Marathi Language: परिवहन सभापतींच्या निमंत्रण पत्रिकेत मराठी हद्दपार; नावांमध्येही चुका, भाजप प्रोटोकॉलला बगल!

Marathi Language: परिवहन सभापती राजकुमार मिश्रा यांच्या निमंत्रण पत्रिकेवरून नव्या वादाला तोंड फुटले आहे. पत्रिकेत मराठी भाषेला डावलण्यात आल्याचा आरोप होत असून, काही मान्यवरांच्या नावांमध्येही चुका असल्याचे समोर आले आहे. याशिवाय भाजपच्या पक्षीय प्रोटोकॉलचे पालन करण्यात आले नसल्याचा आक्षेप घेतला जात आहे.

• मराठीला डावलले, पक्षीय प्रोटोकॉलही मोडला
• राजकुमार मिश्रा यांच्या निमंत्रण पत्रिकेवरून वाद
• परिवहन सभापती वादाच्या भोवऱ्यात

विजय काते, मीरा-भाईंदर: मीरा-भाईंदर महानगरपालिकेचे परिवहन सभापती राजकुमार मिश्रा यांच्या कार्यालयाच्या उद्घाटन सोहळ्यासाठी प्रसिद्ध करण्यात आलेल्या निमंत्रण पत्रिकेवरून आता राजकीय वाद निर्माण झाला आहे. प्रशासकीय पदाशी संबंधित कार्यालयाच्या उद्घाटनाची निमंत्रण पत्रिका संपूर्णपणे हिंदी भाषेत छापण्यात आल्याने मराठी भाषेचा (Marathi Language) अवमान झाल्याचा आरोप विरोधकांकडून करण्यात येत आहे. त्यामुळे “राजकुमार मिश्रा यांना मराठीचा विसर पडला आहे का?” असा सवाल उपस्थित केला जात आहे.

मीरा-भाईंदर महानगरपालिका ही महाराष्ट्रातील स्थानिक स्वराज्य संस्थेचा भाग आहे. त्यामुळे महापालिकेच्या प्रशासकीय कार्यक्रमांच्या निमंत्रण पत्रिकेत मराठी भाषेला प्राधान्य असणे अपेक्षित असताना, संबंधित पत्रिका पूर्णपणे हिंदी भाषेत असल्याने स्थानिक मराठी भाषिक नागरिकांमध्ये नाराजी व्यक्त होत आहे.

Rohit Pawar on Congress: रोहित पवार काँग्रेसच्या वाटेवर? राहुल गांधींसोबतच्या वाढत्या जवळीकतेमुळे राजकीय चर्चांना उधाण

भाजपच्या पक्षीय प्रोटोकॉलवरही प्रश्नचिन्ह

या निमंत्रण पत्रिकेवरून केवळ भाषेचा मुद्दाच नव्हे, तर भारतीय जनता पक्षाच्या अंतर्गत प्रोटोकॉलबाबतही प्रश्न उपस्थित झाले आहेत. पक्षाच्या जिल्हाध्यक्षांचे नाव निमंत्रण पत्रिकेत सर्वात खाली देण्यात आले असून, त्यापेक्षा लल्लन तिवारी यांचे नाव वरच्या क्रमांकावर छापण्यात आल्याचा आरोप आहे.पक्षाच्या वरिष्ठ पदाधिकाऱ्यांच्या नावांचा क्रम, त्यांचे पद आणि निमंत्रण पत्रिकेतील प्रोटोकॉल याकडे दुर्लक्ष करण्यात आल्याने भाजपच्या अंतर्गत शिस्तीचे पालन नेमके कोण करणार, असा सवाल विरोधकांकडून केला जात आहे.

स्थायी समिती सभापतींच्या नावाचीही चूक

याशिवाय भाजपचे स्थायी समिती सभापती हसमुख गहलोत यांच्या नावातही निमंत्रण पत्रिकेत चूक झाल्याचे समोर आले आहे. ‘गहलोत’ऐवजी ‘महलोत’ असा उल्लेख करण्यात आल्याने निमंत्रण पत्रिका तयार करणाऱ्यांनी किमान नावांची पडताळणी तरी केली होती का, असा प्रश्न उपस्थित होत आहे. एका लोकप्रतिनिधीच्या कार्यालयाच्या उद्घाटनाच्या निमंत्रण पत्रिकेत भाषेपासून ते पक्षीय पदाधिकाऱ्यांच्या नावांच्या क्रमापर्यंत आणि वरिष्ठ पदाधिकाऱ्यांच्या नावांच्या स्पेलिंगपर्यंत चुका झाल्याने ही बाब राजकीय चर्चेचा विषय बनली आहे.

“महापालिकेच्या कार्यक्रमात मराठीला स्थान नाही का?”

विरोधकांनी या संपूर्ण प्रकारावर आक्षेप घेत, महानगरपालिका प्रशासनाशी संबंधित कार्यक्रमाच्या निमंत्रण पत्रिकेत मराठी भाषेला योग्य स्थान मिळणे आवश्यक असल्याचे म्हटले आहे. स्थानिक नागरिकांच्या करातून चालणाऱ्या महापालिकेच्या कार्यक्रमात स्थानिक भाषेचा वापर करण्याऐवजी संपूर्ण पत्रिका हिंदीत काढणे हा मराठी भाषिक नागरिकांच्या भावनांचा अनादर असल्याची टीका केली जात आहे.दरम्यान, निमंत्रण पत्रिकेतील नावांचा क्रम, भाषेचा वापर आणि नावांमधील चुका याबाबत परिवहन सभापती राजकुमार मिश्रा यांची भूमिका काय आहे, याकडे आता सर्वांचे लक्ष लागले आहे. भाषेपासून पक्षीय प्रोटोकॉलपर्यंत अनेक बाबींवर प्रश्नचिन्ह निर्माण झालेल्या या निमंत्रण पत्रिकेमुळे उद्घाटन सोहळ्यापूर्वीच परिवहन सभापती राजकुमार मिश्रा अडचणीत आले आहेत.

मालेगाव महापालिकेत पुन्हा टिपू सुलतानांचा फोटो; दादा भुसे म्हणाले, ‘फोटो असेल तर काढायला लावणार’