मंगळवार, 13 ऑक्टोबर 2026
लोयोला फुटबॉल चषक २०२६ (फोटो- सोशल मिडिया)
लोयोला हायस्कूल, पाषाण येथील मैदानावर सोमवारी झालेल्या उपांत्यपूर्व फेरीच्या सामन्यांत बिशप्सच्या कौस्तुभ पंचारे आणि जे. एन. पेटिटच्या दानिश गोनाल यांनी हॅट्ट्रिक नोंदवत दिवस गाजवला.
१४ वर्षांखालील गटात बिशप्स को-एड स्कूल, उंड्री संघाने द कल्याणी स्कूलचा ७-१ असा धुव्वा उडवला. कौस्तुभ पंचारेने (३५, ४०, ४५ मि.) हॅट्ट्रिक नोंदवत विजयात सिंहाचा वाटा उचलला. जेडन डेव्हिडने (३५, ४७ मि.) दोन गोल केले, तर सालिफ बेग (८ मि.) आणि श्रेयान सिंग (३४ मि.) यांनी प्रत्येकी एक गोल नोंदवला. कल्याणी स्कूलकडून अक्षज अगरवालने (४२ मि.) एकमेव गोल केला.
याच गटातील अन्य लढतीत लोयोला हायस्कूलने जे. एन. पेटिट टेक्निकल स्कूलचा ६-१ असा फडशा पाडला. विशेष म्हणजे, अगस्त्य बर्डेने सातव्याच मिनिटाला गोल करून पेटिटला आघाडी मिळवून दिली होती. मात्र, त्यानंतर लोयोलाने सलग सहा गोल करत सामन्याचे चित्रच पालटले. शॉन आंग्रे (१६, १८ मि.) आणि निवेद नायर (३६, ४१ मि.) यांनी प्रत्येकी दोन गोल केले. आरव इंगळे (८ मि.) आणि शार्दूल मनोहर (४५ मि.) यांनी प्रत्येकी एक गोल नोंदवला.
सेंट व्हिन्सेंट्स हायस्कूलनेही दमदार खेळ करत सेंट झेवियर्स हायस्कूलवर ३-० असा एकतर्फी विजय मिळवला. रयान पंजाबीने (११, ४९ मि.) दोन गोल झळकावले, तर अन्विक लोबोने (४७ मि.) एक गोल करत विजयावर शिक्कामोर्तब केले.
दोन गोलांनी पिछाडीवरून पेटिटचे आठ गोल!
१६ वर्षांखालील गटात जे. एन. पेटिट टेक्निकल स्कूलने अफलातून पुनरागमन करत इन्फंट जीझस स्कूलचा ८-२ असा धुव्वा उडवला. इन्फंट जीझसच्या शार्दूल करंडेने दुसऱ्या आणि दहाव्या मिनिटाला गोल करत संघाला २-० अशी आघाडी मिळवून दिली होती. मात्र, त्यानंतर पेटिटच्या खेळाडूंनी सलग आठ गोलांचा धडाका लावत प्रतिस्पर्ध्याला निष्प्रभ केले.
दानिश गोनालने (३०, ४७, ५० मि.) हॅट्ट्रिक साधली, तर ध्रुव पुजारीने (१३, २२ मि.) दोन गोल केले. तन्विश खैरनार (२५ मि.), युग चौहान (४६ मि.) आणि ऋग्वेद घुले (४८ मि.) यांनी प्रत्येकी एक गोल करत संघाचा दणदणीत विजय साकारला. याच गटातील चुरशीच्या लढतीत विद्या भवन हायस्कूलने ब्ल्यू रिज पब्लिक स्कूलवर १-० अशी निसटती मात केली. जोनाथन साळवेने ३८व्या मिनिटाला केलेला गोल निर्णायक ठरला. लोयोला स्कूल आणि एक्स-लोयोला अल्युमनी नेटवर्क (ELAN) यांच्या संयुक्त विद्यमाने आयोजित या स्पर्धेला टाटा ऑटोकॉमचे प्रायोजकत्व लाभले आहे.
