
Dr Amar Bhandage 100 Marathons
धावण्याची सुरुवात केवळ आवड म्हणून करणाऱ्या डॉ. भडंगे यांनी पुढे धावण्यालाच आपल्या जीवनाचा अविभाज्य भाग बनवले. पहाटेचा नियमित सराव, हजारो किलोमीटरचे अंतर, शरीराचा थकवा, दुखापती, वेदना आणि अनेक अडचणींवर मात करत त्यांनी हा प्रवास सातत्याने सुरू ठेवला. अनेकदा शरीराने विश्रांतीचे संकेत दिले; मात्र मनातील ध्येय आणि जिद्दीच्या बळावर त्यांनी प्रत्येक वेळी नव्या उत्साहाने धावण्यास सुरुवात केली.
त्यांच्या १५ वर्षांच्या धावण्याच्या कारकिर्दीत तीन अल्ट्रा मॅरेथॉन, १० फुल मॅरेथॉन, २५ किलोमीटरच्या बीएनपी बोरिवली स्पर्धेत सात वेळा सहभाग, २१ किलोमीटरच्या हाफ मॅरेथॉनच्या ७८ स्पर्धा आणि सुरुवातीच्या टप्प्यातील १० किलोमीटरच्या दोन पात्रता धावा अशा एकूण १०० स्पर्धांचा समावेश आहे.
या प्रवासातील सर्वात उल्लेखनीय कामगिरी म्हणजे २०१६ मध्ये दक्षिण आफ्रिकेत पार पडलेली ९० किलोमीटरची ‘कॉम्रेड्स मॅरेथॉन’ पूर्ण करण्याचा पराक्रम. जगातील अत्यंत कठीण आणि आव्हानात्मक अल्ट्रा मॅरेथॉन स्पर्धांमध्ये गणल्या जाणाऱ्या या स्पर्धेत सहभागी होऊन ती पूर्ण करणे ही त्यांच्या धावण्याच्या कारकिर्दीतील महत्त्वाची उपलब्धी ठरली आहे.
डॉ. भडंगे यांच्या मते, १०० मॅरेथॉनचा टप्पा हा केवळ वैयक्तिक यश नसून त्यामागे कुटुंबीयांचे प्रेम, मित्रपरिवाराची साथ, प्रशिक्षकांचे मार्गदर्शन, सहकारी धावपटूंचे प्रोत्साहन आणि हितचिंतकांचे आशीर्वाद आहेत. धावण्याच्या निमित्ताने विविध शहरांमध्ये केलेले प्रवास, सहकारी धावपटूंसोबत धावलेले असंख्य किलोमीटर, एकत्रित सराव, गप्पा आणि स्पर्धांमधील अनुभव हा त्यांच्या आयुष्यातील अनमोल ठेवा असल्याची भावना त्यांनी व्यक्त केली.
सुरुवातीच्या धावण्यापासून ते दक्षिण आफ्रिकेतील ९० किलोमीटरच्या आव्हानात्मक स्पर्धेपर्यंत आणि आता शंभराव्या मॅरेथॉनपर्यंतच्या प्रवासात साथ देणाऱ्या प्रत्येक व्यक्तीचे त्यांनी मनापासून आभार मानले आहेत.
शंभर मॅरेथॉन पूर्ण करण्याचा टप्पा गाठल्यानंतरही डॉ. अमर भडंगे यांची धावण्याची जिद्द कायम आहे. आगामी काळात देशातील विविध शहरांसह परदेशातील मॅरेथॉन स्पर्धांमध्ये सहभागी होऊन नवनवीन आव्हाने स्वीकारण्याचा त्यांचा संकल्प आहे. त्यामुळे २२ नोव्हेंबर रोजी मुंबईत होणारी त्यांची शंभरावी मॅरेथॉन ही केवळ एका आकड्याची पूर्तता नसून १५ वर्षांच्या अथक परिश्रमांची, संघर्षाची आणि अविरत ध्येयवेडाची गौरवशाली पावती ठरणार आहे.’स्माइल प्लीज’ हा संदेश देत स्वतःच्या चेहऱ्यावरील हास्य आणि मनातील जिद्द कायम ठेवणाऱ्या डॉ. अमर भडंगे यांचा हा प्रवास नवोदित धावपटूंसाठी निश्चितच प्रेरणादायी ठरणारा आहे.