रविवार, 1 नोव्हेंबर 2026
दिल्ली नाही, ढाका! राष्ट्रवादी काँग्रेसच्या नेतृत्वाखाली भारतविरोधी घोषणाबाजी; तारिक रहमान यांच्या विरोधात संतापाचा उद्रेक, त्यांच्या राजीनाम्याची मागणी ( फोटो सौजन्य : सोशल मीडिया )
बांगलादेशातील (India Bangladesh Ties) राजकीय आणि आर्थिक परिस्थिती दिवसेंदिवस अधिकच बिकट होत चालली आहे. देशातील वाढती महागाई, गंभीर वीज संकट आणि इंधन-गॅसच्या भीषण तुटवड्यामुळे सर्वसामान्य नागरिकांचा संयम सुटला आहे. या पार्श्वभूमीवर, नॅशनल सिटिझन पार्टीचे (NCP) प्रमुख नेते नाहिद इस्लाम यांच्या नेतृत्वाखाली राजधानी ढाका येथील राष्ट्रीय संग्रहालयासमोर हजारो आंदोलकांनी एकत्र येत सरकारविरोधात एल्गार पुकारला. मात्र, देशांतर्गत प्रश्नांवरील या आंदोलनाला राजकीय वळण देत सभेत ‘दिल्ली नाही, ढाका’ अशा भारतविरोधी घोषणा देण्यात आल्या, ज्यामुळे दक्षिण आशियातील राजनैतिक वर्तुळात मोठी खळबळ उडाली आहे.
ढाक्यात आयोजित या प्रचंड रॅलीला संबोधित करताना आंदोलकांनी बांगलादेशच्या सध्याच्या प्रशासनावर जोरदार टीका केली. जुलै २०२४ च्या ऐतिहासिक जनउठावातून शेख हसीना यांची सत्ता उलथवून टाकणाऱ्या आंदोलनातील प्रमुख चेहरा असलेले नाहिद इस्लाम यांनी थेट पंतप्रधान तारिक रहमान यांच्यावर निशाणा साधला. देशातील महागाई ८.५ टक्क्यांच्या पुढे गेली असून वीज आणि गॅसच्या तुटवड्यामुळे उद्योगधंदे ठप्प पडले आहेत.
या अपयशाला जबाबदार धरत आंदोलकांनी गृहमंत्री सलाहुद्दीन अहमद आणि ऊर्जा मंत्री इकबाल हसन महमूद टुकू यांच्या तात्काळ राजीनाम्याची मागणी लावून धरली आहे. जर या मंत्र्यांनी राजीनामे दिले नाहीत, तर संपूर्ण देशभरात आंदोलन छेडून थेट पंतप्रधानांच्या निवासाला वेढा घातला जाईल, असा इशाराही यावेळी देण्यात आला.
जागतिक घडामोडी संबंधित बातम्या वाचण्यासाठी येथे क्लिक करा : VIRAL VIDEO : पाकिस्तानी महिला न्यायाधीशांची कविता भारतात व्हायरल; ‘तुझ्या आशेपेक्षा जास्त…’ म्हणत तरुण वकिलांचे जिंकले मन
सभेतील आपल्या भाषणात नाहिद इस्लाम यांनी अत्यंत आक्रमक पवित्रा घेतला. ते म्हणाले, “आम्ही हजारो लोकांच्या बलिदानानंतर एका हुकूमशहाला देशातून हाकलून दिले होते. परंतु आता लंडनहून परतलेले तारिक रहमान हे भ्रष्टाचार, लूटमार आणि वसुलीचा नवा अजेंडा घेऊन आले आहेत. देशात आता एका नव्या हुकूमशहाचा उदय होत आहे. पण आम्ही जसे जुन्या हुकूमशहाला हरवले, तसेच या नव्या हुकूमशहाचाही पराभव करू.” या वक्तव्यामुळे बांगलादेशातील सत्ताधारी पक्ष आणि विरोधी पक्षांमधील संघर्ष अधिक चिघळण्याची शक्यता निर्माण झाली आहे.
आपल्या देशातील प्रशासकीय अपयश आणि आर्थिक संकटावरून जनतेचे लक्ष विचलित करण्यासाठी पुन्हा एकदा भारताला लक्ष्य करण्याचा प्रयत्न या मोर्च्यात दिसून आला. नॅशनल सिटिझन पार्टीच्या नेत्यांनी भारतावर बांगलादेशविरोधात षडयंत्र रचल्याचा अजब आरोप केला. नाहिद इस्लाम यांनी दावा केला की, सध्याचे तारिक रहमान सरकार बांगलादेशचे भारताच्या षडयंत्रांपासून संरक्षण करण्यात पूर्णपणे अपयशी ठरले आहे.
