Football: यजमान लोयोलाचा दुहेरी पराभव! सेंट व्हिन्सेंट्स अन् ‘हे’ संघ ठरले फुटबॉलचे नवे चॅम्पियन

Football: यू-१६ गटाच्या अंतिम सामन्यात जेएन पेटिट टेक्निकल स्कूलने यजमान लोयोला हायस्कूलचा २-० असा पराभव केला. जेएन पेटिटच्या रुग्वेद घुलेने २८व्या मिनिटाला गोल करून संघाला आघाडी मिळवून दिली.

• लोयोला फुटबॉल कपवर बिशप्स कॅम्प, सेंट व्हिन्सेंट्स, जेएन पेटिटचे वर्चस्व
• बिशप्स कॅम्पचा यू–१२ मध्ये पिछाडीवरून विजय
  
• यू–१४ मध्ये सेंट व्हिन्सेंट्स, तर यू–१६ मध्ये जेएन पेटिटकडून यजमान लोयोलाचा पराभव

पुणे/Football: बिशप्स स्कूल, कॅम्प, सेंट व्हिन्सेंट्स हायस्कूल आणि जेएन पेटिट टेक्निकल स्कूल यांनी आपापल्या वयोगटांत विजेतेपद पटकावत लोयोला फुटबॉल कप २०२६ स्पर्धेची सांगता केली. पाषाण येथील लोयोला हायस्कूलच्या (Sports) मैदानावर रविवारी झालेल्या तीनही अंतिम लढती चुरशीच्या ठरल्या. लोयोला स्कूल आणि एक्स-लोयोला अल्युम्नी नेटवर्क (ELAN) यांच्या संयुक्त विद्यमाने, टाटा ऑटोकॉम्पच्या प्रायोजकत्वाखाली या स्पर्धेचे आयोजन करण्यात आले होते.

बिशप्स कॅम्पने यू-१२ गटाच्या अंतिम सामन्यात पिछाडीवरून खेळ करत विद्या व्हॅली स्कूलचा २-१ असा पराभव केला. यू-१४ गटात सेंट व्हिन्सेंट्स हायस्कूलने यजमान लोयोला हायस्कूलवर ३-० असा एकतर्फी विजय मिळवला, तर यू-१६ गटात जेएन पेटिट टेक्निकल स्कूलने लोयोलाला २-० असे नमवून विजेतेपदावर नाव कोरले.

Football: पुण्यात फुटबॉलचा थरार! १६ वर्षांखालील गटात लॉयला हायस्कूल अन्…; फायनलमध्ये कोण भिडणार?

यू-१२ मध्ये बिशप्स कॅम्पचा दमदार पुनरागमन विजय

यू-१२ गटाच्या अंतिम सामन्यात विद्या व्हॅली स्कूलने सुरुवातीला आघाडी घेतली. आदित्य द्विवेदीने १९व्या मिनिटाला गोल करून संघाला १-० अशी आघाडी मिळवून दिली. मात्र, बिशप्स कॅम्पने हार न मानता जोरदार पुनरागमन केले. २६व्या मिनिटाला प्राणव मेननने पेनल्टीवर गोल करत संघाला १-१ अशी बरोबरी साधून दिली. त्यानंतर एहान पठाणने ३१व्या मिनिटाला निर्णायक गोल नोंदवत बिशप्स कॅम्पला २-१ अशी आघाडी मिळवून दिली. उर्वरित वेळेत ही आघाडी कायम राखत बिशप्स कॅम्पने यू-१२ गटाचे विजेतेपद पटकावले.

रेयानच्या दोन गोलमुळे सेंट व्हिन्सेंट्स विजयी

यू-१४ गटाच्या अंतिम सामन्यात सेंट व्हिन्सेंट्स हायस्कूलने यजमान लोयोला हायस्कूलचा ३-० असा पराभव करत विजेतेपद मिळवले. रेयान पंजाबीने १४व्या मिनिटाला गोल करून सेंट व्हिन्सेंट्सला आघाडी मिळवून दिली. त्यानंतर अर्जुन सावंतने २०व्या मिनिटाला गोल करत आघाडी २-० अशी केली. सामन्याच्या ४६व्या मिनिटाला रेयानने वैयक्तिक दुसरा गोल नोंदवत संघाच्या विजयावर शिक्कामोर्तब केले.

यू-१६ मध्ये जेएन पेटिटकडून लोयोलाला धक्का

यू-१६ गटाच्या अंतिम सामन्यात जेएन पेटिट टेक्निकल स्कूलने यजमान लोयोला हायस्कूलचा २-० असा पराभव केला. जेएन पेटिटच्या रुग्वेद घुलेने २८व्या मिनिटाला गोल करून संघाला आघाडी मिळवून दिली. त्यानंतर बरोबरी साधण्यासाठी लोयोलाने प्रयत्न केले; मात्र जेएन पेटिटच्या बचावफळीने त्यांचे प्रयत्न हाणून पाडले. ५१व्या मिनिटाला युग चौहानने दुसरा गोल नोंदवत जेएन पेटिटची आघाडी २-० अशी केली. ही आघाडी अखेरपर्यंत कायम राखत जेएन पेटिटने यू-१६ गटाचे विजेतेपद पटकावले.

यजमान लोयोला हायस्कूलला यू-१४ आणि यू-१६ या दोन्ही गटांत उपविजेतेपदावर समाधान मानावे लागले.

स्पर्धेच्या समारोपप्रसंगी टाटा ऑटोकॉम्पचे उपाध्यक्ष डॉ. अरविंद गोयल यांच्या हस्ते पारितोषिके प्रदान करण्यात आली. यावेळी टाटा ऑटोकॉम्पचे महाव्यवस्थापक कौस्तुभ म्हाडगुत, लोयोला हायस्कूलचे प्राचार्य फादर नेल्टन, सेंट व्हिन्सेंट्स हायस्कूलचे प्राचार्य फादर टायटस, सेंट व्हिन्सेंट्स कॉलेजचे संचालक फादर अनिश, ELANचे अध्यक्ष नितीन जोशी, उपाध्यक्ष हरजीत माथारू, सचिव रोहित नाईक, खजिनदार प्रतीक जवळे आणि समिती सदस्य मनोज वालवेकर उपस्थित होते.

Loyola Football Cup 2026 मध्ये गोल्सचा धडाका अन्…; ‘या’ चार संघांचा दणदणीत विजय

निकाल – अंतिम सामने

यू-१२ : बिशप्स स्कूल, कॅम्प २ (प्राणव मेनन २६वे मिनिट, पेनल्टी; एहान पठाण ३१वे मिनिट) वि. विद्या व्हॅली स्कूल १ (आदित्य द्विवेदी १९वे मिनिट).

यू-१४ : सेंट व्हिन्सेंट्स हायस्कूल ३ (रेयान पंजाबी १४वे, ४६वे मिनिट; अर्जुन सावंत २०वे मिनिट) वि. लोयोला हायस्कूल ०.

यू-१६ : जेएन पेटिट टेक्निकल स्कूल २ (रुग्वेद घुले २८वे मिनिट; युग चौहान ५१वे मिनिट) वि. लोयोला हायस्कूल