शुक्रवार, 25 सप्टेंबर 2026
लडाखच्या खारदुंग ला वर पुणेकरांचा झेंडा (फोटो- सोशल मिडिया)
या अत्यंत अवघड शर्यतीत मनीष धामंगे यांनी ११ तास ४६ मिनिटे २५ सेकंद (११:४६:२५) अशी वेळ नोंदवली, तर राहुल गुरुंग यांनी १२ तास ०७ मिनिटे ४७ सेकंद (१२:०७:४७) वेळेत ही ७२ किलोमीटरची अंतर शर्यत पूर्ण केली. लडाखच्या अत्यंत आव्हानात्मक आणि प्रतिकूल हवामानात दोन्ही धावपटूंनी आपल्या शारीरिक आणि मानसिक क्षमतेची पराकाष्ठा करत हे यश मिळवले.
ही शर्यत समुद्रसपाटीपासून १७ हजार फुटांपेक्षा जास्त उंचीवर असलेल्या जगप्रसिद्ध ‘खारदुंग ला’ या खिंडीतून जाते. अतिउंचीवर असणारी विरळ हवा, ऑक्सिजनची अत्यंत कमी पातळी, श्वास घेण्यास होणारा त्रास आणि अचानक बदलणारे गोठवणारे हवामान यामुळे ही शर्यत जगातील सर्वात कठीण मॅरेथॉनपैकी एक मानली जाते. अशा परिस्थितीत धावण्यासाठी केवळ शारीरिक ताकदच नाही, तर प्रचंड मानसिक खंबीरपणाची गरज असते.
मनीष आणि राहुल यांच्या या ऐतिहासिक कामगिरीमागे प्रशिक्षक विजय बनसोड तसेच ‘टीम स्पोर्टिफाय’ यांच्या मार्गदर्शनाखाली केलेली अनेक महिन्यांची कठोर आणि नियोजनबद्ध तयारी होती. या सरावामध्ये लांब पल्ल्याचे धावणे, डोंगराळ भागात चढ-उताराचे प्रशिक्षण, सहनशक्ती वाढवणारे विशेष व्यायाम आणि उंचावरील प्रतिकूल हवामानाशी जुळवून घेण्यासाठी केलेले विशेष सरावसत्र समाविष्ट होते.
या कामगिरीबद्दल बोलताना प्रशिक्षक विजय बनसोड म्हणाले, “खारदुंग ला ही केवळ ७२ किलोमीटर धावण्याची शर्यत नसून, ती शिस्त, संयम आणि मानवी जिद्दीची खरी कसोटी असते. मनीष आणि राहुल यांनी सरावादरम्यान दाखवलेली निष्ठा आणि कठोर मेहनत याचेच हे फळ आहे. त्यांचे हे यश ‘टीम स्पोर्टिफाय’सह संपूर्ण पुणेकर धावपटूंच्या समुदायासाठी अत्यंत अभिमानास्पद आणि प्रेरणादायी क्षण आहे.”