Unstoppable. Our fight continues until all 4 demands, including the resignation of the Home Minister, are met. InshaAllah! https://t.co/vSJsUf4n46 — Nahid Islam (@NahidIslam_24) October 30, 2026
credit – social media and Twitter
आपल्या भाषणात त्यांनी सीमावर्ती भागात होणाऱ्या कथित घटना, आसाम व पश्चिम बंगालमधील मुस्लिमांबाबतचे दावे आणि दिल्लीतील धार्मिक स्थळांशी जोडलेले मुद्दे उपस्थित करून जमावाला भडकवण्याचा प्रयत्न केला. या रॅलीत जहाल विचारसरणीचे खासदार हसनात अब्दुल्ला हे देखील सहभागी झाले होते. उल्लेखनीय म्हणजे, हसनात अब्दुल्ला यांनी यापूर्वी भारताच्या ईशान्येकडील सात राज्यांना तोडण्याची आणि सिलीगुडी कॉरिडॉर (चिकन नेक) रोखण्याची धमकी देऊन वाद ओढवून घेतला होता.
जागतिक घडामोडी संबंधित बातम्या वाचण्यासाठी येथे क्लिक करा : Kim Jong Un : किम जोंग-उन यांना रोखण्यासाठी ‘या’ तीन महासत्ता एकत्र; उत्तर कोरियाच्या न्यूक्लीयर ताकदीविरोधात मोठी रणनीती
या रॅलीतील सर्वात महत्त्वाचा आणि आंतरराष्ट्रीय स्तरावर चिंता वाढवणारा मुद्दा म्हणजे गंगा नदीच्या पाणी वाटपाचा करार. भारत आणि बांगलादेश यांच्या दरम्यान १२ डिसेंबर १९९६ रोजी झालेला ऐतिहासिक ३० वर्षांचा गंगा पाणी वाटप करार या वर्षी म्हणजेच डिसेंबर २०२६ मध्ये संपत आहे. या करारानुसार जानेवारी ते मे या कोरड्या कालावधीत पश्चिम बंगालमधील फरक्का बॅरेजवरून गंगेच्या पाण्याचे वाटप केले जाते.
बांगलादेशात गंगा नदीला ‘पद्मा’ म्हणून ओळखले जाते आणि देशातील एक तृतीयांश लोकसंख्येची उपजीविका या पाण्यावर अवलंबून आहे. या कराराच्या नूतनीकरणाबाबत बोलताना नाहिद इस्लाम यांनी इशारा दिला की, “जर भारतासोबत गंगा पाणी वाटप करारावर न्यायाने आणि बांगलादेशच्या हिताचे रक्षण करून पुन्हा स्वाक्षरी झाली नाही, तर बांगलादेशची जनता पुन्हा एकदा रस्त्यावर उतरेल. या वेळी आम्ही आमच्या हक्काच्या पाण्यासाठी कोणतीही तडजोड करणार नाही.”
ऑगस्ट २०२४ मध्ये शेख हसीना यांची सत्ता उलथवून लावल्यानंतर बांगलादेशात भारतविरोधी भावना भडकावण्याचे सत्र सातत्याने सुरू आहे. फेब्रुवारी २०२६ च्या निवडणुकांनंतर तारिक रहमान यांच्या नेतृत्वाखालील बांगलादेश नॅशनल पार्टीचे (BNP) सरकार सत्तेवर आले असले, तरी देशातील अंतर्गत आर्थिक प्रश्न मिटण्याऐवजी अधिकच गंभीर बनले आहेत. आपल्या राजकारणाची पोळी भाजण्यासाठी राजकीय नेते पुन्हा एकदा भारतविरोधी कार्ड वापरत असल्याचे स्पष्ट दिसत आहे. आगामी काळात डिसेंबर २०२६ मधील गंगा पाणी कराराच्या नूतनीकरणाच्या पार्श्वभूमीवर दोन्ही देशांमधील मुत्सद्दी संबंध किती तणावपूर्ण वळण घेतात, याकडे संपूर्ण दक्षिण आशियाचे लक्ष लागले आहे.
