रविवार, 27 सप्टेंबर 2026
Maharashtra Badminton Association च्या अध्यक्षपदी अरुण लखानी, सिद्धार्थ पाटील यांची मानद सरचिटणीसपदी बिनविरोध निवड, सौजन्य : सोशल मीडिया
महाराष्ट्र बॅडमिंटन असोसिएशनच्या (एमबीए) (Maharashtra Badminton Association) २०२६ ते २०३० या कालावधीसाठीच्या कार्यकारिणी निवडणुकीत विद्यमान अध्यक्ष अरुण लखानी यांची अध्यक्षपदी बिनविरोध निवड झाली आहे. त्यांच्यासोबतच छत्रपती संभाजीनगरचे शिरीष बोराळकर यांची कार्याध्यक्षपदी, मंगेश काशीकर यांची वरिष्ठ उपाध्यक्षपदी, तर अनुभवी संघटक सिद्धार्थ पाटील यांची मानद सरचिटणीसपदी बिनविरोध निवड झाली आहे.
या प्रमुखांच्या नेतृत्वामुळे राज्यातील बॅडमिंटन वर्तुळाला नवी दिशा आणि भक्कम प्रशासकीय पाठबळ लाभले आहे. मुंबई उच्च न्यायालयाचे निवृत्त न्यायमूर्ती तथा निवडणूक निर्णय अधिकारी (रिटर्निंग ऑफिसर) अरुण चौधरी यांनी अधिकृतरीत्या वैध उमेदवारांची अंतिम यादी जाहीर केली. सर्वच पदांसाठी प्रत्येकी एकच वैध अर्ज आल्यामुळे निवडणूक बिनविरोध झाली आहे.
राज्यातील बॅडमिंटनचा पाया अधिक मजबूत करण्यात आणि आंतरराष्ट्रीय दर्जाच्या पायाभूत सुविधा निर्माण करण्यात अरुण लखानी यांचे योगदान मोठे राहिले आहे. आता त्यांच्यासोबत कार्याध्यक्ष म्हणून शिरीष बोराळकर आणि मानद सरचिटणीस म्हणून सिद्धार्थ पाटील हे मराठवाड्याचे दोन खंदे नेतृत्व एमबीएच्या कारभाराची प्रमुख धुरा सांभाळणार आहेत.
तसेच नागपूरचे मंगेश काशीकर यांच्याकडे वरिष्ठ उपाध्यक्षपदाची जबाबदारी सोपवण्यात आलेली आहे. त्यांच्याकडूनही मोठ्या अपेक्षा आहेत.
या कार्यकारिणीत युवा पदाधिकारी यांची संख्या भरपूर असून संघटनेचा युवा चेहरा आगामी काळात बॅडमिंटन खेळाला एका नव्या उंचीवर नेऊन ठेवण्यास कारणीभूत ठरणार आहे. यंग टीममुळे ग्रामीण व निमशहरी भागातील खेळाडू, स्पर्धांचे नियोजन आणि संघटनात्मक मजबुतीकरणाला मोठी गती मिळणार आहे.
महाराष्ट्र बॅडमिंटन असोसिएशन कार्यकारिणी (२०२६ ते २०३०)
अध्यक्ष – अरुण लखानी (नागपूर), कार्याध्यक्ष – शिरीष बोराळकर (छत्रपती संभाजीनगर), वरिष्ठ उपाध्यक्ष – मंगेश काशीकर (नागपूर), मानद सरचिटणीस – सिद्धार्थ पाटील (छत्रपती संभाजीनगर), उपाध्यक्ष – वृषालीराजे शिवाजीराजे भोसले (सातारा), पंकज ठाकूर (पालघर), ओंकार हजारे (रत्नागिरी), परेश ठाकूर (रायगड), जोवेल चांदेकर (चंद्रपूर), विजय पळसकर (बुलढाणा).
सचिव व कोषाध्यक्ष – मानद स्पर्धा सचिव – प्रसाद गोखले (पालघर), मानद प्रशिक्षण व विकास सचिव – आनंद जोशी (पुणे), मानद कोषाध्यक्ष – जगदीश जोशी (नागपूर), मानद सहसचिव – सचिन भारती.
नियामक मंडळ सदस्य – महेश वाक्रडकर (नांदेड), पराग एकंडे (नाशिक), मिलिंद कुलकर्णी (अहिल्यानगर), दिनेश पाटील (धुळे), समीर पाटणकर (बामू), विनीत जोशी (जळगाव), नागोजी चिलकरवार (जालना), दिनेश धूत (अकोला), साईदास खानगव (कोल्हापूर), स्नेहा विंदा फैजपूरकर (नागपूर), मुकेश नागपुरे (गडचिरोली).
