सुनेत्रा पवार यांच्याबाबत महाराष्ट्र काँग्रेसकडून करण्यात आलेले वक्तव्य अयोग्य असल्याचे सुप्रिया सुळे यांनी स्पष्ट केले. या प्रकरणी आपण काँग्रेसच्या नेतृत्वाशी चर्चा केल्याचेही त्यांनी सांगितले. त्यानंतर काँग्रेसच्या राष्ट्रीय नेतृत्वाने अवघ्या काही वेळात आपली भूमिका स्पष्ट केली, असा दावा सुप्रिया सुळे यांनी केला.
“सुनेत्रावहिनींबद्दल महाराष्ट्र काँग्रेसने केलेलं वक्तव्य अयोग्यच होतं,” असे सांगत सुप्रिया सुळे यांनी काँग्रेसच्या राष्ट्रीय नेतृत्वाचे आभार मानले. महाराष्ट्र काँग्रेसच्या स्थानिक IT सेलमधून हा प्रकार घडला असून हे काँग्रेसच्या राष्ट्रीय नेतृत्वाचे मत नाही, असे त्यांनी स्पष्ट केले.
महाराष्ट्रातील काँग्रेस आणि राष्ट्रीय काँग्रेसच्या भूमिकांमध्ये फरक असल्याचेही सुप्रिया सुळे यांनी नमूद केले. कोणाचाही अपमान होईल अशा पद्धतीने वक्तव्य करू नये, अशी भूमिका त्यांनी मांडली. काँग्रेसच्या केंद्रीय नेतृत्वाने या प्रकरणात मनाचा मोठेपणा दाखवत भूमिका स्पष्ट केल्याचेही त्या म्हणाल्या.
दरम्यान, सुप्रिया सुळे यांच्यासह राष्ट्रवादी शरद पवार गटाचे आठ खासदार पंतप्रधान नरेंद्र मोदी यांची भेट घेणार असल्याची माहितीही त्यांनी दिली.
महाराष्ट्रातील गंभीर प्रश्न संसदेत मांडण्यास अडचणी येत असल्याने थेट पंतप्रधानांकडे हे मुद्दे घेऊन जाण्याचा निर्णय खासदारांनी घेतल्याचे सुप्रिया सुळे यांनी सांगितले. महाराष्ट्रातील पाणीप्रश्न, शेतकऱ्यांच्या आत्महत्या, वाढते शहरीकरण आणि मतदारसंघातील विकासकामांशी संबंधित अडचणी यावर या भेटीत चर्चा होणार आहे. खासदारांना मिळणाऱ्या विकासनिधीच्या अंमलबजावणीतही अनेक अडथळे येत असल्याचा मुद्दा त्यांनी उपस्थित केला. महाराष्ट्र सरकारकडून खासदारांना अपेक्षित सहकार्य मिळत नसल्याचेही त्यांनी सांगितले.
‘Gen Z शी बोलण्याआधी अमित शाहांचा राजीनामा घ्या’; उद्धव ठाकरेंचा मोहन भागवतांना खोचक टोला
या सर्व प्रश्नांवर चर्चा करण्यासाठी आठ खासदारांनी पंतप्रधान मोदींकडे भेटीची वेळ मागितली होती. त्यानुसार सोमवारी सकाळी 11 वाजता संसदेतील कार्यालयात पंतप्रधान नरेंद्र मोदी आठ खासदारांची भेट घेणार आहेत, अशी माहिती सुप्रिया सुळे यांनी दिली. यावेळी त्यांनी “एकनाथ शिंदे यांच्या खासदारांना नाश्त्यासाठी बोलावण्यात आलं होतं, आम्हाला नाश्त्यासाठी बोलावलं नाही,” असेही सांगितले. त्यामुळे या भेटीमागील राजकीय चर्चांनाही आता वेग आला आहे.
