भाजपच्या ‘मुखात राम, शेजारी अदानी’; उद्धव ठाकरेंचा हल्लाबोल

उपमुख्यमंत्री अजित पवार हे अर्थमंत्रिपदाचा गैरवापर करून मतदारांना निधीचे आमिष दाखवत मते मागत आहेत. जर त्यांच्या उमेदवारांना मतदान केले नाही तर ते निधी देणार नाही, असे धमकावत आहे.

मुंबई : नगरपालिका-नगरपंचायत निवडणुका जिंकण्यासाठी सत्ताधाऱ्यांकडून मोठ्या प्रमाणात पैशांचा वापर करण्यात येत आहे, असा हल्लाबोल माजी मुख्यमंत्री तथा शिवसेना (उबाठा) पक्षप्रमुख उद्धव ठाकरे यांनी महायुतीवर केला. महायुतीतील मित्र पक्षच एकमेकांची पोलखोल करत आहे, असेही ते म्हणाले.

उपमुख्यमंत्री अजित पवार हे अर्थमंत्रिपदाचा गैरवापर करून मतदारांना निधीचे आमिष दाखवत मते मागत आहेत. जर त्यांच्या उमेदवारांना मतदान केले नाही तर ते निधी देणार नाही, असे धमकावत आहे. तसेच शिवसेना शिंदे गटाचे आमदार निलेश राणे यांनी मालवणमध्ये भाजप पदाधिकारी विजय केनवडेकर यांच्या घरावर छापा टाकून त्यांच्या घरात २५ लाख रुपये असल्याचे लाईव्ह चित्रीकरणाद्वारे दाखवले. तर शुक्रवारी शिंदे गटाच्या कार्यकर्त्यांनी अजित पवार गटाच्या महिला कार्यकर्त्यांकडून पैशांचे पाकिटे वाटप करण्यात येत असल्याचा आरोप करण्यात येत आहे. यावरून स्पष्ट होते की, स्थानिक स्वराज्य संस्थांच्या निवडणुकीत सत्ताधाऱ्यांकडून पैसे वाटपाचा गैरप्रकार सुरू आहे. यापूर्वी असे वातावरण कधीही पाहिले नाही, असेही ठाकरे म्हणाले.

हेदेखील वाचा : Maharashtra Politics: तळकोकणात वाद तर रत्नागिरीमध्ये महायुतीचा विजयाचा दावा; ‘मविआ’चे टेंशन वाढले

दरम्यान, नाशिकमध्ये अद्याप पालकमंत्री नियुक्त न केल्याबद्दल उद्धव ठाकरे यांनी महायुती सरकारवर निशाणा साधला. ते म्हणाले, नाशिकचा पालकमंत्री कोण, यावरून सत्ताधाऱ्यांमध्ये ओढाताण सुरू आहे. त्यामुळे नाशिक जिल्हा पालकमंत्र्यांअभावी पोरका झाला आहे. याचे उत्तर कुंभमेळ्यावर होणाऱ्या खर्चात आहे का?, असा खोचक सवालही त्यांनी उपस्थित केला.

भाजपच्या ‘मुखात राम, शेजारी अदानी’

नाशिकमध्ये होणाऱ्या सिंहस्थ कुंभमेळ्याच्या तयारीसाठी तपोवन परिसरात ११५० एकर जागेवर साधू ग्राम बांधण्यासाठी १८०० झाडे तोडण्याच्या प्रस्तावावरही उद्धव ठाकरे यांनी निशाणा साधला. ते म्हणाले, शेजारी अदानी असेच आहे. पण आम्ही एकही झाड तोडू देणार नाही. कुंभमेळा झालाच पाहिजे. संत आणि भाविकांची कोणतीही गैरसोय होऊ नये, यासाठी सुविधा पुरवणे ही सरकारची जबाबदारी आहे. परंतु, या कामात पारदर्शकता असली पाहिजे, असेही त्यांनी म्हटले आहे.

हे देखील वाचा : ‘पंतप्रधान नरेंद्र मोदी, मुख्यमंत्री देवेंद्र फडणवीस यांच्या सक्षम नेतृत्त्वावर जनतेचा विश्वास’; शिवेंद्रसिंहराजेंचं विधान