National Squash Championship : राष्ट्रीय स्क्वॉश स्पर्धेत रथिका, निरुपमा यांची विजयी आगेकूच; उपांत्यपूर्व फेरीत धडक
National Squash Championship : एचसीएल 82 व्या राष्ट्रीय स्क्वॉश अजिंक्यपद स्पर्धेत अव्वल मानांकित रथिका सुथंथिरा सीलन आणि महाराष्ट्राची निरुपमा दुबे यांनी प्रतिस्पर्ध्यांवर सहज मात करत महिला एकेरीच्या उपांत्यपूर्व फेरीत प्रवेश केला. गोव्याच्या यश फडतेनेही पुरुष गटात दमदार विजय नोंदवत अंतिम आठ खेळाडूंमध्ये स्थान मिळवले.
स्क्वॉश रॅकेट्स फेडरेशन ऑफ इंडियाच्या (एसआरएफआय) वतीने आयोजित ही स्पर्धा वांद्रे येथील ऑटर्स क्लबच्या ग्लास-बॅक कोर्टवर सुरू आहे. गुरुवारी झालेल्या महिला गटातील उपउपांत्यपूर्व फेरीच्या सामन्यात तामिळनाडूच्या अव्वल मानांकित रथिका सुथंथिरा सीलनने आपल्याच राज्याच्या व्ह्योमिका खंडेलवालचा 11-3, 11-2, 11-9 असा सरळ तीन गेममध्ये पराभव केला.
महाराष्ट्राच्या दुसऱ्या मानांकित निरुपमा दुबेनेही आपली विजयी घोडदौड कायम ठेवली. तिने महाराष्ट्राच्याच अश्मिरा बेगचा ११-३, ११-३, ११-२ असा एकतर्फी पराभव करत उपांत्यपूर्व फेरी गाठली.
वसुंधरा नांगरे हिला मात्र विजयासाठी चांगलीच झुंज द्यावी लागली. तिने उन्नती त्रिपाठीविरुद्ध 11-7, 7-11, 13-11, 9-11, 11-9 असा पाच गेमपर्यंत रंगलेला सामना जिंकला. अनिका दुबेने आशी शाहवर, तर आद्या बुधियाने दिवा शाहवर मात करत पुढील फेरीत प्रवेश केला.
पुरुष गटात ओम सेमवालने तुषार शहाणीचा 12-10, 11-2, 11-4 असा पराभव केला. राहुल बैथाने हृदान शाहवर 11-4, 11-4, 11-5 अशी मात केली. गोव्याच्या यश फडतेने आर्यन प्रताप सिंगला 11-4, 11-5, 11-0 असे पराभूत करत सरळ गेममध्ये विजय मिळवला. वेदांत पटेलने पुरव रांभियाविरुद्धचा चुरशीचा सामना 12-14, 11-4, 12-10, 11-9 असा जिंकत उपांत्यपूर्व फेरीकडे वाटचाल केली.
या स्पर्धेत महिला आणि पुरुष गटातील खेळाडूंमध्ये पुढील फेरीसाठी चुरस वाढली असून, आगामी सामने अधिक रंगतदार होण्याची अपेक्षा आहे. तसेच स्पर्धेदरम्यान प्रेक्षकांचाही चांगला पाठिंबा मिळत असल्याने खेळाडूंनाही चांगले प्रोत्साहन मिळत आहे.
Ans: रथिकाने महिला गटातील उपउपांत्यपूर्व फेरीत व्ह्योमिका खंडेलवालचा 11-3, 11-2, 11-9 असा पराभव केला.
Ans: महाराष्ट्राच्या निरुपमा दुबेने अश्मिरा बेगचा 11-3, 11-3, 11-2 असा पराभव केला.
Ans: वसुंधराने उन्नती त्रिपाठीविरुद्ध पाच गेमपर्यंत रंगलेला सामना 11-7, 7-11, 13-11, 9-11, 11-9 असा जिंकला.






