Pune: युवा खेळाडूंचा जलवा! DSP करंडक स्पर्धेत ढोले-पाटील अकादमीची विजयाची हॅट्रिक; ‘या’ संघाचा दारुण पराभव

Pune: दुसऱ्या सामन्यात ढोले पाटील क्रिकेट अकादमीने प्रथम फलंदाजी करताना निर्धारित २५ षटकांत सात गडी गमावून २२४ धावांचा भक्कम डोंगर उभारला. नुवान चांदेकर याने ४१ चेंडूंत १० चौकारांसह ५२ धावांची खेळी केली.

• डीएसपी करंडकमध्ये ढोले पाटील अकादमीचा तिसरा विजय
  
• १० वर्षांखालील स्पर्धेत व्हिबग्योरचीही विजयी कामगिरी
  
• रिदान देसाईची भेदक गोलंदाजी

Pune: डीएसपी स्पोर्ट्स अँड इव्हेंट्स यांच्या वतीने आयोजित पहिल्या डीएसपी करंडक १० वर्षांखालील क्रिकेट स्पर्धेत ढोले पाटील क्रिकेट अकादमीने सलग तिसरा विजय नोंदवत आपली विजयी घोडदौड कायम ठेवली. साखळी फेरीतील सामन्यात ढोले पाटील अकादमीने व्हिबग्योर क्रिकेट अकादमीचा तब्बल १५२ धावांनी पराभव केला. अन्य सामन्यात व्हिबग्योर क्रिकेट अकादमीने पुणे फ्युचर स्टार्स संघावर दोन गडी राखून मात करत स्पर्धेतील दुसरा विजय मिळवला.

वाघोली येथील पुणे क्रिकेट क्लबच्या मैदानावर सुरू असलेल्या या स्पर्धेत पहिल्या सामन्यात पुणे फ्युचर स्टार्स संघाने प्रथम फलंदाजी करताना २३.४ षटकांत सर्वबाद १२५ धावा केल्या. सर्वज्ञ बोऱ्हाडे (२०) आणि यतीन शर्मा (१७) यांनी धावा केल्या. व्हिबग्योरकडून गितांश बारस्कर याने प्रभावी गोलंदाजी करत १४ धावांत तीन गडी बाद केले. आहिल शेख आणि श्रेयांशी दास यांनी प्रत्येकी दोन गडी बाद केले.प्रत्युत्तरात व्हिबग्योर क्रिकेट अकादमीनेही २३.४ षटकांत आठ गडी गमावून १२६ धावा करत विजयाचे लक्ष्य पूर्ण केले. वेदांत कुमार (१७), दीपक देवरानी (१४) आणि राकेश कुमार (नाबाद ९) यांनी योगदान दिले. पुणे फ्युचर स्टार्सकडून यतीन शर्मा याने १८ धावांत चार गडी बाद केले. मात्र, व्हिबग्योरने दोन गडी राखून विजय मिळवला. अष्टपैलू कामगिरी करणारा गितांश बारस्कर सामनावीर ठरला.

Naushad Khan Viral Video: वडिलांची शिकवण कामी आली! नौशाद खान यांच्या लेकाने मोडला ३५ वर्षांचा विक्रम

 नुवानची सुंदर फटकेबाजी

दुसऱ्या सामन्यात ढोले पाटील क्रिकेट अकादमीने प्रथम फलंदाजी करताना निर्धारित २५ षटकांत सात गडी गमावून २२४ धावांचा भक्कम डोंगर उभारला. नुवान चांदेकर याने ४१ चेंडूंत १० चौकारांसह ५२ धावांची खेळी केली. त्याला प्रतीक राठोड याने नाबाद ५४ धावा करत मोलाची साथ दिली. प्रतीकने ३५ चेंडूंत नऊ चौकार लगावले. पार्थ निकम यानेही २४ चेंडूंत चार चौकार आणि एका षटकारासह नाबाद ३७ धावा करत धावसंख्येत भर घातली.

प्रतिकची दमदार कामगिरी

२२५ धावांच्या आव्हानाचा पाठलाग करताना व्हिबग्योर क्रिकेट अकादमीचा डाव १९.५ षटकांत अवघ्या ७२ धावांत आटोपला. आवीर सेठी (१०) याच्याशिवाय अन्य फलंदाजांना मोठी खेळी करता आली नाही. ढोले पाटीलकडून रिदान देसाई याने केवळ एका धावेच्या मोबदल्यात चार गडी बाद करत प्रतिस्पर्धी संघाचे कंबरडे मोडले. प्रतीक राठोड यानेही २२ धावांत दोन गडी बाद केले. भेदक गोलंदाजी करणारा रिदान देसाई सामनावीर ठरला. या विजयासह ढोले पाटील अकादमीने स्पर्धेत सलग तिसऱ्या विजयाची नोंद केली.

Cricket News: प्रियांश राठोडची फटकेबाजी, विहान बोकरियाचा विकेट्सचा चौकार; सीएनए अंतिम फेरीत