Sergio Gor : भारत-अमेरिका संबंधांच्या कठीण टप्प्यात ट्रम्पचे निर्णायक पाऊल, सर्जियो गोर यांच्याकडे 'राजदूत' पदाची धुरा ( फोटो सौजन्य : सोशल मीडिया)
US Ambassador To India : भारत आणि अमेरिका यांच्यातील संबंधांचा सध्याचा टप्पा अत्यंत गुंतागुंतीचा मानला जात आहे. अशा वेळी अमेरिकेचे राष्ट्राध्यक्ष डोनाल्ड ट्रम्प यांनी ३८ वर्षीय सर्जियो गोर यांना भारतातील पुढील राजदूत तसेच दक्षिण-मध्य आशियासाठी विशेष दूत म्हणून नियुक्त केल्याने आंतरराष्ट्रीय पटलावर नवी चर्चा रंगली आहे.
अमेरिका-भारत संबंध मागील काही वर्षांत विविध तणावांनी व्यापले आहेत. व्यापार धोरणे, भू-राजकीय संघर्ष, पुरवठा साखळी सुरक्षा आणि तंत्रज्ञान क्षेत्रातील मतभेद या सर्वांचा परिणाम द्विपक्षीय संबंधांवर होत आहे. अशा वेळी सर्जियो गोर यांची नियुक्ती हे वॉशिंग्टनकडून दिलेले स्पष्ट संकेत आहेत नवी दिल्लीसोबत संवादाची नवी गती सुरू करणे हेच उद्दिष्ट आहे. व्हाईट हाऊस या निर्णयाकडे विश्वास पुनर्संचयित करण्याचा आणि धोरणात्मक भागीदारी दृढ करण्याचा प्रयत्न म्हणून पाहत आहे.
जागतिक घडामोडी संबंधित बातम्या वाचण्यासाठी येथे क्लिक करा : National Space Day 2025 : ISRO च्या यशाचे दुसरे पर्व साजरे; जाणून घ्या भारताच्या अंतराळ प्रवासाची महान गौरवगाथा
सर्जियो गोर यांची राजकीय कारकीर्द ही पूर्णपणे डोनाल्ड ट्रम्प यांच्या विश्वासावर आधारित आहे. रूढीवादी विचारसरणीशी घट्ट नाते ठेवणारे गोर हे ट्रम्प यांच्या सर्वात जवळच्या सहकाऱ्यांपैकी एक आहेत. त्यांचा कार्यशैलीतील काटेकोरपणा आणि प्रशासनातील कार्यक्षमता यामुळे व्हाईट हाऊसच्या अंतर्गत वर्तुळात त्यांचे महत्त्व वाढत गेले.
भारतासाठी राजदूत म्हणून आपले नाव जाहीर झाल्यानंतर सर्जियो गोर यांनी कृतज्ञता व्यक्त करत सोशल मीडियावर लिहिले :
“डोनाल्ड ट्रम्प यांनी भारतातील पुढील अमेरिकन राजदूत आणि दक्षिण-मध्य आशियाई व्यवहारांसाठी विशेष दूत म्हणून माझ्यावर दाखवलेल्या विश्वासाबद्दल मी त्यांचे मनःपूर्वक आभार मानतो. अमेरिकन जनतेची सेवा करण्यापेक्षा मला दुसऱ्या कुठल्याही गोष्टीचा अधिक अभिमान वाटलेला नाही. आमच्या व्हाईट हाऊसने अमेरिकेला पुन्हा महान बनवण्यात ऐतिहासिक यश मिळवले आहे. अमेरिकेचे प्रतिनिधित्व करणे हा माझ्या आयुष्यातील सर्वात मोठा सन्मान असेल!”
अमेरिकेचे परराष्ट्र सचिव मार्को रुबियो यांनीही या नियुक्तीचं स्वागत केलं. त्यांनी ट्विट करत म्हटलं “भारतातील आमचे पुढील राजदूत म्हणून सर्जियो गोर यांना नामांकित करण्याचा राष्ट्राध्यक्षांचा निर्णय अत्यंत योग्य आहे. ते अमेरिकेचे एक उत्कृष्ट प्रतिनिधी ठरतील आणि जगातील आमच्या सर्वात महत्त्वाच्या संबंधांना अधिक बळकटी देतील.”
I am excited about the Presidents decisions to nominate @SergioGor to be our next Ambassador to India. He will be an excellent representative of America in one of the most important relationships our nation has in the world. — Marco Rubio (@marcorubio) August 22, 2025
credit : social media
जन्म व बालपण : गोर यांचा जन्म ताश्कंद येथे झाला. त्यांचे मूळ नाव सर्जियो गोरोचोव्स्की असून, लहानपणापासून ते विविध संस्कृतींमध्ये वाढले. काही वर्षे त्यांनी भूमध्यसागरातील माल्टा बेटावरही वास्तव्य केले.
शिक्षण : कॅलिफोर्नियामध्ये शालेय शिक्षण पूर्ण करून त्यांनी वॉशिंग्टन डीसी येथील जॉर्ज वॉशिंग्टन विद्यापीठात उच्च शिक्षण घेतले. विद्यार्थीदशेतूनच ते रूढीवादी राजकारणात सक्रिय होते.
धार्मिक ओळख : गोर स्वतःला कॅथोलिक म्हणून ओळखतात.
ट्रम्पशी संबंध : २०२१ मध्ये गोर यांनी डोनाल्ड ट्रम्प ज्युनियरसोबत Winning Team Publishing ची स्थापना केली. त्यामुळे त्यांना ट्रम्प कुटुंबाच्या सर्वांत जवळच्या सहकाऱ्यांमध्ये स्थान मिळाले.
जागतिक घडामोडी संबंधित बातम्या वाचण्यासाठी येथे क्लिक करा : India China Alliance : आता चीननेही भारताच्या हितासाठी जागतिक मंचावर उचलला मोठा झेंडा, 50% करावर थेट विरोध
गोर यांची प्रशासकीय कौशल्ये आणि राष्ट्राध्यक्षांच्या प्राधान्यक्रमांची अंमलबजावणी करण्याची क्षमता यामुळे त्यांना व्हाईट हाऊसने विशेष जबाबदाऱ्या दिल्या. त्यांनी विविध धोरणात्मक उपक्रमांत महत्त्वपूर्ण भूमिका बजावली. भारतासारख्या जागतिक शक्तीसमोर अमेरिकेचे प्रतिनिधित्व करण्याची ही संधी गोर यांच्यासाठी एक मोठं पाऊल मानली जात आहे.
भारत आणि अमेरिका हे आज जगातील दोन सर्वात महत्त्वाचे लोकशाही देश आहेत. या दोन्ही राष्ट्रांमधील संबंध कधीकधी कठीण टप्प्यावर पोहोचले तरी संवाद, विश्वास आणि सहकार्य हेच त्यांचे मूळ अधिष्ठान आहे. सर्जियो गोर यांची नियुक्ती ही त्याचाच एक नवा अध्याय ठरणार आहे. आता प्रश्न असा आहे की या तरुण, ऊर्जावान आणि ट्रम्प यांच्या विश्वासास पात्र असलेल्या चेहऱ्यामुळे भारत-अमेरिका संबंधांना नवी दिशा मिळेल का?
