Table Tennis: १ गेम गमावला अन् मग रचला इतिहास! उपेंद्र मुळेने सोलापूरच्या अनंत कुलकर्णीला धूळ चारली

Table Tennis: स्पर्धेच्या ४० वर्षांवरील पुरुष सांघिक गटात योद्धाज ‘अ’ संघाने विजेतेपद पटकावले. अंतिम सामन्यात संतोष वक्राडकर आणि दीपक कदम यांच्या प्रभावी कामगिरीच्या जोरावर योद्धाज ‘अ’ संघाने योद्धाज ‘ब’ संघाचा ३-१ असा पराभव केला. 

• मास्टर्स टेबल टेनिस स्पर्धेत मानांकित खेळाडूंची दमदार कामगिरी
  
• एसएएस स्पोर्ट्स मॅनेजमेंटकडून स्पर्धेचे आयोजन
  
• कोल्हापूर येथील आनंद भवन सभागृहात पार पडली स्पर्धा 

पुणे/Table Tennis: एसएएस स्पोर्ट्स मॅनेजमेंटकडून आयोजित करण्यात आलेल्या दुसऱ्या महाराष्ट्र राज्य मानांकन मास्टर्स टेबल टेनिस स्पर्धेत उपेंद्र मुळे, मुनमुन मुखर्जी, मनीष रावत आणि शिल्पा जोशी यांनी आपापल्या प्रतिस्पर्ध्यांवर मात करत विजेतेपद पटकावले.कोल्हापूर येथील आनंद भवन सभागृहात पार पडलेल्या या स्पर्धेच्या अंतिम फेरीत ५० वर्षांवरील पुरुष गटात पुण्याच्या नवव्या मानांकित उपेंद्र मुळे याने सोलापूरच्या अनंत कुलकर्णी याचा चुरशीच्या लढतीत ९-११, ११-८, १४-१२, ११-५ असा पराभव केला. पहिला गेम गमावल्यानंतर उपेंद्रने खेळात जोरदार पुनरागमन करत सलग तीन गेम जिंकून विजेतेपदावर नाव कोरले.

५० वर्षांवरील महिला गटाच्या अंतिम सामन्यात ठाण्याच्या मुनमुन मुखर्जी हिने आपल्या शहरातील प्रतिस्पर्धी शिवप्रिया नाईक हिच्यावर सरळ तीन गेममध्ये ११-१, ११-५, ११-९ असा विजय मिळवला. सुरुवातीपासूनच आक्रमक खेळ करत मुनमुनने सामन्यावर वर्चस्व राखले आणि विजेतेपद पटकावले.

वेदांश, रावी, शौर्य अन् इराचा दणका! पीएमडीटीए ब्राँझ सिरीज Tennis स्पर्धेत पटकावले विजेतेपद…

मनीष रावत, शिल्पा जोशी यांची बाजी

५५ वर्षांवरील पुरुष गटाच्या अंतिम सामन्यात सोलापूरच्या चौथ्या मानांकित मनीष रावत याने पुण्याच्या सहाव्या मानांकित विवेक फडणीस याचा ८-११, ११-३, ११-३, ११-२ असा पराभव करत विजेतेपद मिळवले. पहिल्या गेममध्ये पिछाडीवर पडल्यानंतर मनीषने आपल्या अनुभवाचा पुरेपूर वापर करत पुढील तीन गेममध्ये वर्चस्व राखले.५५ वर्षांवरील महिला गटाच्या अंतिम सामन्यात कोल्हापूरच्या  शिल्पा जोशी हिने मुंबई शहरच्या अनघा जोशी हिच्यावर पाच गेमपर्यंत रंगलेल्या लढतीत ३-११, ११-८, ११-१३,  ११-९, ११-६ असा विजय मिळवत विजेतेपदावर शिक्कामोर्तब केले. चुरशीच्या या सामन्यात शिल्पाने निर्णायक पाचव्या गेममध्ये प्रभावी खेळ करत बाजी मारली.

घरडा इन्स्टिट्यूटची टेबल टेनिस स्पर्धेत सुवर्णमय कामगिरी; पुरुष संघाला सुवर्ण, तर महिला संघाला कांस्यपदक

सांघिक गटात योद्धाज ‘अ’ संघ विजेता

स्पर्धेच्या ४० वर्षांवरील पुरुष सांघिक गटात योद्धाज ‘अ’ संघाने विजेतेपद पटकावले. अंतिम सामन्यात संतोष वक्राडकर आणि दीपक कदम यांच्या प्रभावी कामगिरीच्या जोरावर योद्धाज ‘अ’ संघाने योद्धाज ‘ब’ संघाचा ३-१ असा पराभव केला. वैयक्तिक तसेच सांघिक गटातील रंगतदार लढतींमुळे या स्पर्धेला चांगलीच रंगत आली. अनुभवी खेळाडूंनी आपल्या कौशल्याचे दर्शन घडवत स्पर्धेत उत्कृष्ट कामगिरी केली.