Sushilkumar Shinde
राज्याच्या राजकारणात सध्या मोठ्या प्रमाणात धामधूम पाहायला मिळत आहे. अश्यातच काँग्रेसचे ज्येष्ठ नेते सुशीलकुमार शिंदे हे भाजपप्रवेश करणार असल्याच्या चर्चा मागील काही दिवसांपासून रंगल्या होत्या. शिंदेंचे नातू शिखर पहारिया यांनी पंतप्रधान नरेंद्र मोदी यांच्या वाढदिवसानिमित्त शुभेच्छांचे बॅनर लावल्याने याबाबत चर्चा सुरु झाली. आता खुद्द सुशीलकुमार शिंदे यांनीच यावर प्रतिक्रिया दिली आहे. (Sushilkumar Shinde)
नातवाच्या कृतीचं समर्थन करताना त्यांनी राजकारण आणि वैयक्तिक संबंध याबाबत आपली भूमिका स्पष्ट केली. तसेच ‘मी काँग्रेसमध्येच राहणार आहे,’ असे म्हणत त्यांनी भाजपप्रवेशाच्या चर्चाना पूर्णविराम लावला आहे.
शिखर पाहारिया यांनी मोदींना वाढदिवसाच्या शुभेच्छा देणारे बॅनर लावले म्हणून एवढं काय बिघडलं, असा सवाल शिंदे यांनी केला. आपणही नुकतीच पंतप्रधानांची भेट घेतल्याचं त्यांनी सांगितलं. एखाद्या नेत्याला शुभेच्छा दिल्याने किंवा त्याची भेट घेतल्याने आपली राजकीय विचारधारा बदलत नाही, असं त्यांचं म्हणणं आहे. राजकारणात प्रत्येक गोष्टीचा वेगळा अर्थ काढण्यापेक्षा त्याकडे समजूतदारपणे पाहायला हवं, असा संदेशही त्यांच्या वक्तव्यातून मिळतो.
भाजपमध्ये प्रवेश करण्याबाबत आपल्यालाही अनेकदा विचारणा झाल्याचा खुलासा सुशीलकुमार शिंदे यांनी केला. मात्र, आपण काँग्रेसमध्ये आहोत आणि तिथेच काम करणार आहोत, असं त्यांनी स्पष्ट केलं.
भाजपमध्ये नव्याने गेलेल्या काही नेत्यांची परिस्थितीही आपण पाहिली असल्याचं ते म्हणाले. सुमारे 25 वर्षांपूर्वीही अनेक नेत्यांनी पक्ष सोडले होते आणि त्यातील काही जण काही वर्षांनी परतले, असं त्यांनी नमूद केलं.
पंतप्रधान नरेंद्र मोदी हे आपल्याशी जितकं बोलतात, तितकंच शरद पवार यांच्याशीही बोलतात, असं शिंदे म्हणाले. राजकीय नेत्यांच्या भेटीगाठी किंवा एखाद्या कार्यक्रमाला उपस्थित राहण्यावरून लगेच वेगळे अर्थ काढू नयेत, अशी त्यांची भूमिका दिसून आली.
मोदींकडून काही चांगल्या गोष्टी होतात, तर काही निर्णयांवर टीकाही होते. या सगळ्याचं विश्लेषण पत्रकारांनी केलं पाहिजे, असंही त्यांनी सांगितलं.
राष्ट्रीय स्वयंसेवक संघाचं पुस्तक वाचल्याचं आणि कम्युनिस्ट पक्षाच्या इतिहासाबद्दलही माहिती घेतल्याचं शिंदे यांनी सांगितलं. राजकीय शास्त्राचा विद्यार्थी म्हणून वेगवेगळ्या विचारधारा समजून घेणं महत्त्वाचं असल्याचं ते म्हणाले. एकूणच, नातवाच्या बॅनरवरून सुरू झालेल्या चर्चेच्या निमित्ताने शिंदे यांनी काँग्रेसमधील आपली भूमिका आणि इतर पक्षांबाबतचा दृष्टिकोन स्पष्ट केला आहे.
.png "Videos"){kind=small}
